Isaiah 31
The Book of Isaiah
܀ ܐܫܥܝܐ ܠܐ ܀
1 ܘܳܝ ܠܰܕܢܳܚܬܺܝܢ ܠܡܶܨܪܶܝܢ ܠܡܶܬܥܰܕܳܪܽܘ: ܘܥܰܠ ܖ̈ܰܟܫܳܐ ܡܶܬܬܰܟܠܺܝܢ: ܘܡܶܬܬܰܟܠܺܝܢ ܥܰܠ ܡܰܖ̈ܟܒܳܬܳܐ ܣܰܓ̈ܝܳܐܬܳܐ: ܘܥܰܠ ܦܰܖ̈ܳܫܶܐ ܕܛܳܒ ܥܰܫܺܝܢܺܝܢ. ܘܠܳܐ ܐܶܬܬܟܶܠܘ ܥܰܠ ܩܰܕܺܝܫܳܐ ܕܺܝܣܪܳܐܶܝܠ: ܘܰܠܡܳܪܝܳܐ ܠܳܐ ܒܥܰܘ.
2 ܘܰܒܚܶܟܡܬܶܗ ܐܰܝܬܺܝ ܒܺܝܫܬܳܐ: ܘܡܶܠܰܘ̈ܗܝ ܠܳܐ ܐܰܥܒܰܪ. ܘܩܳܡ ܥܰܠ ܒܰܝܬܳܐ ܕܒܺܝܫ̈ܶܐ: ܘܥܰܠ ܥܽܘܕܪܳܢܳܐ ܕܥܳܒܕܰܝ̈ ܥܰܘܠܳܐ.
3 ܘܡܶܨܖ̈ܳܝܶܐ ܐ̱ܢܳܫ̈ܳܐ ܐܶܢܽܘܢ: ܘܠܳܐ ܗܘܰܘ ܐܰܠܳܗ̈ܶܐ ܘܖ̈ܶܟܫܗܽܘܢ ܕܒܶܣܪܳܐ ܐܶܢܽܘܢ: ܘܠܳܐ ܗܘܰܘ ܕܪܽܘܚܳܐ. ܘܡܳܪܝܳܐ ܢܰܪܟܶܢ ܐܺܝܕܶܗ: ܘܢܶܣܬܚܶܦ ܡܥܰܕܪܳܢܳܐ. ܘܢܶܦܶܠ ܐܳܦ ܗܰܘ ܕܡܶܬܥܰܘܰܪ ܘܟܽܠܗܽܘܢ ܐܰܟܚܕܳܐ ܢܣܽܘܦܽܘܢ.
4 ܡܶܛܽܠ ܕܗܳܟܰܢܳܐ ܐܶܡܰܪ ܠܺܝ ܡܳܪܝܳܐ: ܐܰܝܟ ܕܢܳܗܶܡ ܐܰܪܝܳܐ ܘܓܽܘܪܝܳܐ ܕܰܐܪܝܳܐ ܥܰܠ ܡܶܕܶܡ ܕܰܬܒܰܪ: ܘܩܳܥܶܝܢ ܒܶܗ ܣܽܘܓܳܐܐ ܕܖ̈ܳܥܳܘܳܬܳܐ ܘܡ̣ܶܢ ܩܳܠܗܽܘܢ ܠܳܐ ܕܳܚܶܠ: ܘܡ̣ܶܢ ܣܽܘܓܐܗܽܘܢ ܠܳܐ ܡܶܬܬܙܺܝܥ. ܗܳܟܰܢܳܐ ܢܶܚܽܘܬ ܡܳܪܝܳܐ ܚܰܝܠܬܳܢܳܐ ܠܡܶܬܚܰܝܳܠܽܘ ܥܰܠ ܛܽܘܪܳܐ ܕܨܶܗܝܽܘܢ: ܘܥܰܠ ܖ̈ܳܡܳܬܳܗ̇.
5 ܐܰܝܟ ܨܶܦܖ̈ܶܐ ܕܦܳܖ̈ܚܳܢ: ܗܳܟܰܢܳܐ ܢܰܓܶܢ ܡܳܪܝܳܐ ܚܰܝܠܬܳܢܳܐ ܥܰܠ ܐܽܘܪܺܫܠܶܡ: ܢܰܓܶܢ ܘܰܢܦܰܨܶܐ: ܘܰܢܣܰܝܰܥ ܘܰܢܥܰܕܰܪ.
6 ܬܽܘܒܘ ܒܢܰܝ̈ ܝܺܣܪܳܐܶܝܠ: ܕܰܐܥܫܶܢܬܽܘܢ ܡܰܪܕܽܘܬܳܐ.
7 ܡܶܛܽܠ ܕܰܒܝܰܘܡܳܐ ܗܰܘ: ܢܰܣܠܽܘܢ ܐ̱ܢܳܫ̈ܳܐ ܦܬܰܟܖ̈ܶܐ ܕܕܰܗܒܳܐ ܘܰܕܣܺܐܡܳܐ: ܕܰܥܒܰܕ ܠܟܽܘܢ ܐܺܝܕܰܝ̈ܟܽܘܢ ܚܛܺܝܬܳܐ.
8 ܘܢܶܦܶܠ ܐܳܬܽܘܪܳܝܳܐ ܒܚܰܪܒܳܐ: ܚܰܪܒܳܐ ܠܳܐ ܕܓܰܒܖ̈ܶܐ: ܘܚܰܪܒܳܐ ܠܳܐ ܕܓܰܢ̱ܒܳܖ̈ܶܐ ܬܶܐܟܠܺܝܘܗܝ ܘܢܶܥܪܽܘܩ ܠܶܗ ܡ̣ܶܢ ܩܕܳܡ ܚܰܪܒܳܐ: ܘܰܥܠܰܝܡܰܘ̈ܗܝ ܠܳܐܬܳܐ ܢܶܗܘܽܘܢ.
9 ܘܒܰܫܩܺܝܦܳܐ ܕܡܰܥܡܪܶܗ ܢܶܥܡܰܪ. ܘܢܶܬܬܰܒܪܽܘܢ ܡ̣ܶܢ ܐܳܬܳܐ ܪܰܘܖ̈ܒܳܢܰܘܗܝ. ܐܳܡܰܪ ܡܳܪܝܳܐ ܕܢܽܘܗܪܶܗ ܒܨܶܗܝܽܘܢ: ܘܬܰܢܽܘܪܶܗ ܒܽܐܘܪܺܫܠܶܡ.