Isaiah 57
The Book of Isaiah
܀ ܐܫܥܝܐ ܢܙ ܀
1 ܗܳܐ ܙܰܕܺܝܩܳܐ ܐܶܒܰܕ. ܘܠܰܝܬ ܐ̱ܢܳܫ ܕܡܰܝܬܶܐ ܥܰܠ ܒܳܠܶܗ. ܘܓܰܒܖ̈ܶܐ ܚܣܰܝ̈ܳܐ ܡܶܬܟܰܢܫܺܝܢ ܕܠܳܐ ܣܽܘܟܳܠܳܐ: ܡܶܛܽܠ ܕܡ̣ܶܢ ܩܕܳܡ ܒܺܝܫܬܳܐ ܡܶܬܟܰܢܰܫ ܙܰܕܺܝܩܳܐ.
2 ܘܢܺܐܬܳܐ ܫܠܳܡܳܐ: ܘܢܶܬܬܢܺܝܚܽܘܢ ܥܰܠ ܡܰܫܟܰܒܗܽܘܢ: ܘܢܺܐܙܽܠ̱ܘܢ ܠܽܘܩܒܰܠܗܽܘܢ.
3 ܘܰܐܢ̱ܬܽܘܢ ܩܪܽܘܒܘ ܠܟܳܐ: ܒܢܰܝ̈ ܡܡܰܟܰܟܬܳܐ: ܙܰܪܥܳܐ ܓܰܝܳܪܳܐ ܘܙܰܢܳܝܳܐ.
4 ܥܰܠ ܡܰܢ ܐܶܬܠܰܥܰܒܬܘܢ ܘܥܰܠ ܡܰܢ ܦܬܰܚܬܽܘܢ ܦܽܘܡܟܽܘܢ: ܘܰܐܘܪܶܟܬܽܘܢ ܠܶܫܳܢܟܽܘܢ. ܕܗܳܐ ܐܰܢ̱ܬܽܘܢ ܝܰܠܕܳܐ ܕܥܰܘܠܳܐ: ܘܙܰܪܥܳܐ ܕܰܓܳܠܳܐ.
5 ܕܡܶܬܒܰܝܰܐܺܝܢ ܒܰܦܬܰܟܖ̈ܶܐ ܬܚܶܝܬ ܟܽܠ ܐܺܝܠܳܢ ܕܥܳܒܳܐ. ܘܰܢܟܰܣܬܽܘܢ ܛܠܳܝ̈ܶܐ ܒܢܰܚ̈ܠܶܐ ܬܚܶܝܬ ܫܩܺܝ̈ܦܶܐ ܕܟܺܐܦܳܐ.
6 ܡܢܳܬܟܶܝ ܘܝܳܪܬܽܘܬܶܟܝ ܥܰܡ ܡܢܳܬܳܐ ܗ̱ܝ ܕܢܰܚ̈ܠܶܐ. ܐܳܦ ܥܠܰܝܗܽܘܢ ܢܰܩܺܝܬܝ ܢܽܘܩܳܝ̈ܶܐ: ܘܰܐܣܶܩܬܝ ܩܽܘܪܒܳܢܳܐ. ܥܰܠ ܗܳܠܶܝܢ ܐܶܬܒܰܝܰܐ.
7 ܥܰܠ ܛܽܘܖ̈ܶܐ ܖ̈ܳܡܶܐ ܘܰܡܫܰܩ̈ܠܶܐ ܥܒܰܕܬܝ ܡܰܫܟܒܶܟܝ. ܐܳܦ ܠܬܰܡܳܢ ܣܠܶܩܬ ܠܡܶܕܒܰܚ ܕܶܒܚ̈ܶܐ.
8 ܘܒܶܣܬܰܪ ܬܰܖ̈ܥܶܐ ܥܰܠ ܦܖ̈ܽܘܣܬܕܶܐ ܪܫܰܡܬܝ ܕܽܘܟܪܳܢܶܟܝ ܡܶܛܽܠ ܕܡ̣ܶܢ ܠܘܳܬܝ ܓܰܠܺܝܬܝ ܘܰܣܠܶܩܬܝ ܘܰܐܪܘܰܚܬܝ ܡܰܫܟܒܶܟܝ. ܘܰܗܘܰܝܬܝ ܠܶܟܝ ܡܶܢܗܽܘܢ. ܘܰܪܚܶܡܬܝ ܡܰܫܟܰܒܗܽܘܢ: ܘܰܐܬܪܳܐ ܚܙܰܝܬܝ.
9 ܘܶܐܫܬܰܒܰܚܬܝ ܠܡܰܠ̈ܟܶܐ ܒܡܶܫܚܳܐ. ܘܰܐܣܓܺܝܬܝ ܒܶܣܡܰܝ̈ܟܝ ܘܫܰܕܰܪܬܝ ܐܺܝܙܓܰܕܰܝ̈ܟܝ ܠܪܽܘܚܩܳܐ. ܘܶܐܬܡܰܟܰܟܬܝ ܥܕܰܡܳܐ ܠܰܫܝܽܘܠ.
10 ܒܣܽܘܓܐܰܬ ܐܽܘܖ̈ܚܳܬܶܟܝ ܠܐܰܝܬܝ ܘܠܳܐ ܐܶܡܰܪܬܝ ܕܶܐܫܠܶܐ. ܒܚܰܘܒܬܳܐ ܕܺܐܝܕܰܝ̈ܟܝ ܐܰܫܚܺܝܬܝ ܡܶܛܽܠ ܗܳܢܳܐ ܠܳܐ ܐܶܬܟܰܫܰܦܬܝ.
11 ܡ̣ܶܢ ܡܰܢ ܐܶܬܪܗܶܒܬܝ ܘܰܕܚܶܠܬܝ. ܕܟܰܕܶܒܬܝ ܒܺܝ. ܘܠܳܐ ܐܶܬܕܟܰܪܬܺܝܢܝ: ܘܠܳܐ ܚܫܰܒܬܺܝܢܝ ܒܠܶܒܶܟܝ ܗܳܐ ܐܶܢܳܐ ܗ̱ܘ ܚܰܣܝܳܐ ܕܡ̣ܶܢ ܥܳܠܰܡ. ܘܡܶܢܝ ܠܳܐ ܕܚܶܠܬܝ.
12 ܐܶܢܳܐ ܐܶܚܳܘܶܐ ܙܰܕܺܝܩܽܘܬܝ ܘܰܥܒܳܕܰܝ̈ܟܝ ܠܳܐ ܢܰܘܬܪܽܘܢܶܟܝ.
13 ܒܰܓܥܳܬܶܟܝ ܢܦܰܨܽܘܢܶܟܝ ܐܰܝܠܶܝܢ ܕܡܶܬܟܰܢܫܺܝܢ ܠܶܟܝ. ܠܟܽܠܗܽܘܢ ܬܶܫܩܽܘܠ ܐܶܢܽܘܢ ܪܽܘܚܳܐ. ܘܬܶܣܰܒ ܐܶܢܽܘܢ ܥܰܠܥܳܠܳܐ ܘܰܐܝܠܶܝܢ ܕܰܡܣܰܒܪܺܝܢ ܒܺܝ: ܢܺܐܪܬܽܘܢ ܐܰܪܥܳܐ: ܘܢܺܐܪܬܽܘܢ ܛܽܘܪܝ ܩܰܕܺܝܫܳܐ.
14 ܘܢܺܐܡܪܽܘܢ ܫܰܦܰܘ ܫܰܦܰܘ: ܦܰܢܰܘ ܐܽܘܪܚܳܐ ܘܰܐܪܺܝܡܘ ܬܽܘܩ̈ܠܳܬܳܐ ܡ̣ܶܢ ܐܽܘܪܚܶܗ ܕܥܰܡܝ.
15 ܡܶܛܽܠ ܕܗܳܟܰܢܳܐ ܐܳܡܰܪ ܡܪܰܝܡܳܐ ܘܰܡܫܰܩܠܳܐ: ܕܰܫܪܶܐ ܠܥܳܠܡܺܝܢ: ܘܩܰܕܺܝܫ ܫܡܶܗ: ܡܪܰܝܡܳܐ: ܘܩܰܕܺܝܫ ܡܰܫܪܝܶܗ: ܠܡܰܟܺܝܟ̈ܶܐ ܘܰܠܥܰܝܝܰܩܰܝ ܪܽܘܚܳܐ: ܠܡܰܚܳܝܽܘ ܪܽܘܚܳܐ ܕܡܰܟܺܝ̈ܟܶܐ: ܘܰܠܡܰܚܳܝܘ ܠܶܒܳܐ ܕܡܰܟܰܐܒ̈ܶܐ.
16 ܡܶܛܽܠ ܕܠܳܐ ܠܥܳܠܰܡ ܐܳܠܶܡ ܐ̱ܢܳܐ. ܘܠܳܐ ܠܥܳܠܰܡ ܪܳܓܶܙ ܐ̱ܢܳܐ. ܡܶܛܽܠ ܕܪܽܘܚܳܐ ܡ̣ܶܢ ܩܕܳܡܝ ܢܳܦܩܳܐ ܘܰܢܫܰܡܬܳܐ ܐܶܢܳܐ ܥܶܒܕܶܬ.
17 ܒܥܰܘܠܳܐ ܕܢܶܟܠܳܗ̇ ܪܶܓܙܶܬ ܘܰܡܚܺܝܬܳܗ̇. ܘܶܐܬܦܰܢܝܰܬ ܘܪܶܓܙܰܬ: ܘܶܐܙܰܠ̱ܬ ܚܢܰܓܬܳܗ̇ ܒܽܐܘܪܚܳܐ ܕܠܶܒܳܗ̇.
18 ܐܽܘܖ̈ܚܳܬܳܗ̇ ܚܙܺܝܬ: ܘܰܐܣܺܝܬܳܗ̇ ܘܒܰܝܰܐܬܳܗ̇ ܘܦܶܪܥܶܬ ܒܽܘܝܳܐܐ ܠܳܗ̇ ܘܠܰܐܒܺܝ̈ܠܶܝܗ̇.
19 ܒܪܶܐ ܡܰܡܠܠܳܐ ܕܣܶܦ̈ܘܳܬܳܐ ܫܠܳܡܳܐ: ܫܠܳܡܳܐ: ܠܖ̈ܰܚܺܝܩܶܐ ܘܰܠܩܰܖ̈ܺܝܒܶܐ: ܐܳܡܰܪ ܡܳܪܝܳܐ ܘܰܐܣܶܐ ܐܶܢܽܘܢ.
20 ܘܖ̈ܰܫܺܝܥܶܐ ܐܰܝܟ ܝܰܡܳܐ ܡܶܬܕܰܠܚܺܝܢ. ܡܶܛܽܠ ܕܫܶܠܝܳܐ ܠܳܐ ܡܶܫܟܚܺܝܢ ܘܗܳܦܟܺܝܢ ܡܰܘ̈ܗܝ ܖ̈ܰܚܫܳܐ ܘܰܣܝܳܢܳܐ. ܠܰܝܬ ܫܠܳܡܳܐ ܠܖ̈ܰܫܺܝܥܶܐ: ܐܳܡܰܪ ܐܰܠܳܗܝ.