Isaiah 14
The Book of Isaiah
܀ ܐܫܥܝܐ ܝܕ ܀
1 ܡܶܛܽܠ ܕܰܡܪܰܚܶܡ ܡܳܪܝܳܐ ܥܰܠ ܝܰܥܩܽܘܒ: ܘܡܶܨܛܒܶܐ ܬܽܘܒ ܒܺܝܣܪܳܐܶܝܠ ܘܢܶܫܒܽܘܩ ܐܶܢܽܘܢ ܒܰܐܪܥܗܽܘܢ. ܘܢܶܬܠܰܘܢ ܥܠܰܝܗܽܘܢ ܥܳܡܽܘܖ̈ܶܐ. ܘܢܶܬܬܰܘܣܦܽܘܢ ܥܰܠ ܕܒܶܝܬ ܝܰܥܩܽܘܒ.
2 ܘܢܶܕܒܪܽܘܢ ܐܶܢܽܘܢ ܥܰܡ̈ܡܶܐ. ܘܢܰܝܬܽܘܢ ܐܶܢܽܘܢ ܠܰܐܪܥܗܽܘܢ ܘܢܺܐܪܬܽܘܢ ܐܶܢܽܘܢ ܕܒܶܝܬ ܝܺܣܪܳܐܶܝܠ: ܒܰܐܪܥܶܗ ܕܡܳܪܝܳܐ: ܠܥܰܒ̈ܕܶܐ ܘܠܰܐܡ̈ܗܳܬܳܐ. ܘܢܶܗܘܽܘܢ ܫܳܒܶܝܢ ܠܫܳܒܰܝ̈ܗܽܘܢ: ܘܢܶܫܬܰܠܛܽܘܢ ܒܰܡܫܰܥܒܕܳܢܰܝ̈ܗܽܘܢ.
3 ܘܢܶܗܘܶܐ ܒܝܰܘܡܳܐ ܕܰܢܢܺܝܚܳܟ ܡܳܪܝܳܐ ܡ̣ܶܢ ܟܰܪܝܽܘܬܳܟ: ܘܡ̣ܶܢ ܪܽܘܓܙܳܟ: ܘܡ̣ܶܢ ܫܽܘܥܒܳܕܳܐ ܩܰܫܝܳܐ ܕܶܐܫܬܰܥܒܰܕܬ.
4 ܬܶܫܩܽܘܠ ܡܰܬܠܳܐ ܗܳܢܳܐ ܥܰܠ ܡܰܠܟܳܐ ܕܒܳܒܶܠ: ܘܬܺܐܡܰܪ. ܐܰܝܟܰܢܳܐ ܒܛܶܠ̣ ܫܰܠܺܝܛܳܐ: ܘܰܒܛܶܠ ܡܚܰܦܛܳܢܳܐ.
5 ܬܒܰܪ ܡܳܪܝܳܐ ܚܽܘܛܪܳܐ ܕܪܰܫܺܝܥܳܐ: ܘܫܰܒܛܳܐ ܕܫܰܠܺܝܛܳܐ.
6 ܕܡܳܚܶܐ ܗ̱ܘܳܐ ܥܰܡ̈ܡܶܐ ܒܰܐܟܬܳܐ: ܡܚܽܘܬܳܐ ܕܠܳܐ ܡܶܪܕܽܘ. ܘܪܳܕܶܐ ܗ̱ܘܳܐ ܒܪܽܘܓܙܳܐ ܥܰܡ̈ܡܶܐ. ܘܪܳܕܶܦ ܠܗܽܘܢ ܕܠܳܐ ܚܳܘܣܳܢ.
7 ܐܶܬܬܢܺܝܚܰܬ ܘܫܶܠܝܰܬ ܟܽܠܳܗ̇ ܐܰܪܥܳܐ: ܘܕܳܨܰܬ ܒܬܶܫܒܽܘܚܬܳܐ.
8 ܐܳܦ ܒܪܽܘܬܳܐ ܘܰܐܖ̈ܙܶܐ ܕܠܶܒܢܳܢ ܚܕܺܝܘ ܠܳܟ. ܡ̣ܶܢ ܙܰܒܢܳܐ ܕܰܫܟܶܒܬ: ܠܳܐ ܣܠܶܩܘ ܥܠܰܝܢ ܠܡܶܦܣܰܩ.
9 ܫܝܽܘܠ ܡ̣ܶܢ ܠܬܰܚܬ ܐܶܬܡܰܪܡܪܰܬ ܠܽܘܩܒܰܠ ܡܰܥܠܳܟ. ܐܰܥܺܝܪܰܬ ܥܠܰܝܟ ܓܰܢ̱ܒܳܖ̈ܶܐ: ܘܟܽܠܗܽܘܢ ܫܰܠܺܝܛܳܢ̈ܶܐ ܕܰܐܪܥܳܐ ܕܰܐܩܺܝܡܬ ܡ̣ܶܢ ܟܽܘܖ̈ܣܰܘܳܬܗܽܘܢ.
10 ܟܽܠܗܽܘܢ ܡܰܠ̈ܟܶܐ ܕܥܰܡ̈ܡܶܐ ܢܶܥܢܽܘܢ ܘܢܺܐܡܪܽܘܢ ܠܳܟ: ܐܳܦ ܐܰܢ̱ܬ ܐܶܬܟܪܰܗܬ ܐܰܟܘܳܬܰܢ: ܘܰܠܘܳܬܰܢ ܐܶܫܬܰܠܶܡܬ.
11 ܘܺܐܝܩܳܪܳܟ ܢ̣ܚܶܬ ܠܰܫܝܽܘܠ: ܘܡ̣ܺܝܬ ܟܶܢܳܪܳܟ ܬܚܽܘܬܰܝܟ ܬܶܬܡܟܰܟ ܪܳܡܬܳܐ: ܘܰܬܟܰܣܶܝܟ ܬܰܘܠܥܳܐ.
12 ܐܰܝܟܰܢܳܐ ܢܦܰܠ̣ܬ ܡ̣ܶܢ ܫܡܰܝܳܐ. ܐܰܝܠܶܠ ܒܨܰܦܪܳܐ ܢܦܰܠܬ ܒܰܐܪܥܳܐ ܡܨܰܥܪܳܢܳܐ ܕܥܰܡ̈ܡܶܐ.
13 ܐܰܢ̱ܬ ܐܶܡܰܪܬ ܒܠܳܒܳܟ. ܕܶܐܣܰܩ ܠܰܫܡܰܝܳܐ: ܘܰܠܥܶܠ ܡ̣ܶܢ ܟܰܘܟܒܰܘ̈ܗܝ ܕܺܐܝܠ ܐܰܪܺܝܡ ܟܽܘܪܣܰܝ: ܘܶܐܬܶܒ ܒܛܽܘܖ̈ܶܐ ܖ̈ܳܡܶܐ ܕܒܰܫܦܽܘ̈ܠܰܝ ܓܰܪܒܝܳܐ.
14 ܘܶܐܣܰܩ ܥܰܠ ܪܰܘܡܳܐ ܕܰܥܢܳܢ̈ܶܐ: ܘܶܐܬܕܰܡܶܐ ܠܥܶܠܝܳܐ.
15 ܡܶܟܺܝܠ ܠܰܫܝܽܘܠ ܬܶܚܽܘܬ: ܘܠܐܶܫܬܶܗ ܕܓܽܘܒܳܐ.
16 ܟܽܠ ܚܳܙ̈ܝܰܝܟ ܥܠܰܝܟ ܢܕܺܝܩܽܘܢ ܘܒܳܟ ܢܶܣܬܰܟܠܽܘܢ: ܘܢܺܐܡܪܽܘܢ: ܗܳܢܰܘ ܓܰܒܪܳܐ ܕܡܰܪܡܰܪ ܗ̱ܘܳܐ ܐܰܪܥܳܐ: ܘܰܐܙܺܝܥ ܡܰܠ̈ܟܘܳܬܳܐ.
17 ܘܰܐܚܪܶܒ ܬܺܒܶܝܠ ܐܰܝܟ ܡܕܰܒܪܳܐ. ܘܩܽܘܖ̈ܝܳܐ ܣܰܚܶܦ: ܘܰܐܣܺܝܖ̈ܰܘܗܝ ܠܳܐ ܫ̣ܪܳܐ.
18 ܟܽܠܗܽܘܢ ܡܰܠ̈ܟܶܐ ܕܥܰܡ̈ܡܶܐ: ܫܟܶܒܘ ܒܺܐܝܩܳܪܳܐ: ܐ̱ܢܳܫ ܒܒܰܝܬܶܗ.
19 ܘܰܐܢ̱ܬ ܐܶܫܬܕܺܝܬ ܡ̣ܶܢ ܩܰܒܪܳܟ: ܐܰܝܟ ܢܽܘܪܒܳܐ ܡܰܣܠܝܳܐ: ܠܒܽܘܫܳܐ ܕܰܩܛܺܝ̈ܠܶܐ ܕܰܩܛܺܝܠܺܝܢ ܒܣܰܝܦܳܐ: ܕܢܳܚܬܺܝܢ ܒܟܺܐܦ̈ܶܐ ܕܓܽܘܒܳܐ ܐܰܝܟ ܫܠܰܕܳܐ ܕܺܝ̈ܫܳܬܳܐ.
20 ܘܠܳܐ ܬܶܚܕܶܐ ܥܰܡܗܽܘܢ ܒܩܰܒܪܳܐ: ܡܶܛܽܠ ܕܰܐܪܥܳܟ ܚܰܒܶܠܬ: ܘܥܰܡܳܟ ܩܛܰܠܬ. ܠܳܐ ܢܩܽܘܡ ܠܥܳܠܰܡ ܙܰܪܥܳܐ ܒܺܝܫܳܐ.
21 ܛܰܝܶܒ ܠܰܒܢܰܘ̈ܗܝ ܩܶܛܠܳܐ ܒܥܰܘܠܳܐ ܕܰܐܒܽܘܗܽܘܢ. ܕܠܳܐ ܢܩܽܘܡܽܘܢ ܘܢܺܐܪܬܽܘܢ ܐܰܪܥܳܐ: ܘܢܶܡܠܽܘܢ ܐܰܦܰܝ̈ ܬܺܒܶܝܠ ܩܪܳܒܳܐ.
22 ܐܶܩܽܘܡ ܥܠܰܝܗܽܘܢ: ܐܳܡܰܪ ܡܳܪܝܳܐ ܚܰܝܠܬܳܢܳܐ. ܘܰܐܘܒܶܕ ܫܡܳܗ̇ ܕܒܳܒܶܠ: ܘܙܰܪܥܳܗ̇ ܘܛܽܘܗܡܳܗ̇ ܘܫܰܪܒܬܳܗ̇: ܐܳܡܰܪ ܡܳܪܝܳܐ.
23 ܘܶܐܥܒܕܺܝܗ̇ ܝܳܪܬܽܘܬܳܐ ܠܩܽܘ̈ܦܕܶܐ: ܘܰܐܓܡ̈ܶܐ ܕܡܰܝ̈ܳܐ ܘܶܐܟܢܫܺܝܗ̇ ܒܡܰܟܢܰܫܬܳܐ ܕܰܐܒܕܳܢܳܐ: ܐܳܡܰܪ ܡܳܪܝܳܐ ܚܰܝܠܬܳܢܳܐ.
24 ܝܺܡܳܐ ܡܳܪܝܳܐ ܚܰܝܠܬܳܢܳܐ ܘܶܐܡܰܪ: ܕܰܐܝܟ ܕܶܐܬܚܰܫܒܶܬ: ܗܳܟܰܢܳܐ ܢܶܗܘܶܐ. ܘܰܐܝܟ ܕܶܐܬܪܰܥܺܝܬ: ܢܶܬܩܰܝܰܡ.
25 ܕܶܐܬܒܰܪ ܠܐܳܬܽܘܪܳܝܳܐ ܒܰܐܪܥܝ: ܘܥܰܠ ܛܽܘܖ̈ܰܝ ܐܶܕܽܘܫܺܝܘܗܝ. ܘܢܶܥܒܰܪ ܢܺܝܪܶܗ ܡܶܢܗܽܘܢ: ܘܫܽܘܥܒܳܕܶܗ ܡ̣ܶܢ ܟܰܬܦܗܽܘܢ ܢܶܥܒܰܪ.
26 ܗܳܕܳܐ ܗ̱ܝ ܬܰܪܥܺܝܬܳܐ ܕܶܐܬܪܰܥܺܝܬ ܥܰܠ ܐܰܪܥܳܐ ܟܽܠܳܗ̇. ܘܗܳܕܳܐ ܗ̱ܝ ܐܺܝܕܳܐ ܕܶܐܬܬܪܺܝܡܰܬ ܥܰܠ ܟܽܠܗܽܘܢ ܥܰܡ̈ܡܶܐ.
27 ܡܳܪܝܳܐ ܚܰܝܠܬܳܢܳܐ ܐܶܬܪܰܥܺܝ: ܡܰܢܽܘ ܢܒܰܛܶܠ ܘܠܺܐܝܕܶܗ ܪܳܡܬܳܐ ܡܰܢܽܘ ܢܰܗܦܶܟ.
28 ܡܰܫܩܠܳܐ ܕܰܦܠܶܫܬ: ܒܫܰܢ̱ܬܳܐ ܕܡܺܝܬ ܐܳܚܳܙ ܡܰܠܟܳܐ ܗܘܳܐ ܡܰܫܩܠܳܐ ܗܳܢܳܐ.
29 ܠܳܐ ܬܶܚܕܶܝܢ ܟܽܠܶܟܝ ܦܠܶܫܬ: ܡܶܛܽܠ ܕܶܐܬܬܒܰܪ ܫܰܒܛܳܐ ܕܰܡܫܰܥܒܕܳܢܰܟܝ. ܡܶܛܽܠ ܕܡ̣ܶܢ ܥܶܩܳܪܶܗ ܕܚܶܘܝܳܐ ܢܳܦܶܩ ܓܳܪܣܳܐ: ܘܦܺܐܖ̈ܰܘܗܝ ܚܰܪܡܳܢܳܐ ܕܦܳܪܰܚ.
30 ܘܢܶܪܥܽܘܢ ܒܽܘܟܖ̈ܰܝ ܡܶܣܟܺܢ̈ܶܐ. ܘܒܝܳܫ̈ܶܐ ܒܫܶܠܝܳܐ ܢܶܪܒܥܽܘܢ ܘܰܐܡܺܝܬ ܥܶܩܳܪܶܟܝ ܒܟܰܦܢܳܐ. ܘܰܕܡܶܫܬܚܰܪ ܡܶܢܶܟܝ ܢܶܬܩܛܶܠ.
31 ܐܰܝܠܠܶܝ ܩܪܺܝܬܳܐ: ܒܰܓܶܢܝ ܩܪܺܝܬܳܐ ܐܶܬܕܰܠܚܰܬ ܦܠܶܫܬ ܟܽܠܳܗ̇. ܡܶܛܽܠ ܕܡ̣ܶܢ ܓܰܪܒܝܳܐ ܐܳܬܶܐ ܬܶܢܳܢܳܐ: ܘܠܰܝܬ ܕܺܝܚܺܝܕܳܝ ܒܥܰܕܥܺܕܰܘ̈ܗܝ.
32 ܘܡܳܢܳܐ ܢܶܥܢܶܐ ܠܡܰܠܰܐܟܳܐ ܕܥܰܡ̈ܡܶܐ: ܕܡܳܪܝܳܐ ܡܰܬܩܶܢ ܫܶܬܶܐܣ̈ܶܝܗ̇ ܕܨܶܗܝܽܘܢ ܘܒܳܗ̇ ܢܶܣܬܰܬܪܽܘܢ ܒܳܝܫ̈ܶܐ ܕܥܰܡܶܗ.