Isaiah 58
The Book of Isaiah
܀ ܐܫܥܝܐ ܢܚ ܀
1 ܩܪܺܝ ܒܓܰܓܰܪܬܳܟ ܘܠܳܐ ܬܚܽܘܣ ܘܰܐܪܺܝܡ ܩܳܠܳܟ ܐܰܝܟ ܫܺܝܦܽܘܪܳܐ ܘܚܰܘܳܐ ܠܥܰܡܝ ܥܰܘܠܗܽܘܢ: ܘܠܰܕܒܶܝܬ ܝܰܥܩܽܘܒ ܚܛܳܗܰܝ̈ܗܽܘܢ.
2 ܘܠܺܝ ܒܳܥܶܝܢ ܒܟܽܠܝܽܘܡ ܘܨܳܒܶܝܢ ܠܡܶܕܰܥ ܐܽܘܖ̈ܚܳܬܝ: ܐܰܝܟ ܥܰܡܳܐ ܕܰܥܒܰܕ ܙܰܕܺܝܩܽܘܬܳܐ: ܘܠܳܐ ܫܒܰܩ ܕܺܝܢܳܐ ܕܰܐܠܳܗܶܗ. ܫܳܐܠܺܝܢ ܠܺܝ ܕܺܝܢܳܐ ܘܙܰܕܺܝܩܽܘܬܳܐ: ܨܳܒܶܝܢ ܠܡܶܬܩܰܪܳܒܽܘ ܠܰܐܠܳܗܳܐ.
3 ܠܡܳܢܳܐ ܨܳܡܢ: ܘܠܳܐ ܚܙܰܝܬ ܘܡܰܟܶܟܢ ܢܰܦܫܰܢ: ܘܠܳܐ ܝܺܕܰܥܬ ܗܳܐ ܒܝܰܘܡܳܐ ܕܨܰܘܡܟܽܘܢ ܥܳܒܕܺܝܬܽܘܢ ܨܶܒܝܳܢܰܝ̈ܟܽܘܢ: ܘܰܡܩܰܪܒܺܝܢ ܐ̱ܢܬܽܘܢ ܦܬܰܟܖ̈ܰܝܟܽܘܢ ܟܽܠܗܽܘܢ.
4 ܗܳܐ ܠܚܶܪܝܳܢܳܐ ܘܰܠܡܰܨܽܘܬܳܐ ܨܳܝܡܺܝܬܽܘܢ: ܘܰܠܡܶܡܚܳܐ ܒܰܩܛܺܝܪܳܐ ܕܥܰܘܠܳܐ. ܠܳܐ ܬܨܽܘܡܽܘܢ ܐܰܝܟ: ܕܝܳܘܡܳܢܳܐ: ܘܬܰܫܡܥܽܘܢ ܩܳܠܟܽܘܢ ܒܰܡܪܰܘܡܳܐ.
5 ܗܳܢܰܘ ܨܰܘܡܰܐ ܕܰܓܒܶܝܬ: ܕܢܰܡܶܟ ܐ̱ܢܳܫ ܢܰܦܫܶܗ. ܘܢܶܟܽܘܦ ܨܰܘܪܶܗ ܐܰܝܟ ܟܪܽܘܠܳܐ ܘܣܰܩܳܐ ܘܩܶܛܡܳܐ ܡܳܐܶܟ ܠܶܗ. ܠܗܳܢܳܐ ܬܶܩܪܽܘܢ ܨܰܘܡܳܐ: ܘܝܰܘܡܳܐ ܕܨܶܒܝܳܢܶܗ ܕܡܳܪܝܳܐ.
6 ܗܳܢܰܘ ܨܰܘܡܳܐ ܕܰܓܒܶܝܬ: ܕܬܶܫܪܶܐ ܩܶܛܖ̈ܶܐ ܕܥܰܘܠܳܐ: ܘܰܬܦܰܣܶܩ ܡܶܐܣܰܖ̈ܝܳܬܳܐ ܕܢܶܟܠܳܐ. ܘܬܶܫܪܶܐ ܟܒܺܝ̈ܫܶܐ ܠܚܺܐܪܽܘܬܳܐ ܘܟܽܠܗܶܝܢ ܡܶܐܣܰܖ̈ܝܳܬܳܐ ܬܶܦܣܩܽܘܢ.
7 ܘܬܶܩܨܶܐ ܠܰܚܡܳܟ ܠܟܰܦܢܳܐ. ܘܠܰܐܟܣܢܳܝܳܐ ܬܰܥܶܠ ܠܒܰܝܬܳܟ ܟܰܕ ܬܶܚܙܶܐ ܥܰܪܛܶܠܳܝܳܐ: ܘܰܬܟܰܣܶܝܘܗܝ ܘܠܳܐ ܬܰܗܡܶܐ ܡ̣ܶܢ ܒܰܪ ܒܶܣܪܳܟ.
8 ܗܳܝܕܶܝܢ ܢܶܬܦܬܰܚ ܢܽܘܗܪܳܟ ܐܰܝܟ ܨܰܦܪܳܐ. ܘܙܰܕܺܝܩܽܘܬܳܟ ܒܰܥܓܰܠ ܬܶܕܢܰܚ. ܘܬܺܐܙܰܠ ܩܕܳܡܰܝܟ ܙܰܕܺܝܩܽܘܬܳܟ. ܘܺܐܝܩܳܪܶܗ ܕܡܳܪܝܳܐ ܢܟܰܢܫܳܟ.
9 ܗܳܝܕܶܝܢ ܬܶܩܪܶܐ: ܘܢܶܥܢܶܝܟ ܡܳܪܝܳܐ. ܘܬܶܓܥܶܐ: ܘܢܺܐܡܰܪ ܗܳܐ ܐܶܢܳܐ ܐܶܢ ܬܰܥܒܰܪ ܡ̣ܶܢ ܓܰܘܳܟ ܢܶܟܠܳܐ: ܘܬܶܫܪܶܐ ܠܰܟܒܺܝ̈ܫܶܐ ܘܡ̣ܶܢ ܡܰܡܠܠܳܐ ܕܰܓܳܠܳܐ ܬܰܪܚܶܩ.
10 ܘܬܶܬܶܠ ܠܰܚܡܳܟ ܠܟܰܦܢܳܐ. ܘܰܬܣܰܒܰܥ ܢܰܦܫܳܟ ܕܟܰܦܢܳܐ: ܢܶܕܢܰܚ ܢܽܘܗܪܳܟ ܒܚܶܫܽܘܟܳܐ: ܘܚܶܫܽܘܟܳܐ ܐܰܝܟ ܛܰܗܪܳܐ.
11 ܘܰܢܕܰܒܪܳܟ ܡܳܪܝܳܐ ܐܰܡܺܝܢܳܐܺܝܬ ܘܰܢܣܰܒܰܥ ܢܰܦܫܳܟ ܒܕܽܘܗܳܢܳܐ. ܘܢܰܫܰܪ ܓܰܖ̈ܡܰܝܟ ܘܬܶܗܘܶܐ ܐܰܝܟ ܦܰܪܕܰܝܣܳܐ ܕܰܪܘܶܐ: ܘܰܐܝܟ ܡܰܒܽܘܥܳܐ ܕܡܰܝ̈ܳܐ ܕܠܳܐ ܓܳܝܙܺܝܢ ܡܰܘ̈ܗܝ.
12 ܘܢܶܒܢܽܘܢ ܡܶܢܳܟ ܚܰܖ̈ܒܳܬܳܐ ܕܡ̣ܶܢ ܥܳܠܰܡ. ܘܫܶܬܶܐܣ̈ܶܐ ܕܕܳܪܕܳܖ̈ܺܝܢ ܬܩܺܝܡ ܘܢܶܩܪܽܘܢܳܟ ܣܳܐܶܓ ܬܽܘܖ̈ܥܳܬܳܐ: ܘܡܰܗܦܶܟ ܫܒܺܝ̈ܠܶܐ ܠܝܰܬܒܳܐ.
13 ܐܶܢ ܬܰܗܦܶܟ ܪܶܓܠܳܟ ܡ̣ܶܢ ܫܰܒܬܳܐ: ܕܠܳܐ ܬܶܥܒܶܕ ܨܶܒܝܳܢܳܟ ܒܝܰܘܡܳܐ ܕܩܽܘܕܫܝ. ܘܬܶܩܪܶܐ ܠܫܰܒܬܳܐ ܡܦܰܢܰܩܬܳܐ: ܘܩܽܘܕܫܶܗ ܕܡܳܪܝܳܐ ܡܝܰܩܪܳܐ. ܘܰܬܝܰܩܪܶܝܗ̇ ܕܠܳܐ ܬܶܥܒܶܕ ܒܳܗ̇ ܐܽܘܪܚܳܟ: ܘܠܳܐ ܬܶܥܒܶܕ ܒܳܗ̇ ܨܶܒܝܳܢܳܟ: ܘܠܳܐ ܬܡܰܠܶܠ ܡܶܠܬܳܐ.
14 ܗܳܝܕܶܝܢ ܬܶܬܟܶܠ ܥܰܠ ܡܳܪܝܳܐ. ܕܰܐܪܟܒܳܟ ܥܰܠ ܥܽܘܫܢܳܗ̇ ܕܰܐܪܥܳܐ. ܘܰܐܘܟܠܳܟ ܝܳܪܬܽܘܬܶܗ ܕܝܰܥܩܽܘܒ ܐܰܒܽܘܟ ܡܶܛܽܠ ܕܦܽܘܡܶܗ ܕܡܳܪܝܳܐ ܡܰܠܶܠ.