Isaiah 56
The Book of Isaiah
܀ ܐܫܥܝܐ ܢܘ ܀
1 ܗܳܟܰܢܳܐ ܐܳܡܰܪ ܡܳܪܝܳܐ. ܛܰܪܘ ܕܺܝܢܳܐ ܘܰܥܒܶܕܘ ܙܰܕܺܝܩܽܘܬܳܐ. ܡܶܛܽܠ ܕܩܰܪܺܝܒܽ ܗ̱ܘ ܦܽܘܪܩܳܢܝ ܠܡܶܐܬܳܐ: ܘܙܰܕܺܝܩܽܘܬܝ ܠܡܶܬܓܠܳܝܽܘ.
2 ܛܽܘܒܰܘܗܝ ܠܓܰܒܪܳܐ ܕܢܶܥܒܶܕ ܗܳܕܶܐ: ܘܒܰܪܢܳܫܳܐ ܕܢܶܬܚܰܝܰܠ ܒܳܗ̇. ܘܢܶܛܰܪ ܐܳܦ ܫܰܒܬܳܐ ܕܠܳܐ ܢܰܚܠܺܝܗ̇ ܘܢܶܛܰܪ ܐܺܝܕܰܘ̈ܗܝ ܕܠܳܐ ܢܶܥܒܶܕ ܕܒܺܝܫ.
3 ܘܠܳܐ ܢܺܐܡܰܪ ܒܰܪ ܢܽܘܟܖ̈ܳܝܶܐ ܕܡܶܬܠܳܘܶܐ ܠܡܳܪܝܳܐ: ܕܡܶܦܪܰܫ ܦܳܪܶܫ ܠܺܝ ܡܳܪܝܳܐ ܡ̣ܶܢ ܥܰܡܶܗ. ܘܠܳܐ ܢܺܐܡܰܪ ܡܗܰܝܡܢܳܐ: ܕܩܰܝܣܳܐ ܐ̱ܢܳܐ ܝܰܒܺܝܫܳܐ.
4 ܡܶܛܽܠ ܕܗܳܟܰܢܳܐ ܐܳܡܰܪ ܡܳܪܝܳܐ: ܠܰܡܗܰܝܡ̈ܢܶܐ ܕܢܳܛܪܺܝܢ ܫܰܒܰܝ̈: ܘܓܳܒܶܝܢ ܡܶܕܶܡ ܕܨܳܒܶܐ ܐ̱ܢܳܐ: ܘܡܶܬܚܰܝܠܺܝܢ ܒܰܩܝܳܡܝ.
5 ܐܶܬܶܠ ܠܗܽܘܢ ܒܒܰܝܬܝ ܘܰܒܫܽܘܖ̈ܳܝ ܐܰܬܪܳܐ. ܘܰܫܡܳܐ ܕܛܳܒ ܡ̣ܶܢ ܒܢܰܝ̈ܳܐ ܘܡ̣ܶܢ ܒ̈ܢܳܬܳܐ: ܫܡܳܐ ܕܰܠܥܳܠܰܡ ܐܶܬܶܠ ܠܗܽܘܢ ܕܠܳܐ ܓܳܡܰܪ.
6 ܘܠܰܒܢܰܝ̈ ܢܽܘܟܖ̈ܳܝܶܐ ܕܡܶܬܠܰܘܶܝܢ ܠܡܳܪܝܳܐ ܠܰܡܫܰܡܳܫܽܘܬܶܗ: ܘܰܠܡܶܪܚܰܡ ܫܡܶܗ ܕܡܳܪܝܳܐ: ܘܰܕܢܶܗܘܽܘܢ ܠܶܗ ܥܰܒ̈ܕܶܐ. ܟܽܠ ܕܢܳܛܰܪ ܫܰܒܬܳܐ ܕܠܳܐ ܢܰܚܠܺܝܗ̇: ܘܡܶܬܚܰܠܺܝܢ ܒܰܩܝܳܡܝ.
7 ܐܰܝܬܶܐ ܐܶܢܽܘܢ ܠܛܽܘܪܝ ܩܰܕܺܝܫܳܐ ܘܶܐܚܰܕܶܐ ܐܶܢܽܘܢ ܒܒܰܝܬܳܐ ܕܰܨܠܽܘܬܝ ܥܳܠܰܘ̈ܳܬܗܽܘܢ ܘܕܶܒܚܰܝ̈ܗܽܘܢ ܠܨܶܒܝܳܢܳܐ ܠܡܰܕܒܰܚܝ. ܡܶܛܽܠ ܕܒܰܝܬܝ: ܒܶܝܬ ܨܠܽܘܬܳܐ ܢܶܬܩܪܶܐ: ܠܟܽܠܗܽܘܢ ܥܰܡ̈ܡܶܐ.
8 ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ: ܕܰܡܟܰܢܶܫ ܠܰܡܒܰܕܖ̈ܶܐ ܕܺܝܣܪܳܐܶܝܠ: ܬܽܘܒ ܐܶܟܰܢܶܫ ܥܠܰܘܗ̱ܝ ܠܰܡܟܰܢ̈ܫܶܐ.
9 ܟܽܠ ܚܰܝܽܘܬܳܐ ܕܕܰܒܪܳܐ: ܬܳܝ ܐܰܟܽܘܠܝ ܠܟܽܠܳܗ̇ ܚܰܝܽܘܬܳܐ ܕܥܳܒܳܐ.
10 ܚܳܙܶܝܢ ܟܽܠܗܽܘܢ ܥܘܺܝܖ̈ܶܐ ܘܠܳܐ ܝܳܕܥܺܝܢ. ܟܽܠܗܽܘܢ ܟܰܠ̈ܒܶܐ ܐܶܢܽܘܢ ܦܺܐܩ̈ܶܐ: ܘܠܳܐ ܡܶܫܟܺܚܝܢ ܠܡܶܒܰܚ. ܚܳܙܶܝܢ ܘܕܳܡܟܺܝܢ: ܘܪܳܚܡܺܝܢ ܠܰܡܢܳܡ.
11 ܘܟܰܠ̈ܒܶܐ ܐܶܢܽܘܢ ܕܝܰܥܢܳܐ ܢܰܦܫܗܽܘܢ: ܘܠܳܐ ܝܳܕܥܺܝܢ ܠܡܶܣܒܰܥ. ܢܶܗܘܽܘܢ ܒܺܝܫܺܝܢ ܘܠܳܐ ܝܳܕܥܺܝܢ ܣܽܘܟܳܠܳܐ ܟܽܠܗܽܘܢ ܠܽܐܘܪܚܗܽܘܢ ܦܢܰܘ: ܘܐ̱ܢܳܫ ܠܣܶܛܪܶܗ ܘܰܠܓܰܒܶܗ.
12 ܬܰܘ ܢܶܣܰܒ ܚܰܡܪܳܐ: ܘܢܶܣܰܒ ܫܰܟܪܳܐ ܘܢܶܗܘܶܐ ܐܰܝܟ ܕܝܳܘܡܳܢܳܐ: ܘܢܰܘܬܰܪ ܠܰܢ ܣܽܘܓܳܐܐ ܕܛܳܒ.