Isaiah 65
The Book of Isaiah
܀ ܐܫܥܝܐ ܣܗ ܀
1 ܐܶܬܒܥܺܝܬ ܠܰܐܝܠܶܝܢ ܕܠܳܐ ܫܰܐܠܽܘܢܝ ܘܶܐܫܬܰܟܚܶܬ ܠܰܐܝܠܶܝܢ ܕܠܳܐ ܒܥܳܐܽܘܢܝ. ܐܶܡ̇ܪܶܬ ܗܳܐ ܐܶܢܳܐ: ܠܥܰܡܳܐ ܕܠܳܐ ܩܪܳܐ ܫܶܡܝ.
2 ܦܶܫܛܶܬ ܐܺܝ̈ܕܰܝ ܝܰܘܡܳܐ ܟܽܠܶܗ: ܥܰܠ ܥܰܡܳܐ ܕܠܳܐ ܡܶܬܛܦܺܝܣ: ܕܰܡܗܰܠܟܺܝܢ ܒܳܬܰܪ ܬܰܖ̈ܥܝܳܬܗܽܘܢ: ܒܽܐܘܪܚܳܐ ܕܠܳܐ ܫܰܦܺܝܪܳܐ.
3 ܥܰܡܳܐ ܕܡܰܪܓܙܺܝܢ ܠܺܝ ܐܰܡܺܝܢܳܐܺܝܬ: ܕܕܳܒܚܺܝܢ ܒܓܰ̈ܢܶܐ: ܘܣܳܝܡܺܝܢ ܒܶܣ̈ܡܶܐ ܥܰܠ ܐܰܒܳܢ̈ܶܐ.
4 ܘܝܳܬܒܺܝܢ ܒܩܰܒܖ̈ܶܐ: ܘܒܳܝܬܺܝܢ ܒܰܡܥܰܖ̈ܶܐ. ܘܐܳܟܠܺܝܢ ܒܶܣܪܳܐ ܕܰܚܙܺܝܪܳܐ. ܘܰܡܛܰܘܫܺܝܢ ܒܰܫ̈ܠܰܕܶܐ ܡܳܐܢܰܝ̈ܗܽܘܢ.
5 ܘܳܐܡܪܺܝܢ ܦܪܽܘܩ ܠܗܰܠ: ܠܳܐ ܬܶܬܩܰܪܰܒ ܠܺܝ ܡܶܛܽܠ ܕܰܡܩܰܕܰܫ ܐ̱ܢܳܐ ܗܳܠܶܝܢ ܗܘܰܝ̈ ܬܶܢܳܢܳܐ ܒܪܽܘܓܙܝ: ܘܢܽܘܪܳܐ ܕܝܳܩܕܳܐ ܒܟܽܠܝܽܘܡ.
6 ܗܳܐ ܟܬܺܝܒܐ ܩܕܳܡܝ. ܠܳܐ ܐܶܫܬܽܘܩ: ܥܕܰܡܳܐ ܕܶܐܦܪܽܘܩ ܐܶܢܽܘܢ ܐܰܥܦܳܐ ܒܥܽܘܒܗܽܘܢ.
7 ܚܛܳܗܰܝ̈ܗܽܘܢ ܘܰܚܛܳܗ̈ܶܐ ܕܰܐܒܗܰܝ̈ܗܽܘܢ: ܚܰܫ ܩܒܽܘܠ ܐܶܢܽܘܢ: ܐܳܡܰܪ ܡܳܪܝܳܐ. ܕܣܳܡܘ ܒܶܣ̈ܡܶܐ ܥܰܠ ܛܽܘܖ̈ܶܐ. ܘܥܰܠ ܖ̈ܳܡܳܬܳܐ ܚܰܣܕܽܘܢܝ ܐܶܡܫܽܘܚ ܥܒܳܕܰܝ̈ܗܽܘܢ ܠܽܘܩܕܰܡ ܒܥܽܘܒܗܽܘܢ.
8 ܗܳܟܰܢܳܐ ܐܳܡܰܪ ܡܳܪܝܳܐ: ܐܰܝܟ ܕܡܶܫܬܰܟܚܳܐ ܛܽܘܛܺܝܬܳܐ ܒܰܣܓܽܘܠܳܐ: ܘܳܐܡܰܪ ܐ̱ܢܳܫ ܠܚܰܒܪܶܗ: ܠܳܐ ܬܚܰܒܠܺܝܘܗܝ: ܡܶܛܽܠ ܕܒܽܘܪܟܬܳܐ ܐܺܝܬ ܒܶܗ. ܗܳܟܰܢܳܐ ܐܶܥܒܶܕ ܡܶܛܽܠ ܥܰܒܕܰܝ̈: ܘܠܳܐ ܐܶܚܰܒܰܠ ܠܟܽܠܗܽܘܢ.
9 ܘܰܐܦܶܩ ܙܰܪܥܳܐ ܡ̣ܶܢ ܝܰܥܩܽܘܒ: ܘܡ̣ܶܢ ܝܺܗܽܘܕܳܐ ܝܳܪܬܳܐ ܕܛܽܘܪܝ ܘܢܺܐܪܬܽܘܢܶܗ ܓܒܰܝ̈. ܘܥܰܒܕܰܝ̈ ܢܶܥܡܪܽܘܢ ܬܰܡܳܢ.
10 ܘܢܶܗܘܶܐ ܫܰܪܘܳܢܳܐ ܕܰܝܪܳܐ ܠܥܳܢ̈ܳܐ. ܘܥܽܘܡܩܳܐ ܕܥܳܟܳܪ ܠܡܰܪܒܳܥܳܐ ܕܒܰܩܖ̈ܶܐ ܠܥܰܡܝ ܕܰܒܥܰܐܽܘܢܝ.
11 ܘܰܐܢ̱ܬܽܘܢ ܕܰܫܒܰܩܬܽܘܢ ܠܡܳܪܝܳܐ: ܘܰܛ̣ܥܰܝܬܽܘܢ ܠܛܽܘܪܶܗ ܩܰܕܺܝܫܳܐ. ܘܰܡ̣ܠܰܝܬܽܘܢ ܦܳܬܽܘܖ̈ܶܐ ܠܓܰܕ̈ܶܐ: ܘܰܡ̣ܙܰܓܬܽܘܢ ܠܗܽܘܢ ܐܰܓܳܢ̈ܶܐ.
12 ܐܶܡܚܶܟܽܘܢ ܒܚܰܪܒܳܐ. ܘܟܽܠܟܽܘܢ ܒܩܶܛܠܳܐ ܐܶܬܒܰܪܟܽܘܢ. ܥܰܠ ܕܰܩܪܺܝܬܟܽܘܢ ܘܠܳܐ ܥ̣ܢܰܝܬܽܘܢ. ܘܡܰܠܠܶܬ ܘܠܳܐ ܫܡܰܥܬܽܘܢ. ܘܰܥܒܰܕܬܽܘܢ ܕܒܺܝܫ ܩܕܳܡܝ ܘܰܓܒܰܝܬܽܘܢ ܡܶܕܶܡ ܕܠܳܐ ܨܳܒܶܐ ܐ̱ܢܳܐ.
13 ܡܶܛܽܠ ܗܳܢܳܐ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ. ܗܳܐ ܥܰܒܕܰܝ̈ ܢܶܐܟܠܽܘܢ: ܘܰܐܢ̱ܬܽܘܢ ܬܶܟܦܢܽܘܢ ܗܳܐ ܥܰܒܕܰܝ̈ ܢܶܫܬܽܘܢ: ܘܰܐܢ̱ܬܽܘܢ ܬܶܨܗܽܘܢ ܗܳܐ ܥܰܒܕܰܝ̈ ܢܶܚܕܽܘܢ: ܘܰܐܢ̱ܬܽܘܢ ܬܶܒܟܘܢ.
14 ܗܳܐ ܥܰܒܕܰܝ̈ ܢܫܰܒܚܽܘܢ ܡ̣ܶܢ ܛܳܒ̈ܳܬܳܐ ܕܠܶܒܗܽܘܢ: ܘܰܐܢ̱ܬܽܘܢ ܬܒܰܓܢܽܘܢ ܡ̣ܶܢ ܟܺܐܒܶܗ ܕܠܶܒܟܽܘܢ: ܘܡ̣ܶܢ ܬܒܳܪܳܗ̇ ܕܪܽܘܚܟܽܘܢ.
15 ܘܬܶܫܒܩܽܘܢ ܫܶܡܟܽܘܢ ܡܰܘܡܳܬܳܐ ܠܰܓܒܰܝ̈ ܘܰܢܡܺܝܬܳܟ ܡܳܪܝܳܐ ܐܰܠܳܗܳܐ ܘܰܠܥܰܒܕܰܘ̈ܗܝ ܢܶܩܪܶܐ ܫܡܳܐ ܐ̱ܚܪܺܢܳܐ.
16 ܕܡܶܬܒܰܪܰܟ ܒܰܐܪܥܳܐ: ܡܶܬܒܰܪܰܟ ܒܰܐܠܳܗܳܐ ܐܰܡܶܝܢ. ܘܰܕܝܳܡܶܐ ܒܰܐܪܥܳܐ: ܝܳܡܶܐ ܒܰܐܠܳܗܳܐ ܐܰܡܶܝܢ. ܡܶܛܽܠ ܕܢܶܬܛܰܥ̈ܝܳܢ ܥܳܩ̈ܳܬܳܐ ܩܰܕܡܳܝ̈ܳܬܳܐ: ܘܢܶܬܟܰܣ̈ܝܳܢ ܡ̣ܶܢ ܩܕܳܡܝ.
17 ܡܶܛܽܠ ܕܗܳܐ ܐܶܢܳܐ ܒܳܪܶܐ ܐ̱ܢܳܐ ܫܡܰܝ̈ܳܐ ܚܰܕܳܬܳܐ ܘܰܐܪܥܳܐ ܚܕܰܬܳܐ. ܘܠܳܐ ܢܶܬܕܰܟܪܽܘܢ ܩܰܕܡܳܝ̈ܳܬܳܐ. ܘܠܳܐ ܢܶܣ̈ܩܳܢ ܥܰܠ ܠܶܒܳܐ.
18 ܐܶܠܳܐ ܢܶܚܕܽܘܢ ܘܰܢܕܘܨܽܘܢ ܠܥܳܠܰܡ ܥܳܠܡܺܝܢ ܕܒܳܪܶܐ ܐ̱ܢܳܐ. ܡܶܛܽܠ ܕܗܳܐ ܒܳܪܶܐ ܐ̱ܢܳܐ ܠܽܐܘܪܺܫܠܶܡ ܕܝܳܨܳܐ: ܘܒܳܗ̇ ܐܶܚܕܶܐ.
19 ܘܶܐܚܕܶܐ ܒܽܐܘܪܺܫܠܶܡ: ܘܶܐܕܽܘܨ ܒܥܰܡܝ. ܘܬܽܘܒ ܠܳܐ ܢܶܫܬܡܰܥ ܒܳܗ̇ ܩܳܠܳܐ ܕܰܒܟܳܬܳܐ: ܘܩܳܠܳܐ ܕܺܝܠܰܠܬܳܐ.
20 ܘܬܽܘܒ ܠܳܐ ܢܶܗܘܶܐ ܬܰܡܳܢ ܛܠܶܐ ܝܰܘ̈ܡܳܬܳܐ: ܘܣܳܒܳܐ ܕܠܳܐ ܢܡܰܠܶܐ ܝܳܘ̈ܡܳܬܶܗ. ܡܶܛܽܠ ܕܛܰܠܝܳܐ ܒܰܪ ܡܳܐܐ ܫܢܺܝ̈ܢ ܢܡܽܘܬ. ܘܰܐܝܢܳܐ ܕܚܳܛܶܐ ܒܰܪ ܡܳܐܐ ܫܢܺܝ̈ܢ: ܢܶܬܬܠܺܝܛ.
21 ܘܢܶܒܢܽܘܢ ܒ̈ܳܬܶܐ: ܘܢܶܬܒܽܘܢ ܘܢܶܨܒܽܘܢ ܟܰܖ̈ܡܶܐ ܘܢܶܐܟܠܽܘܢ ܦܺܐܖ̈ܰܝܗܽܘܢ.
22 ܠܳܐ ܢܶܒܢܽܘܢ: ܘܰܐ̱ܚܖ̈ܳܢܶܐ ܢܶܬܒܽܘܢ ܘܠܳܐ ܢܶܨܒܽܘܢ: ܘܰܐ̱ܚܖ̈ܳܢܶܐ ܢܶܐܟܠܽܘܢ. ܡܶܛܽܠ ܕܝܳܘ̈ܡܳܬܶܗ ܕܥܰܡܝ ܐܰܝܟ ܝܰܘ̈ܡܳܬܳܐ ܐܶܢܽܘܢ ܕܺܐܝ̈ܠܳܢܶܐ. ܘܰܥܒܳܕ ܐܺܝܕܰܝ̈ܗܽܘܢ ܢܶܐܟܠܽܘܢ ܓܒܰܝ̈.
23 ܠܳܐ ܢܶܠܐܽܘܢ ܠܰܣܪܺܝܩܽܘܬܳܐ: ܘܠܳܐ ܢܳܘܠܕܽܘܢ ܠܠܰܘܛܬܳܐ: ܡܶܛܽܠ ܕܙܰܪܥܳܐ ܐܶܢܽܘܢ ܒܪܺܝܟܶܗ ܕܡܳܪܝܳܐ: ܗܶܢܽܘܢ ܘܰܒܢܰܝ̈ܗܽܘܢ ܥܰܡܗܽܘܢ.
24 ܘܥܰܕܠܳܐ ܢܶܩܪܽܘܢ: ܐܶܥܢܶܐ ܐܶܢܽܘܢ ܘܥܰܕܠܳܐ ܢܡܰܠܠܽܘܢ: ܐܶܫܡܰܥ ܐܶܢܽܘܢ.
25 ܕܺܐܒܳܐ ܘܶܐܡܪܳܐ ܐܰܟܚܕܳܐ ܢܶܪܥܽܘܢ. ܘܰܐܪܝܳܐ ܐܰܝܟ ܬܰܘܪܳܐ ܢܶܐܟܽܘܠ ܬܶܒܢܳܐ. ܘܚܶܘܝܳܐ ܥܰܦܪܳܐ ܠܰܚܡܶܗ: ܘܠܳܐ ܢܰܒܐܫܽܘܢ ܘܠܳܐ ܢܚܰܒܠܽܘܢ ܒܟܽܠܶܗ ܛܽܘܪܳܐ ܕܩܽܘܕܫܝ ܐܳܡܰܪ ܡܳܪܝܳܐ.