Isaiah 61
The Book of Isaiah
܀ ܐܫܥܝܐ ܣܐ ܀
1 ܪܽܘܚܶܗ ܕܡܳܪܝܳܐ ܐܰܠܳܗܳܐ ܥܠܰܝ. ܚܠܳܦ ܕܡܰܫܚܰܢܝ ܡܳܪܝܳܐ ܘܫܰܕܰܪܰܢܝ ܕܶܐܣܰܒܰܪ ܠܡܰܟܺܝ̈ܟܶܐ: ܘܶܐܥܨܽܘܒ ܠܰܬܒܺܝܖ̈ܰܝ ܠܶܒܳܐ: ܘܶܐܩܪܶܐ ܚܺܐܪܽܘܬܳܐ ܠܰܫ̈ܒܰܝܳܐ: ܘܰܫܪܳܝܳܐ ܠܰܐܣܺܝܖ̈ܶܐ.
2 ܘܶܐܩܪܶܐ ܫܰܢ̱ܬܳܐ ܕܨܶܒܝܳܢܳܐ ܠܡܳܪܝܳܐ: ܘܝܰܘܡܳܐ ܕܦܽܘܪܩܳܢܳܐ ܠܰܐܠܳܗܰܢ: ܠܰܡܒܰܝܳܐܘ ܠܟܽܠܗܽܘܢ ܐܰܒܺܝ̈ܠܶܐ.
3 ܠܡܶܬܰܠ ܠܰܐܒܺܝ̈ܠܶܐ ܕܨܶܗܝܽܘܢ ܫܽܘܒܚܳܐ: ܚܠܳܦ ܩܶܛܡܳܐ ܡܶܫܚܳܐ ܒܰܣܺܝܡܳܐ: ܘܰܚܠܳܦ ܐܶܒܠܳܐ ܥܛܳܦܳܐ ܕܬܶܫܒܽܘܚܬܳܐ. ܘܰܚܠܳܦ ܪܽܘܚܳܐ ܡܰܟܐܰܒܬܳܐ: ܢܶܬܩܪܽܘܢ ܕܶܟܖ̈ܶܐ ܕܙܰܕܺܝܩܽܘܬܳܐ: ܢܶܨܒܬܶܗ ܕܡܳܪܝܳܐ ܡܫܰܒܰܚܬܳܐ.
4 ܘܢܶܒܢܽܘܢ ܚܰܖ̈ܒܳܬܳܐ ܕܡ̣ܶܢ ܥܳܠܰܡ: ܘܨܰܕ̈ܝܳܬܳܐ ܕܡ̣ܶܢ ܪܺܝܫܺܝܬܳܐ ܢܩܺܝܡܽܘܢ ܘܰܢܚܰܕܬܽܘܢ ܩܽܘܖ̈ܝܳܐ ܚܰܖ̈ܒܳܬܳܐ: ܘܨܰܕ̈ܝܳܬܳܐ ܕܕܳܪܕܳܖ̈ܺܝܢ.
5 ܘܰܢܩܽܘܡܽܘܢ ܢܽܘܟܖ̈ܳܝܶܐ: ܘܢܶܪܥܽܘܢ ܥܳܢ̈ܗܽܘܢ. ܘܰܒܢܰܝ̈ ܢܽܘܟܖ̈ܳܝܶܐ ܢܶܗܘܽܘܢ ܠܗܽܘܢ ܐܰܟܳܖ̈ܶܐ ܘܟܰܖ̈ܡܶܐ.
6 ܘܰܐܢ̱ܬܽܘܢ ܟܽܘܡܖ̈ܰܘܗܝ ܕܡܳܪܝܳܐ ܬܶܬܩܪܽܘܢ. ܘܰܡܫܰܡܫܳܢܰܘ̈ܗܝ ܕܰܐܠܳܗܰܢ ܢܶܬܶܐܡܰܪ ܠܟܽܘܢ. ܢܶܟܣܰܝ̈ܗܽܘܢ ܕܥܰܡ̈ܡܶܐ ܬܶܐܟܠܽܘܢ ܘܒܺܐܝܩܳܪܗܽܘܢ ܬܶܫܬܰܒܚܽܘܢ.
7 ܚܠܳܦ ܒܶܗܬܬܟܽܘܢ: ܘܰܚܠܳܦ ܚܶܦܪܟܽܘܢ: ܝܽܘܪܬܳܢܳܐ ܬܶܢܝܳܢܳܐ ܬܺܐܪܬܽܘܢ ܒܰܐܪܥܗܽܘܢ. ܘܬܶܫܬܰܒܚܽܘܢ ܒܦܳܠܓܽܘܬܗܽܘܢ. ܚܰܕܽܘܬܳܐ ܠܥܳܠܰܡ ܬܶܗܘܶܐ ܠܟܽܘܢ.
8 ܡܶܛܽܠ ܕܶܐܢܳܐ ܐ̱ܢܳܐ ܡܳܪܝܳܐ ܕܪܳܚܶܡ ܐ̱ܢܳܐ ܕܺܝܢܳܐ. ܘܣܳܢܶܐ ܐ̱ܢܳܐ ܚܛܽܘܦܝܳܐ ܘܥܰܘܠܳܐ ܘܶܐܬܶܠ ܥܰܡܠܟܽܘܢ ܒܩܽܘܫܬܳܐ. ܘܰܩܝܳܡܳܐ ܕܥܳܠܰܡ ܐܰܩܺܝܡ ܠܟܽܘܢ.
9 ܘܢܶܬܺܝܕܰܥ ܙܰܪܥܟܽܘܢ ܒܥܰܡ̈ܡܶܐ: ܘܙܰܪܥܳܐ ܕܙܰܪܥܟܽܘܢ ܒܶܐܡ̈ܘܳܬܳܐ. ܟܽܠ ܚܳܙ̈ܝܳܝܟܽܘܢ ܢܶܫܬܰܘܕܥܽܘܢܳܟܽܘܢ: ܕܙܰܪܥܳܐ ܐܰܢ̱ܬܽܘܢ ܕܒܰܪܶܟ ܡܳܪܝܳܐ.
10 ܡܶܬܒܰܣܳܡܽܘ ܐܶܬܒܰܣܰܡ ܒܡܳܪܝܳܐ. ܘܰܬܕܽܘܨ ܢܰܦܫܝ ܒܰܐܠܳܗܝ. ܡܶܛܽܠ ܕܰܐܠܒܶܫܰܢܝ ܠܒܽܘܫܳܐ ܕܦܽܘܪܩܳܢܳܐ: ܘܰܐܥܛܦܰܢܝ ܦܪܺܝܣܳܐ ܕܙܰܕܺܝܩܽܘܬܳܐ: ܐܰܝܟ ܚܰܬܢܳܐ ܫܒܺܝܚܳܐ ܘܰܐܝܟ ܟܰܠܬܳܐ ܡܨܰܒܰܬܬܳܐ.
11 ܘܰܐܝܟ ܐܰܪܥܳܐ ܕܡܰܦܩܳܐ ܥܽܘܦܝܳܐ: ܘܰܐܝܟ ܓܰܢܬܳܐ ܕܡܰܘܥܝܳܐ ܙܰܪܥܳܐ: ܗܳܟܰܢܳܐ ܢܰܘܥܶܐ ܡܳܪܝܳܐ ܐܰܠܳܗܳܐ ܙܰܕܺܝܩܽܘܬܳܐ: ܘܬܶܫܒܽܘܚܬܳܐ ܩܕܳܡ ܟܽܠܗܽܘܢ ܥܰܡ̈ܡܶܐ.