Isaiah 29
The Book of Isaiah
܀ ܐܫܥܝܐ ܟܛ ܀
1 ܘܳܝ ܐܰܪܺܝܠ ܐܰܪܺܝܠ ܩܪܺܝܬܳܐ ܕܰܫܪܳܐ ܕܰܘܺܝܕ. ܐܰܘܣܶܦܘ ܫܰܢ̱ܬܳܐ ܥܰܠ ܫܰܢ̱ܬܳܐ: ܥܰܕܥ̈ܺܐܕܶܐ ܢܶܬܥܰܒܕܽܘܢ.
2 ܘܰܐܥܺܝܩ ܠܰܐܪܺܝܠ: ܘܬܶܗܘܶܐ ܢܽܘܗܳܡܳܐ ܐܘܠܺܝܬܳܐ: ܘܬܶܗܘܶܐ ܐܰܝܟ ܐܰܪܺܝܠ.
3 ܘܶܐܫܪܶܐ ܐܰܝܟ ܐܶܣܦܺܪܳܐ ܥܠܰܝܟܝ ܘܰܐܠܨܶܟܝ ܒܡܰܩܰܒܬܳܐ ܘܰܐܩܺܝܡ ܥܠܰܝܟܝ ܡܰܛܰܪܬܳܐ.
4 ܘܬܶܬܡܰܟܟܺܝܢ ܘܡ̣ܶܢ ܥܰܦܪܳܐ ܬܡܰܠܠܺܝܢ. ܘܡ̣ܶܢ ܥܰܦܪܳܐ ܢܢܰܨܖ̈ܳܢ ܡܶܠܰܝ̈ܟܝ ܘܢܶܫܬܡܰܥ ܩܳܠܶܟܝ ܡ̣ܶܢ ܐܰܪܥܳܐ ܐܰܝܟ ܙܰܟܽܘܪܳܐ. ܘܡ̣ܶܢ ܥܰܦܪܳܐ ܢܢܰܨܖ̈ܳܢ ܡܶܠܰܝ̈ܟܝ.
5 ܘܢܶܗܘܶܐ ܐܰܝܟ ܚܶܠܳܐ ܕܰܩܺܝܩܳܐ ܣܽܘܓܳܐܐ ܕܕܳܝܽܘܫܰܝ̈ܟܝ ܘܰܐܝܟ ܥܽܘܪܳܐ ܕܥܳܒܰܪ ܣܽܘܓܳܐܐ ܕܥܰܫܺܝܢܰܝ̈ܟܝ. ܘܢܶܗܘܶܐ ܡ̣ܶܢ ܫܶܠܝܳܐ ܒܰܥܓܰܠ.
6 ܡ̣ܶܢ ܩܕܳܡ ܡܳܪܝܳܐ ܚܰܝܠܬܳܢܳܐ: ܬܶܬܦܩܶܕ ܒܙܰܘ̈ܥܶܐ: ܘܰܒܖ̈ܰܥܡܶܐ ܘܰܒܩܳܠܳܐ ܪܰܒܳܐ: ܘܰܒܩܽܘܕܚܳܬܳܐ: ܘܰܒܥܰܠܥܳܠܳܐ: ܘܰܒܫܰܠܗܶܒܺܝܬܳܐ ܕܢܽܘܪܳܐ ܕܡܰܘܩܕܳܐ.
7 ܘܢܶܗܘܶܐ ܐܰܝܟ ܚܶܠܡܳܐ ܒܚܶܙܘܳܐ ܕܠܺܠܝܳܐ: ܣܽܘܓܳܐܐ ܕܟܽܠܗܽܘܢ ܥܰܡ̈ܡܶܐ ܕܡܶܬܚܰܝܠܺܝܢ ܥܰܠ ܨܶܗܝܽܘܢ: ܘܟܽܠ ܚܰܝ̈ܠܶܐ ܘܟܶܢ̈ܫܶܐ ܕܰܡܥܺܝܩܺܝܢ ܠܳܗ̇.
8 ܘܢܶܗܘܶܐ ܐܰܝܟ ܟܰܦܢܳܐ ܕܚܳܙܶܐ ܒܚܶܠܡܶܗ ܕܳܐܟܶܠ ܘܡܳܐ ܕܶܐܬܬܥܺܝܪ: ܡܛܰܪܰܦ: ܘܰܣܪܺܝܩܳܐ ܢܰܦܫܶܗ. ܘܰܐܝܟ ܨܶܗܝܳܐ ܕܚܳܙܶܐ ܒܚܶܠܡܶܗ ܕܫܳܬܶܐ. ܘܡܳܐ ܕܶܐܬܬܥܺܝܪ: ܡܛܰܪܰܦ ܘܰܣܪܺܝܩܳܐ ܢܰܦܫܶܗ. ܗܳܟܰܢܳܐ ܢܶܗܘܶܐ ܣܽܘܓܳܐܐ ܕܟܽܠܗܽܘܢ ܥܰܡ̈ܡܶܐ ܕܡܶܬܚܰܝܠܺܝܢ ܥܰܠ ܛܽܘܪܳܐ ܕܨܶܗܝܽܘܢ.
9 ܬܡܰܗܘ ܘܶܐܬܕܰܡܰܪܘ: ܘܶܐܬܛܰܪܰܦܘ ܘܰܬܘܰܪܘ: ܕܰܪܘܶܝܢ ܠܳܐ ܡ̣ܶܢ ܚܰܡܪܳܐ: ܘܰܕܛܳܥܶܝܢ ܠܳܐ ܡ̣ܶܢ ܫܰܟܪܳܐ.
10 ܡܶܛܽܠ ܕܰܢܣܰܟ ܥܠܰܝܗܽܘܢ ܡܳܪܝܳܐ ܪܽܘܚܳܐ ܛܰܒܺܝܥܬܳܐ ܘܥܶܫܢܰܬ ܥܰܠ ܥܰܝܢܰܝ̈ܗܽܘܢ ܘܥܰܠ ܢܒܺܝ̈ܶܐ: ܘܥܰܠ ܖ̈ܺܝܫܰܝܗܽܘܢ ܕܚܳܙܶܝܢ ܟܰܣ̈ܝܳܬܳܐ.
11 ܘܢܶܗܘܶܐ ܒܗܽܘܢ ܚܶܙܘܳܐ ܕܟܽܠܗܽܘܢ ܐܰܝܟ ܡ̈ܶܠܶܐ ܕܰܟܬܒܳܐ ܕܰܚܬܺܝܡ ܕܡܳܐ ܕܝܰܗܒܽܘܗܝ ܠܡܰܢ ܕܝܳܕܰܥ ܣܶܦܪܳܐ: ܢܺܐܡܪܽܘܢ ܠܶܗ ܩܪܺܝ ܗܳܢܳܐ: ܘܢܺܐܡܰܪ ܠܳܐ ܡܶܫܟܰܚ ܐ̱ܢܳܐ: ܡܶܛܽܠ ܕܰܚܬܺܝܡ ܗ̱ܘ.
12 ܘܢܶܬܠܽܘܢܶܗ ܠܰܟܬܒܳܐ ܠܡܰܢ ܕܠܳܐ ܝܳܕܰܥ ܣܶܦܪܳܐ. ܘܢܺܐܡܪܽܘܢ ܠܶܗ ܩܪܺܝ ܗܳܢܳܐ. ܘܢܺܐܡܰܪ ܠܳܐ ܝܳܕܰܥ ܐ̱ܢܳܐ ܣܶܦܪܳܐ.
13 ܘܶܐܡܰܪ ܡܳܪܝܳܐ: ܥܰܠ ܕܰܩܪܶܒ ܥܰܡܳܐ ܗܳܢܳܐ ܒܦܽܘܡܶܗ: ܘܰܒܣܶܦ̈ܘܳܬܶܗ ܝܰܩܪܰܢܝ: ܘܠܶܒܶܗ ܪܰܚܺܝܩ ܡܶܢܝ: ܘܰܗܘܳܬ ܕܶܚܠܰܬܗܽܘܢ ܡܶܢܝ ܒܦܽܘܩܕܳܢܳܐ ܘܰܒܝܽܘܠܦܳܢܳܐ ܕܐ̱ܢܳܫܳܐ.
14 ܡܶܛܽܠ ܗܳܢܳܐ: ܗܳܐ ܡܰܘܣܶܦ ܐ̱ܢܳܐ ܠܡܶܦܪܫܶܗ ܠܥܰܡܳܐ ܗܳܢܳܐ: ܒܬܶܕܡܽܘܪܬܳܐ ܘܰܒܕܽܘܡܳܪܳܐ. ܘܬܺܐܒܰܕ ܚܶܟܡܬܳܐ ܕܚܰܟܺܝܡܰܘ̈ܗܝ. ܘܣܽܘܟܳܠܳܐ ܕܣܰܟܽܘܠܬܳܢܰܘ̈ܗܝ ܢܶܬܓܠܶܙ.
15 ܘܳܝ ܠܰܕܡܶܬܥܰܩܡܺܝܢ ܡ̣ܶܢ ܡܳܪܝܳܐ: ܠܰܡܛܰܫܳܝܘ ܬܰܪܥܺܝܬܳܐ. ܘܗܳܘܶܝܢ ܒܚܶܫܽܘܟܳܐ ܥܒܳܕܰܝ̈ܗܽܘܢ ܘܳܐܡܪܺܝܢ ܡܰܢܘ ܚܳܙܶܐ ܠܰܢ: ܐܰܘ ܡܰܢܽܘ ܝܳܕܰܥ ܡܳܢܳܐ ܡܶܬܗܰܦܟܺܝܢܰܢ.
16 ܐܰܝܟ ܛܺܝܢܳܐ ܕܦܰܚܳܪܳܐ ܚܫܺܝܒܺܝܢ ܐ̱ܢܬܽܘܢ. ܕܰܠܡܳܐ ܐܳܡܰܪ ܥܒܳܕܳܐ ܠܥܳܒܽܘܕܶܗ ܠܳܐ ܥܒܰܕܬܳܢܝ. ܘܰܓܒܺܝܠܬܳܐ ܐܳܡ̇ܪܳܐ ܠܓܳܒܽܘܠܳܗ̇: ܕܚܰܟܺܝܡܳܐܺܝܬ ܠܳܐ ܓܒܰܠܬܳܢܝ.
17 ܗܳܐ ܥܰܕ ܩܰܠܺܝܠ ܙܥܽܘܪ: ܘܢܶܗܦܽܘܟ ܠܶܒܢܳܢ ܠܟܰܪܡܠܳܐ: ܘܟܰܪܡܠܳܐ ܠܥܳܒܳܐ ܢܶܬܚܫܶܒ.
18 ܘܢܶܫܡܥܽܘܢ ܒܝܰܘܡܳܐ ܗܰܘ ܚܰܖ̈ܫܶܐ ܡ̈ܶܠܶܐ ܕܰܟܬܒܳܐ. ܘܡ̣ܶܢ ܚܶܫܽܘܟܳܐ ܘܥܰܡܛܳܢܳܐ: ܥܰܝ̈ܢܶܐ ܕܰܥܘܺܝܖ̈ܶܐ ܢܶܚ̈ܙܝܳܢ.
19 ܘܢܰܘܣܦܽܘܢ ܡܰܟܺܝ̈ܟܶܐ ܒܡܳܪܝܳܐ ܒܚܰܕܽܘܬܳܐ. ܘܐ̱ܢܳܫܳܐ ܒܳܝ̈ܫܶܐ ܒܩܰܕܺܝܫܳܐ ܕܺܝܣܪܳܐܶܝܠ ܢܕܽܘܨܽܘܢ.
20 ܡܶܛܽܠ ܕܰܥܒܰܪ ܕܳܝܽܘܫܳܐ: ܘܰܓܡܰܪ ܡܡܰܝܩܳܢܳܐ. ܘܶܐܒܰܕܘ ܟܽܠ ܕܰܡܓܰܪܓܺܝܢ ܥܰܘܠܳܐ.
21 ܘܡܰܚܛܶܝܢ ܠܐ̱ܢܳܫܳܐ ܒܡܶܠܬܳܐ. ܘܠܰܕܡܰܟܶܣ ܣܳܝܡܺܝܢ ܠܶܗ ܬܽܘܩܠܬܳܐ: ܘܨܳܠܶܝܢ ܒܚܶܫܽܘܟܳܐ ܠܙܰܕܺܝܩܳܐ.
22 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ: ܥܰܠ ܒܰܝܬܶܗ ܕܝܰܥܩܽܘܒ: ܕܰܦܪܰܩ ܠܰܐܒܪܳܗܳܡ: ܠܳܐ ܡܶܟܺܝܠ ܢܶܒܗܰܬ ܝܰܥܩܽܘܒ: ܘܠܳܐ ܡܶܟܺܝܠ ܢܰܚܦܖ̈ܳܢ ܐܰܦܰܘ̈ܗܝ.
23 ܡܳܐ ܕܰܚܙܳܘ ܒܢܰܘ̈ܗܝ ܥܒܳܕ ܐܺܝܕܰܝ̈: ܒܓܰܘܶܗ ܢܩܰܕܫܽܘܢ ܫܶܡܝ. ܘܰܢܩܰܕܫܽܘܢ ܠܩܰܕܺܝܫܳܐ ܕܝܰܥܩܽܘܒ. ܘܠܰܐܠܳܗܳܐ ܕܺܝܣܪܳܐܶܝܠ ܢܥܰܫܢܽܘܢ.
24 ܘܢܶܕܥܽܘܢ ܣܰܟ̈ܠܶܐ ܐܰܝܠܶܝܢ ܕܛܳܥܝܳܐ ܗ̱ܘܳܬ ܪܽܘܚܗܽܘܢ. ܘܫܳܛܰܝ̈ܳܐ ܢܺܐܠܦܽܘܢ ܠܡܶܫܬܡܳܥܽܘ.