Isaiah 8
The Book of Isaiah
܀ ܐܫܥܝܐ ܚ ܀
1 ܘܶܐܡܰܪ ܠܺܝ ܡܳܪܝܳܐ ܣܰܒ ܠܳܟ ܓܶܠܝܽܘܢܳܐ ܪܰܒܳܐ: ܘܰܟܬܽܘܒ ܥܠܰܘܗ̱ܝ ܒܰܟܬܳܒܳܐ ܕܐ̱ܢܳܫܳܐ: ܠܰܡܣܰܪܗܳܒܽܘ ܫܶܒܝܳܐ: ܘܰܠܡܶܬܟܰܒ ܒܶܙܬܳܐ.
2 ܘܣܰܗܶܕ ܠܺܝ ܣܳܗ̈ܕܶܐ ܕܰܡܗܰܝܡܢܺܝܢ: ܠܽܐܘܪܺܝܳܐ ܟܳܗܢܳܐ: ܘܠܰܙܟܰܪܝܳܐ ܒܰܪ ܒܪܰܟܝܳܐ.
3 ܘܩܶܪܒܶܬ ܠܰܢܒܺܝܬܳܐ: ܘܒܶܛܢܰܬ ܘܝܶܠܕܰܬ ܒܪܳܐ. ܘܶܐܡܰܪ ܠܺܝ ܡܳܪܝܳܐ: ܩܪܺܝ ܫܡܶܗ ܡܣܰܪܗܶܒ ܫܳܒܶܐ: ܘܬܽܘܟܒ ܒܳܐܶܙ.
4 ܡܶܛܽܠ ܕܥܰܕܠܳܐ ܢܶܕܰܥ ܛܰܠܝܳܐ ܠܡܶܩܪܳܐ ܐܰܒܳܐ ܘܶܐܡܳܐ: ܢܶܫܩܽܘܠ ܩܶܢܝܳܢܳܐ ܕܕܰܪܡܣܽܘܩ: ܘܒܶܙܬܳܐ ܕܫܳܡܪܺܝܢ: ܩܕܳܡ ܡܰܠܟܳܐ ܕܳܐܬܽܘܪ.
5 ܘܰܐܘܣܶܦ ܬܽܘܒ ܡܳܪܝܳܐ ܠܡܺܐܡܰܪ ܠܺܝ.
6 ܥܰܠ ܕܰܐܣܠܺܝܘ ܥܰܡܳܐ ܗܳܢܳܐ ܡܰܝ̈ܳܐ ܕܫܺܝܠܽܘܚܳܐ ܕܪܳܕܶܝܢ ܒܫܶܠܝܳܐ: ܘܰܚܕܺܝܘ ܒܪܳܨܳܢ ܘܰܒܒܰܪ ܪܽܘܡܰܠܝܳܐ.
7 ܡܶܛܽܠ ܗܳܢܳܐ ܢܰܣܶܩ ܥܠܰܝܗܽܘܢ ܡܳܪܝܳܐ: ܡܰܝ̈ܳܐ ܕܢܰܗܪܳܐ ܣܰܓܺܝ̈ܐܶܐ ܘܥܰܫܺܝ̈ܢܶܐ: ܠܡܰܠܟܳܐ ܕܳܐܬܽܘܪ: ܘܰܠܟܠܶܗ ܐܺܝܩܳܪܶܗ. ܘܢܶܣܰܩ ܥܰܠ ܟܽܠܗܽܘܢ ܦܨܺܝܕܰܝ̈ܗܽܘܢ: ܘܰܢܗܰܠܶܟ ܥܰܠ ܟܽܠܗܽܘܢ ܫܽܘܖ̈ܰܝܗܽܘܢ.
8 ܘܢܶܥܒܰܪ ܒܺܝܗܽܘܕܳܐ: ܘܢܶܓܪܽܘܦ ܘܢܶܥܒܰܪ: ܘܰܥܕܰܡܳܐ ܠܨܰܘܪܳܐ ܢܶܡܛܶܐ. ܘܢܶܗܘܶܐ ܪܰܘܡܳܐ ܕܟܶܢܦܰܘ̈ܗܝ: ܡܠܶܐ ܦܬܳܝܳܗ̇ ܕܰܐܪܥܳܟ ܥܰܡܰܢܘܐܶܝܠ.
9 ܙܽܘܥܘ ܥܰܡ̈ܡܶܐ: ܘܶܐܬܬܰܒܪܘ. ܘܨܽܘܬܘ ܟܽܠܗܽܘܢ ܖ̈ܰܚܺܝܩܶܝܗ̇ ܕܰܐܪܥܳܐ. ܐܶܬܥܰܫܰܢܘ ܘܶܐܬܬܰܒܪܘ.
10 ܐܶܬܪܰܥܰܘ ܬܰܪܥܺܝܬܳܐ: ܘܬܶܬܒܰܛܰܠ ܡܰܠܠܶܘ ܡܶܠܬܳܐ: ܘܠܳܐ ܬܶܬܩܰܝܰܡ ܡܶܛܽܠ ܥܰܡܰܢܘܐܶܝܠ.
11 ܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܝܟ ܡܶܐܚܰܕ ܐܺܝܕܳܐ: ܘܢܰܣܛܶܝܢܝ: ܠܳܐ ܐܶܗܰܠܶܟ ܒܽܐܘܪܚܶܗ ܕܥܰܡܳܐ ܗܳܢܳܐ.
12 ܘܶܐܡܰܪ: ܠܳܐ ܬܶܐܡܪܽܘܢ ܡܶܪܕܳܐ: ܐܰܝܟ ܕܶܐܡܰܪ ܥܰܡܳܐ ܗܳܢܳܐ ܡܶܪܕܳܐ: ܘܰܒܕܰܚܠܰܬܗܽܘܢ ܠܳܐ ܬܶܕܚܠܽܘܢ: ܘܠܳܐ ܬܽܙܘܥܽܘܢ.
13 ܠܡܳܪܝܳܐ ܚܰܝܠܬܳܢܳܐ ܩܰܕܶܫܘ: ܘܗܽܘܝܽܘ ܕܶܚܠܰܬܟܽܘܢ: ܘܗܽܘܝܽܘ ܡܣܰܝܥܳܢܟܽܘܢ.
14 ܘܢܶܗܘܶܐ ܠܡܰܩܕܫܳܐ: ܘܰܠܟܺܐܦܳܐ ܕܰܡܚܽܘܬܳܐ: ܘܰܠܛܰܪܳܢܳܐ ܕܬܽܘܩܠܬܳܐ: ܠܰܬܖ̈ܰܝܗܽܘܢ ܒ̈ܳܬܶܐ ܕܺܝܣܪܳܐܶܝܠ: ܠܦܰܚ̈ܶܐ ܘܠܰܡܨܺܝ̈ܕܳܬܳܐ ܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
15 ܘܢܶܬܬܰܩܠܽܘܢ ܒܗܽܘܢ ܣܰܓܺܝ̈ܐܶܐ: ܘܢܶܦܠܽܘܢ: ܘܢܶܬܬܰܒܪܽܘܢ: ܘܢܶܬܬܨܺܝܕܽܘܢ: ܘܢܶܬܬܰܚܕܽܘܢ.
16 ܨܽܘܪܘ ܣܳܗܕܽܘܬܳܐ: ܘܰܚܬܽܘܡܘ ܢܳܡܽܘܣܳܐ.
17 ܒܝܽܘܠܦܳܢܝ ܐܶܟܰܬܰܪ ܠܡܳܪܝܳܐ ܕܰܐܦܢܺܝ ܐܰܦܰܘ̈ܗܝ ܡ̣ܶܢ ܕܒܶܝܬ ܝܰܥܩܽܘܒ: ܘܶܐܣܰܟܶܐ ܠܶܗ.
18 ܗܳܐ ܐܶܢܳܐ ܘܰܒܢܰܝ̈ܳܐ ܕܝܰܗ̱ܒ ܠܺܝ ܡܳܪܝܳܐ: ܠܳܐܬܳܐ ܘܰܠܬܶܕܡܽܘܪܬܳܐ ܒܺܐܝܣܪܳܝܶܠ: ܡ̣ܶܢ ܩܕܳܡ ܡܳܪܝܳܐ ܚܰܝܠܬܳܢܳܐ ܕܰܫܪܳܐ ܒܛܽܘܪܳܐ ܕܨܶܗܝܽܘܢ.
19 ܟܰܕ ܢܺܐܡܪܽܘܢ ܠܟܽܘܢ: ܕܰܫܐܰܠܘ ܡ̣ܶܢ ܙܰܟܽܘܖ̈ܶܐ ܘܡ̣ܶܢ ܝܰܕܽܘܥ̈ܶܐ: ܕܢܳܨܪܺܝܢ: ܘܢܳܗ̇ܡܺܝܢ: ܠܳܐ ܗܘܰܘ ܥܰܡܶܗ ܕܰܐܠܳܗܳܐ ܐܰܝܠܶܝܢ ܕܫܳܐܠܺܝܢ ܠܡܺܝ̈ܬܶܐ ܥܰܠ ܚܰܝ̈ܶܐ.
20 ܠܢܳܡܽܘܣܳܐ ܘܰܠܣܳܗܕܽܘܬܳܐ: ܕܠܳܐ ܢܺܐܡܪܽܘܢ ܐܰܝܟ ܡܶܠܬܳܐ ܗܳܕܶܐ: ܕܠܰܝܬ ܠܡܶܬܰܠ ܥܠܶܝܗ̇ ܫܽܘܚܕܳܐ.
21 ܘܢܶܥܒܰܪ ܒܳܗ̇: ܘܰܢܩܰܫܶܝܗ̇: ܘܢܶܟܦܰܢ. ܘܡܳܐ ܕܰܟܦܶܢ ܢܶܪܓܰܙ: ܘܰܢܨܰܚܶܐ ܠܡܰܠܟܶܗ ܘܠܰܐܠܳܗܶܗ.
22 ܘܢܶܬܦܢܶܐ ܠܥܶܠ: ܘܒܰܐܪܥܳܐ ܢܚܽܘܪ: ܐܘܠܨܳܢܳܐ ܘܚܶܫܽܘܟܳܐ: ܘܥܳܩܬܳܐ ܘܥܰܡܛܳܢܳܐ ܢܶܕܚܩܺܝܘܗܝ ܡܶܛܽܠ ܕܠܳܐ ܢܛܰܪܶܦ ܠܰܐܝܢܳܐ ܕܰܡܥܳܩ: ܐܰܝܟ ܕܰܒܙܰܒܢܳܐ ܩܰܕܡܳܝܳܐ.