Isaiah 55
The Book of Isaiah
܀ ܐܫܥܝܐ ܢܗ ܀
1 ܐܳܘܝ ܟܽܠ ܕܰܨܗܶܝܢ: ܙܶܠܘ ܠܡܰܝ̈ܳܐ: ܕܠܰܝܬ ܠܶܗ ܟܶܣܦܳܐ. ܙܶܠܘ ܡܽܘܪܘ: ܘܰܐܟܽܘܠܘ ܕܠܳܐ ܟܶܣܦܳܐ: ܘܰܕܠܳܐ ܕܡܺܝ̈ܢ: ܚܰܡܪܳܐ ܘܚܰܠܒܳܐ.
2 ܠܡܳܐ ܬܳܩܠܺܝܢ ܐ̱ܢܬܽܘܢ ܟܶܣܦܳܐ ܕܠܳܐ ܠܠܰܚܡܳܐ: ܘܠܶܐܘܰܬܟܽܘܢ ܕܠܳܐ ܠܡܶܣܒܰܥ ܫܽܘܡܥܽܘܢܝ ܡܶܫܡܰܥ: ܘܬܶܐܟܠܽܘܢ ܛܳܒ̈ܳܬܳܐ. ܘܬܶܬܦܰܢܰܩ ܢܰܦܫܟܽܘܢ ܒܕܽܘܗܳܢܳܐ.
3 ܨܠܰܘ ܐܶܕܢܰܝ̈ܟܽܘܢ: ܘܬܰܘ ܠܘܳܬܝ ܫܽܘܡܥܽܘܢܝ ܘܬܶܚܶܐ ܢܰܦܫܟܽܘܢ. ܘܰܐܩܽܝܡ ܠܟܽܘܢ ܩܝܳܡܳܐ ܕܥܳܠܰܡ: ܛܰܝܒܽܘܬܶܗ ܕܕܰܘܺܝܕ ܡܗܰܝܡܰܢܬܳܐ.
4 ܗܳܐ ܣܳܗܕܳܐ ܠܥܰܡ̈ܡܶܐ ܝܰܗܒܬܳܟ: ܫܰܠܺܝܛܳܐ ܘܰܡܕܰܒܪܳܢܳܐ ܠܐܶܡ̈ܘܳܬܳܐ.
5 ܕܬܶܩܪܶܐ ܥܰܡ̈ܡܶܐ ܕܠܳܐ ܝܺܕܰܥܬ. ܘܥܰܡ̈ܡܶܐ ܕܠܳܐ ܝܳܕܥܺܝܢ ܠܳܟ ܠܘܳܬܳܟ ܢܶܪܗܛܽܘܢ. ܡܶܛܽܠ ܡܳܪܝܳܐ ܐܰܠܳܗܳܟ: ܘܩܰܕܺܝܫܳܐ ܕܺܝܣܪܳܐܶܝܠ ܕܫܰܒܚܳܟ.
6 ܒܥܰܘ ܠܡܳܪܝܳܐ. ܘܡܳܐ ܕܶܐܫܟܰܚܬܽܘܢܳܝܗܝ: ܩܪܰܐܗܝ.
7 ܘܡܳܐ ܕܰܩܪܶܒ: ܢܶܫܒܽܘܩ ܚܰܛܳܝܳܐ ܐܽܘܪܚܶܗ: ܘܓܰܒܪܳܐ ܥܳܘܳܠܳܐ ܬܰܪܥܺܝܬܶܗ. ܘܢܶܬܦܢܶܐ ܠܘܳܬܝ: ܘܶܐܪܰܚܶܡ ܥܠܰܘܗ̱ܝ: ܘܰܠܘܳܬ ܐܰܠܳܗܰܢ ܕܡܰܣܓܶܐ ܠܡܶܫܒܰܩ.
8 ܡܶܛܽܠ ܕܬܰܖ̈ܥܝܳܬܝ ܠܳܐ ܗ̱ܘܰܝ̈ ܐܰܝܟ ܬܰܖ̈ܥܝܳܬܟܽܘܢ. ܐܘܖ̈ܚܳܬܝ ܠܳܐ ܗ̱ܘܰܝ̈ ܐܰܝܟ ܐܽܘܖ̈ܚܳܬܟܽܘܢ: ܐܳܡܰܪ ܡܳܪܝܳܐ.
9 ܡܶܛܽܠ ܕܰܐܝܟ ܕܪܳܡܺܝܢ ܫܡܰܝܳܐ ܡ̣ܶܢ ܐܰܪܥܳܐ: ܗܳܟܰܢܳܐ ܖ̈ܳܡܳܢ ܐܽܘܖ̈ܚܳܬܝ ܡ̣ܶܢ ܐܽܘܖ̈ܚܳܬܟܽܘܢ. ܘܬܰܖ̈ܥܝܳܬܝ ܡ̣ܶܢ ܬܰܖ̈ܥܝܳܬܟܽܘܢ.
10 ܡܶܛܽܠ ܕܰܐܝܟܰܢܳܐ ܕܳܢܚܶܬ ܡܶܛܪܳܐ ܘܬܰܠܓܳܐ ܡ̣ܶܢ ܫܡܰܝܳܐ: ܘܰܠܬܰܡܳܢ ܠܳܐ ܗܳܦܶܟ: ܐܶܠܳܐ ܡܰܪܘܶܐ ܠܰܐܪܥܳܐ: ܘܡܰܘܠܶܕ ܠܳܗ̇: ܘܡܰܘܥܶܐ ܠܳܗ̇: ܘܝܳܗܶܒ ܙܰܪܥܳܐ ܠܙܳܪܽܘܥܳܐ: ܘܠܰܚܡܳܐ ܠܡܶܐܟܽܘܠܬܳܐ.
11 ܗܳܟܰܢܳܐ ܢܶܗܘܶܐ ܦܶܬܓܳܡܝ ܕܰܢܦܰܩ ܡ̣ܶܢ ܦܽܘܡܝ: ܘܠܳܐ ܢܶܗܦܽܘܟ ܠܘܳܬܝ ܣܪܺܝܩܳܐܺܝܬ: ܐܶܠܳܐ ܐܶܢ ܥܒܰܕ ܡܶܕܶܡ ܕܨܳܒܐ ܐ̱ܢܳܐ: ܘܫܰܠܶܡ ܕܫܰܕܰܪܬܶܗ.
12 ܡܶܛܽܠ ܕܰܒܚܰܕܽܘܬܳܐ ܬܶܦܩܽܘܢ: ܘܒܰܫܠܳܡܳܐ ܬܺܐܙܽܠ̱ܘܢ ܘܛܽܘܖ̈ܶܐ ܘܖ̈ܳܡܳܬܳܐ ܢܶܬܦܰܨܚܽܘܢ ܩܕܳܡܝܟܽܘܢ. ܘܬܶܫܒܽܘܚܬܳܐ ܕܟܽܠܗܽܘܢ ܐܺܝ̈ܠܳܢܶܐ ܕܚܰܩܠܳܐ ܢܶܩܫܽܘܢ ܟܰܦܳܐ.
13 ܚܠܳܦ ܚܳܓܬܳܐ ܬܺܐܥܶܐ ܒܪܽܘܬܳܐ ܘܰܚܠܳܦ ܨܳܬܪܳܐ ܢܺܐܥܶܐ ܐܳܣܳܐ. ܘܢܶܗܘܶܐ ܠܡܳܪܝܳܐ ܠܰܫܡܳܐ: ܘܠܳܐܬܳܐ ܕܰܠܥܳܠܰܡ ܕܠܳܐ ܓܳܡܪܳܐ.