Isaiah 32
The Book of Isaiah
܀ ܐܫܥܝܐ ܠܒ ܀
1 ܗܳܐ ܒܙܰܕܺܝܩܽܘܬܳܐ ܡܰܠܟܳܐ. ܘܪܰܘܖ̈ܒܳܢܶܐ ܒܕܺܝܢܳܐ ܢܶܫܬܰܠܛܽܘܢ.
2 ܘܢܶܗܘܶܐ ܓܰܒܪܳܐ ܐܰܝܟ ܓܶܢܝܳܐ ܠܪܽܘܚܳܐ. ܘܰܐܝܟ ܣܶܬܳܪܳܐ ܠܙܳܪܺܝܦܬܳܐ: ܘܰܐܝܟ ܬܰܦܳܐ ܕܡܰܝ̈ܳܐ ܒܨܶܗܝܳܐ: ܘܰܐܝܟ ܛܶܠܳܠܳܐ ܕܟܺܐܦܳܐ ܥܰܫܺܝܢܬܳܐ ܒܰܐܪܥܳܐ ܡܛܰܪܦܬܳܐ.
3 ܘܠܳܐ ܢܶܬܬܫܺܝ̈ܥܳܢ ܥܰܝܢܰܝ̈ܗܽܘܢ ܕܰܐܝܠܶܝܢ ܕܚܳܙܶܝܢ. ܘܶܐܕܢܰܝ̈ܗܽܘܢ ܕܰܐܝܠܶܝܢ ܕܫܳܡܥܺܝܢ: ܢܨܽܘ̈ܬܳܢ.
4 ܘܠܶܒܳܐ ܕܰܣܟܰܠ ܢܶܣܬܰܟܰܠ ܝܺܕܰܥܬܳܐ: ܘܠܶܫܳܢܳܐ ܕܠܰܥܓܳܐ ܢܶܣܬܰܪܗܰܒ ܠܰܡܡܰܠܳܠܘ ܫܠܳܡܳܐ.
5 ܘܠܳܐ ܢܶܩܪܽܘܢ ܬܽܘܒ ܠܫܳܛܝܳܐ ܫܰܠܺܝܛܳܐ. ܐܳܦܠܳܐ ܠܰܣܪܺܝܩܳܐ ܢܶܩܪܽܘܢ ܦܳܪܽܘܩܳܐ.
6 ܡܶܛܽܠ ܕܫܳܛܝܳܐ ܫܳܛܝܽܘܬܳܐ ܡܡܰܠܶܠ ܘܠܶܒܶܗ ܚܳܫܶܠ ܥܰܘܠܳܐ. ܕܢܶܥܒܶܕ ܚܰܠܦܽܘܬܳܐ: ܘܰܢܡܰܠܶܠ ܥܰܠ ܛܳܥܝܽܘܬܳܐ: ܘܰܢܣܰܪܶܩ ܢܰܦܫܳܐ ܕܟܰܦܢܳܐ: ܘܡܰܫܬܝܳܐ ܕܨܶܗܝܳܐ ܢܓܰܝܶܙ.
7 ܒܺܝܫܺܝܢ ܐܶܢܽܘܢ ܡܳܐܢܰܘ̈ܗܝ ܕܰܣܪܺܝܩܳܐ. ܘܗܽܘ ܬܰܪܥܺܝܬܳܐ ܡܶܬܚܰܫܰܒ: ܠܰܡܚܰܒܳܠܘ ܡܶܣܟܺܢ̈ܶܐ ܒܡܶܐܡܪܳܐ ܕܫܽܘܩܪܳܐ: ܘܡܶܠܬܶܗ ܕܒܺܝܫܳܐ ܒܕܺܝܢܳܐ.
8 ܘܪܰܒܳܐ ܪܰܒܽܘܬܳܐ ܡܶܬܪܰܥܶܐ ܘܗܽܘ ܥܰܠ ܪܰܒܽܘܬܳܐ ܢܩܽܘܡ.
9 ܢܶܫ̈ܶܐ ܥܰܬܺܝܖ̈ܳܬܳܐ: ܩܽܘ̈ܡܶܝܢ ܫܡܰܥܶܝ̈ܢ ܩܳܠܝ. ܒܢ̈ܳܬܳܐ ܕܰܡܣܰܒܖ̈ܳܢ: ܨܽܘ̈ܬܶܝܢ ܡܶܠܰܝ̈.
10 ܝܰܘ̈ܡܳܬܳܐ ܕܫܰܢ̱ܬܳܐ ܢܶܖ̈ܓܙܳܢ ܐܰܝܠܶܝܢ ܕܰܡܣܰܒܖ̈ܳܢ. ܡܶܛܽܠ ܕܰܓܡܰܪ ܩܛܳܦܳܐ: ܘܶܐܬܚܡܶܠ: ܘܠܳܐ ܐܶܬܳܐ.
11 ܙܽܘܥܶܝ̈ܢ ܥܰܬܺܝܖ̈ܳܬܳܐ: ܘܰܪܓܰܙܶܝܢ ܐܰܝܠܶܝܢ ܕܰܡܣܰܒܖ̈ܳܢ ܫܠܰܚܶܝ̈ܢ ܥܰܪܛܶܠ: ܡܚܳܝܶܝ̈ܢ ܣܰܩ̈ܶܐ ܒܚܰܨܰܝܟܶܝ̈ܢ.
12 ܘܥܰܠ ܬܕܰܝ̈ܟܶܝܢ ܐܰܖ̈ܩܶܕܶܝܢ: ܥܰܠ ܬܰܕܐܳܐ ܕܚܰܩܠܳܐ: ܘܥܰܠ ܓܦܶܬܳܐ ܕܦܺܐܖ̈ܶܝܗ̇.
13 ܘܥܰܠ ܐܰܪܥܶܗ ܕܥܰܡܝ ܟܽܘ̈ܒܶܐ ܘܝܰܥܪܳܐ ܢܺܐܥܽܘܢ: ܘܰܒܟܽܠܗܽܘܢ ܒ̈ܳܬܶܐ ܕܚܰܕܽܘܬܳܐ: ܘܒܰܩܪܺܝܬܳܐ ܥܰܫܺܝܢܬܳܐ.
14 ܡܶܛܽܠ ܕܢܳܘܣܳܐ ܐܶܬܛܥܺܝ. ܘܚܰܝܠܳܐ ܕܰܩܪܺܝܬܳܐ ܐܶܫܬܒܶܩ. ܘܫܽܘܦܪܗܽܘܢ ܕܒ̈ܳܬܶܐ ܗܘܳܐ ܠܰܡܥܰܖ̈ܶܐ ܥܕܰܡܳܐ ܠܥܳܠܰܡ. ܟܽܘ̈ܒܶܐ ܘܚܰܕܽܘܬܳܐ ܠܰܥܖ̈ܳܕܶܐ: ܘܒܶܝܬ ܪܶܥܝܳܐ ܠܰܓܙܳܖ̈ܶܐ ܕܥܳܢ̈ܳܐ.
15 ܥܕܰܡܳܐ ܕܬܶܬܥܺܝܪ ܥܠܰܝܢ ܪܽܘܚܳܐ ܡ̣ܶܢ ܡܪܰܘܡܳܐ: ܘܢܶܗܘܶܐ ܡܰܘܒܪܳܐ ܐܰܝܟ ܟܰܪܡܠܳܐ: ܘܟܰܪܡܠܳܐ ܐܰܝܟ ܥܳܒܳܐ ܢܶܬܚܫܶܒ.
16 ܘܢܶܫܪܶܐ ܕܺܝܢܳܐ ܒܡܰܕܒܪܳܐ: ܘܙܰܕܺܝܩܽܘܬܳܐ ܒܟܰܪܡܠܳܐ ܬܶܬܺܝܗܶܒ.
17 ܘܢܶܗܘܶܐ ܥܒܳܕܳܗ̇ ܕܙܰܕܺܝܩܽܘܬܳܐ ܫܠܳܡܳܐ: ܘܦܽܘܠܚܳܢܳܗ̇ ܕܙܰܕܺܝܩܽܘܬܳܐ ܫܶܠܝܳܐ: ܘܣܰܒܪܳܐ ܠܥܳܠܰܡ ܥܳܠܡܺܝܢ.
18 ܘܢܶܬܶܒ ܥܰܡܝ ܒܕܰܝܪܳܐ ܕܰܫܠܳܡܳܐ: ܘܰܒܡܰܫܟܢܳܐ ܕܣܰܒܪܳܐ: ܘܒܶܝܬ ܡܰܫܪܝܳܐ ܕܣܰܒܪܳܐ.
19 ܘܒܰܪܕܳܐ ܢܶܚܽܘܬ ܥܰܠ ܥܳܒܳܐ: ܘܰܐܝܟ ܦܩܰܥܬܳܐ ܬܶܬܡܰܟܰܟ ܡܕܺܝܢ̱ܬܳܐ.
20 ܛܽܘܒܰܝܟܽܘܢ ܕܙܳܪܥܺܝܢ ܥܰܠ ܟܽܠ ܡܺܝ̈ܢ: ܟܰܪ ܕܕܰܪܶܟ ܬܰܘܪܳܐ ܘܰܚܡܳܪܳܐ.