Isaiah 60
The Book of Isaiah
܀ ܐܫܥܝܐ ܣ ܀
1 ܩܽܘܡܝ ܐܰܢܗܰܪܝ ܡܶܛܽܠ ܕܰܡܛܳܐ ܢܽܘܗܪܶܟܝ. ܘܺܐܝܩܳܪܶܗ ܕܡܳܪܝܳܐ ܥܠܰܝܟܝ ܢܶܕܢܰܚ.
2 ܡܶܛܽܠ ܕܗܳܐ ܚܶܫܽܘܟܳܐ ܡܟܰܣܶܐ ܠܰܐܪܥܳܐ: ܘܥܰܪܦܶܠܳܐ ܠܐܶܡܘ̈ܳܬܳܐ. ܘܰܥܠܰܝܟܝ ܢܶܕܢܰܚ ܡܳܪܝܳܐ. ܘܺܐܝܩܳܪܶܗ ܥܠܰܝܟܝ ܢܶܬܚܙܶܐ.
3 ܘܢܺܐܬܽܘܢ ܥܰܡ̈ܡܶܐ ܠܢܽܘܗܪܶܟܝ: ܘܡܰܠ̈ܟܶܐ ܠܢܽܘܗܪܳܐ ܕܕܶܢܚܶܟܝ.
4 ܐܰܪܺܝܡܝ ܥܰܝܢܰܝ̈ܟܝ ܠܰܚܕܳܖ̈ܰܝܟܝ ܘܰܚܙܳܝ ܕܟܽܠܗܽܘܢ ܡܶܬܟܰܢܫܺܝܢ ܘܳܐܬܶܝܢ ܠܶܟܝ. ܒܢܰܝ̈ܟܝ ܡ̣ܶܢ ܪܽܘܚܩܳܐ ܢܺܐܬܽܘܢ ܘܰܒܢܳܬܶܟܝ ܥܰܠ ܦܶܖ̈ܝܰܘܳܬܳܐ ܢܶܬܖ̈ܰܒܝܳܢ.
5 ܗܳܝܕܶܝܢ ܬܶܚܙܶܝܢ: ܘܬܶܢܗܪܺܝܢ ܘܬܶܚܕܺܝܢ: ܘܰܢܪܘܰܚ ܠܶܒܶܟܝ. ܡܶܛܽܠ ܕܗܳܦܶܟ ܠܶܟܝ ܥܽܘܬܪܶܗ ܕܝܰܡܳܐ. ܘܚܰܝ̈ܠܶܐ ܕܥܰܡ̈ܡܶܐ ܢܺܐܬܽܘܢ ܠܶܟܝ.
6 ܐܰܒܰܠܬܳܐ ܕܓܰܡ̈ܠܶܐ ܬܟܰܣܶܝܟܝ ܒܽܘܟܖ̈ܶܐ ܕܡܶܕܝܰܢ ܘܕܰܐܥܦܳܐ: ܟܽܠܗܽܘܢ ܡ̣ܶܢ ܫܰܒܰܐ ܢܺܐܬܽܘܢ. ܕܰܗܒܳܐ ܘܰܠܒܽܘܢܬܳܐ ܢܶܫܩܠܽܘܢ ܘܬܶܫ̈ܒܚܳܬܶܗ ܕܡܳܪܝܳܐ ܢܣܰܒܪܽܘܢ.
7 ܟܽܠܳܗ̇ ܥܳܢ̈ܳܐ ܕܩܶܕܳܪ ܢܟܰܢܫܽܘܢ ܠܶܟܝ ܘܕܶܟܖ̈ܶܐ ܕܢܰܒܐܽܘܬ ܢܫܰܡܫܽܘܢܶܟܝ. ܘܢܶܣܩܽܘܢ ܠܨܶܒܝܳܢܳܐ ܥܰܠ ܡܰܕܒܰܚܝ ܘܒܰܝܬܳܐ ܕܬܶܫܒܽܘܚܬܝ ܐܶܫܰܒܰܚ.
8 ܡܰܢ ܐܶܢܽܘܢ ܗܳܠܶܝܢ ܕܰܐܝܟ ܥܢܳܢ̈ܶܐ ܦܳܪܚܺܝܢ: ܘܰܐܝܟ ܝܰܘ̈ܢ̈ܶܐ ܠܟܰܘܰܝ̈ܗܶܝܢ.
9 ܡܶܛܽܠ ܕܠܺܝ ܢܣܰܟ̈ܝܳܢ ܓܳܙܖ̈ܳܬܳܐ: ܘܶܐܠܦ̈ܶܐ ܕܬܰܪܫܺܝܫ ܐܰܝܟ ܕܰܒܩܰܕܡܳܝܬܳܐ. ܠܡܰܝܬܳܝܽܘ ܒܢܰܝ̈ܟܝ ܡ̣ܶܢ ܪܽܘܚܩܳܐ: ܘܣܶܐܡܗܽܘܢ ܘܕܰܗܒܗܽܘܢ ܥܰܡܗܽܘܢ: ܠܰܫܡܶܗ ܕܡܳܪܝܳܐ ܐܰܠܳܗܶܟܝ: ܘܩܰܕܺܝܫܳܐ ܕܺܝܣܪܳܐܶܝܠ ܕܫܰܒܚܶܟܝ.
10 ܘܢܶܒܢܽܘܢ ܒܢܰܝ̈ ܢܽܘܟܖ̈ܳܝܶܐ ܫܽܘܖ̈ܰܝܟܝ. ܘܡܰܠܟܰܝ̈ܗܽܘܢ ܢܫܰܡܫܽܘܢܶܟܝ ܡܶܛܽܠ ܕܰܒܪܽܘܓܙܝ ܡܚܺܝܬܶܟܝ. ܘܰܒܨܶܒܝܳܢܝ ܪܰܚܡܶܬ ܥܠܰܝܟܝ.
11 ܢܶܬܦܰܬܚܽܘܢ ܬܰܖ̈ܥܰܝܟܝ ܐܰܡܺܝܢܳܐܺܝܬ: ܒܺܐܝܡܳܡܳܐ ܘܰܒܠܺܠܝܳܐ: ܘܠܳܐ ܢܶܬܬܰܚܕܽܘܢ. ܘܢܶܥܠܽܘܢ ܠܶܟܝ ܚܰܝ̈ܠܶܐ ܕܥܰܡ̈ܡܶܐ: ܘܡܰܠܟܰܝ̈ܗܽܘܢ ܟܰܕ ܕܒܺܝܪܺܝܢ.
12 ܡܶܛܽܠ ܕܥܰܡܳܐ ܘܡܰܠܟܽܘܬܳܐ ܕܠܳܐ ܢܶܦܠܚܽܘܢܶܟܝ: ܢܺܐܒܕܽܘܢ ܘܥܰܡ̈ܡܶܐ ܒܚܰܪܒܳܐ ܢܶܬܚܰܪܒܽܘܢ.
13 ܐܺܝܩܳܪܳܐ ܕܠܶܒܢܳܢ ܢܺܐܬܶܐ ܠܶܟܝ: ܒܪܽܘܬܳܐ ܗܕܺܝܪܬܳܐ ܘܫܰܖ̈ܘܰܝܢܶܐ ܐܰܟܚܕܳܐ: ܠܰܡܫܰܒܳܚܽܘ ܐܰܬܪܳܐ ܕܡܰܩܕܰܫܝ: ܘܠܰܐܬܪܳܐ ܕܖ̈ܶܓܠܰܝ ܐܺܝܩܳܪܝ.
14 ܘܢܺܐܬܽܘܢ ܠܶܟܝ ܟܰܕ ܡܡܰܟܟܺܝܢ ܒܢܰܝ̈ ܡܡܰܟܟܳܢܰܝ̈ܟܝ ܘܢܶܣܓܽܕܽܘܢ ܠܦܰܣ̈ܶܐ ܕܖ̈ܶܓܠܰܝܟܝ ܟܽܠܗܽܘܢ ܡܰܖ̈ܓܙܳܢܰܝܟܝ ܘܢܶܩܪܽܘܢܶܟܝ ܨܶܗܝܽܘܢ ܩܪܺܝܬܶܗ ܕܡܳܪܝܳܐ ܩܰܕܺܝܫܳܐ ܕܺܝܣܪܳܐܶܝܠ.
15 ܚܠܳܦ ܕܰܗܘܰܝܬܝ ܫܒܺܝܩܬܳܐ ܘܰܣܢܺܝܐܬܳܐ ܡ̣ܶܢ ܒܠܰܝ ܕܥܳܒܰܪ: ܐܶܥܒܕܶܟܝ ܐܺܝܩܳܪܳܐ ܠܥܳܠܰܡ: ܘܚܰܕܽܘܬܳܐ ܠܕܳܪܕܳܖ̈ܺܝܢ.
16 ܘܬܶܐܢܩܺܝܢ ܚܰܠܒܳܐ ܕܥܰܡ̈ܡܶܐ ܘܒܶܙܬܳܐ ܕܡܰܠ̈ܟܶܐ ܬܺܐܢܩܺܝܢ. ܘܬܶܕܥܺܝܢ ܕܶܐܢܳܐ ܐ̱ܢܳܐ ܡܳܪܝܳܐ ܦܳܪܽܘܩܶܟܝ: ܘܰܡܦܰܨܝܳܢܶܟܝ ܬܰܩܺܝܦܶܗ ܕܝܰܥܩܽܘܒ.
17 ܚܠܳܦ ܢܚܳܫܳܐ ܐܰܝܬܶܐ ܕܰܗܒܳܐ. ܘܰܚܠܳܦ ܦܰܪܙܠܳܐ ܐܰܝܬܶܐ ܣܺܐܡܳܐ. ܘܰܚܠܳܦ ܩܰܝܣܶܐ ܢܚܳܫܳܐ. ܘܰܚܠܳܦ ܟܺܐܦ̈ܶܐ ܦܰܪܙܠܳܐ. ܘܶܐܥܒܶܕ ܫܠܳܡܳܐ ܦܳܩܽܘܕܰܟܝ: ܘܫܰܠܺܝܛܶܟܝ ܙܰܕܺܝܩܽܘܬܳܐ. ܘܠܳܐ ܢܶܫܬܡܰܥ ܬܽܘܒ ܥܰܘܠܳܐ ܒܰܐܪܥܶܟܝ.
18 ܘܒܶܙܬܳܐ ܘܰܬܒܪܳܐ ܒܰܬܚܽܘܡܰܝ̈ܟܝ ܘܢܶܩܪܽܘܢ ܫܽܘܖ̈ܰܝܟܝ ܦܽܘܪܩܳܢܳܐ: ܘܬܰܖ̈ܥܰܝܟܝ ܬܶܫܒܽܘܚܬܳܐ.
19 ܘܠܳܐ ܢܶܗܘܶܐ ܠܶܟܝ ܬܽܘܒ ܫܶܡܫܳܐ ܠܢܽܘܗܪܳܐ ܕܺܐܝܡܳܡܳܐ. ܘܢܽܘܗܪܶܗ ܕܣܰܗܪܳܐ ܠܳܐ ܢܶܢܗܰܪ ܠܶܟܝ. ܡܶܛܽܠ ܕܢܶܗܘܶܐ ܠܶܟܝ ܡܳܪܝܳܐ ܢܽܘܗܪܳܐ ܠܥܳܠܰܡ.
20 ܘܢܶܫܠܡܽܘܢ ܝܰܘ̈ܡܳܬܳܐ ܕܶܐܒܠܶܟܝ.
21 ܘܟܽܠܶܗ ܥܰܡܶܟܝ ܙܰܕܺܝܩܳܐ ܠܥܳܠܰܡ ܢܺܐܪܬܽܘܢ ܐܰܪܥܳܐ. ܢܽܘܪܒܳܐ ܕܢܶܨܒܶܬ: ܥܒܳܕ ܐܺܝ̈ܕܰܝ ܢܶܫܬܰܒܰܚ.
22 ܙܥܽܘܪܳܐ ܢܶܗܘܶܐ ܒܰܐܠܦ̈ܶܐ: ܘܰܒܨܺܝܪܳܐ ܒܥܰܡܳܐ ܥܰܫܺܝܢܳܐ ܐܶܢܳܐ ܡܳܪܝܳܐ ܠܙܰܒܢܶܗ ܐܶܛܪܺܝܘܗܝ.