Isaiah 16
The Book of Isaiah
܀ ܐܫܥܝܐ ܝܘ ܀
1 ܘܥܰܠ ܫܰܪܟܳܐ ܕܰܐܪܥܳܐ: ܐܶܫܰܕܰܪ ܠܒܰܪ ܫܰܠܺܝܛܳܐ ܕܰܐܪܥܳܐ: ܡ̣ܶܢ ܟܺܐܦܳܐ ܕܡܰܕܒܪܳܐ ܠܛܽܘܪܳܐ ܕܒܰܪܬ ܨܶܗܝܽܘܢ.
2 ܘܢܶܗܘܶܐ ܐܰܝܟ ܦܳܪܰܚܬܳܐ ܕܰܡܫܰܢܝܳܐ ܩܶܢܳܗ̇. ܘܰܒܢܳܬ ܡܽܘܐܳܒ: ܫܒܺܝ̈ܩܳܬܳܐ ܢܶܗܘ̈ܝܳܢ ܒܡܰܥܒܰܪܬܳܐ ܕܰܐܪܢܽܘܢ.
3 ܐܰܝܬܳܝ ܬܰܪܥܺܝܬܳܐ: ܘܰܥܒܶܕܝ ܬܰܘܓܳܢܳܐ. ܣܺܝܡܝ ܐܰܝܟ ܠܺܠܝܳܐ ܛܶܠܳܠܶܟܝ ܡܶܨܥܰܬ ܛܰܗܪܳܐ. ܛܰܫܳܝ ܠܰܕܛܳܥܶܝܢ ܘܰܠܕܰܡܒܰܕܪܺܝܢ ܠܳܐ ܬܶܓܠܶܝܢ.
4 ܢܶܥܡܪܽܘܢ ܒܶܟܝ ܡܒܰܕܖ̈ܶܐ ܕܡܽܘܐܳܒ ܗܘܺܝ ܠܗܽܘܢ ܣܶܬܳܪܳܐ ܡ̣ܶܢ ܩܕܳܡ ܒܳܙܽܘܙܳܐ. ܡܶܛܽܠ ܕܰܓܡܰܪ ܕܰܚܺܝܚܳܐ: ܘܣܳܦ ܒܳܙܽܘܙܳܐ: ܘܰܓܡܰܪ ܕܳܝܽܘܫܳܐ ܡ̣ܶܢ ܐܰܪܥܳܐ.
5 ܘܢܶܬܩܰܢ ܟܽܘܪܣܝܳܐ ܒܛܰܝܒܽܘܬܳܐ. ܘܢܶܬܶܒ ܥܠܰܘܗ̱ܝ ܒܩܽܘܫܬܳܐ ܒܡܰܫܟܢܶܗ ܕܕܰܘܺܝܕ: ܕܰܝܳܢܳܐ ܘܰܡܥܰܩܶܒ ܕܺܝܢܳܐ: ܘܰܡܣܰܪܗܶܒ ܙܰܕܺܝܩܽܘܬܳܐ.
6 ܫܡܰܥܢ ܓܰܐܝܽܘܬܶܗ ܕܡܽܘܐܳܒ: ܕܛܳܒ ܐܶܬܓܰܐܺܝ ܓܰܐܝܽܘܬܶܗ ܘܪܳܡܽܘܬܶܗ ܘܶܐܠܡܶܗ. ܠܳܐ ܗ̱ܘܳܐ ܗܳܟܰܢܳܐ ܒܰܕܶܩܘ ܥܠܰܘܗ̱ܝ ܩܳܨܽܘܡܰܘ̈ܗܝ.
7 ܡܶܛܽܠ ܗܳܢܳܐ ܢܰܝܠܶܠ ܡܽܘܐܳܒ ܘܥܰܠ ܡܽܘܐܳܒ ܟܽܠܶܗ ܢܰܝܠܶܠ: ܥܰܠ ܐܶܫ̈ܝܳܬܳܐ ܕܫܽܘܖ̈ܶܐ ܕܡܶܬܗܰܓ̈ܡܳܢ. ܬܢܰܗܡܽܘܢ ܐܰܝܟ ܟܖ̈ܺܝܗܶܐ.
8 ܡܶܛܽܠ ܕܚܰܩ̈ܠܳܬܳܐ ܕܚܶܫܒܽܘܢ ܚܪܶܒ ܓܦܶܬܳܐ ܕܣܰܒܡܳܐ: ܓܰܢ̱ܒܳܖ̈ܶܐ ܕܥܰܡ̈ܡܶܐ ܓܰܡܘ ܫܰܒܽܘ̈ܩܶܝܗ̇: ܘܰܥܕܰܡܳܐ ܠܝܰܥܙܺܝܪ ܡܛܰܘ ܘܰܛܥܳܘ ܒܡܰܕܒܪܳܐ ܥܢܳܩܶܝ̈ܗ̇ ܢܓܰܕܘ ܘܰܥܒܰܪܘ ܝܰܡܳܐ.
9 ܡܶܛܽܠ ܗܳܢܳܐ ܐܶܒܰܟܶܝܟܝ ܒܰܒܟܳܬܳܐ ܕܝܰܥܙܺܝܪ ܓܦܶܬܳܐ ܕܣܰܒܡܳܐ. ܐܰܪܘܶܝܟܝ ܡ̣ܶܢ ܕܶܡܥܬܶܟܝ ܚܶܫܒܽܘܢ: ܘܰܐܠܥܳܠܳܐ: ܡܶܛܽܠ ܕܥܰܠ ܚܨܰܕܶܟܝ ܘܥܰܠ ܩܛܳܦܶܟܝ ܕܳܝܽܘܫܳܐ ܢܦܰܠ.
10 ܘܬܶܥܒܰܪ ܚܰܕܽܘܬܳܐ ܘܰܕܝܳܨܳܐ ܡ̣ܶܢ ܟܰܪܡܠܳܐ. ܘܰܒܟܪܡܠܳܐ ܠܳܐ ܢܶܚܕܽܘܢ. ܘܠܳܐ ܢܶܥܨܪܽܘܢ ܚܰܡܪܳܐ ܒܡܰܥܨܰܪܬܳܐ. ܘܠܳܐ ܢܕܽܘܫ ܕܳܝܽܘܫܳܐ: ܡܶܛܽܠ ܕܰܠܕܳܝܽܘܫܳܐ ܐܶܒܰܛܶܠ.
11 ܡܶܛܽܠ ܗܳܢܳܐ ܟܰܪܣܝ ܥܰܠ ܡܽܘܐܳܒ: ܐܰܝܟ ܟܶܢܳܪܳܐ ܬܡܰܠܶܠ. ܘܓܳܘܝ ܥܰܠ ܫܽܘܪܳܐ ܕܡܶܬܗܓܶܡ.
12 ܘܡܳܐ ܕܰܚܙܳܐ ܕܰܠܐܺܝ ܡܽܘܐܳܒ ܥܰܠ ܥܳܠܰܘ̈ܳܬܳܐ: ܢܺܐܬܶܐ ܠܡܰܩܕܫܳܐ ܠܰܡܨܰܠܳܝܽܘ: ܘܠܳܐ ܢܶܫܟܰܚ.
13 ܗܳܢܳܐ ܦܶܬܓܳܡܳܐ ܡܰܠܶܠ̣ ܡܳܪܝܳܐ ܥܳܠ ܡܽܘܐܳܒ ܡ̣ܶܢ ܗܳܝܕܶܝܢ.
14 ܘܗܳܫܳܐ ܡܰܠܶܠ̣ ܡܳܪܝܳܐ ܘܶܐܡܰܪ: ܒܰܬܠܳܬ ܫܢܺܝ̈ܢ ܐܰܝܟ ܫܢܰܝ̈ܳܐ ܕܰܐܓܺܝܪܳܐ: ܢܶܨܛܰܥܰܪ ܐܺܝܩܳܪܶܗ ܕܡܽܘܐܳܒ: ܥܰܠ ܣܽܘܓܳܐܐ ܕܥܰܡܶܗ. ܘܢܶܫܬܰܚܰܪ ܩܰܠܺܝܠ ܙܥܽܘܪ: ܘܠܳܐ ܣܰܓܺܝ.