Isaiah 19
The Book of Isaiah
܀ ܐܫܥܝܐ ܝܛ ܀
1 ܡܰܫܩܠܳܐ ܕܡܶܨܪܶܝܢ. ܗܳܐ ܡܳܪܝܳܐ ܪܟܺܝܒ ܥܰܠ ܥܢܳܢ̈ܶܐ ܩܰܠܺܝܠܬܳܐ: ܘܥܳܐܶܠ ܠܡܶܨܪܶܝܢ. ܘܰܢܙܽܘܥܽܘܢ ܦܬܰܟܖ̈ܶܐ ܕܡܶܨܪܶܝܢ ܡ̣ܶܢ ܩܕܳܡܰܘܗܝ. ܘܠܶܒܶܗ ܕܡܶܨܪܳܝܳܐ ܢܶܬܡܣܶܐ ܒܓܰܘܶܗ.
2 ܘܰܐܓܰܪܳܐ ܡܶܨܪܳܝܳܐ ܒܡܶܨܪܳܝܳܐ. ܘܢܶܬܟܰܬܰܫ ܓܰܒܪܳܐ ܥܰܡ ܐܰܚܽܘܗܝ: ܘܓܰܒܪܳܐ ܥܰܡ ܚܰܒܪܶܗ: ܡܕܺܝܢ̱ܬܳܐ ܥܰܡ ܡܕܺܝܢ̱ܬܳܐ: ܘܡܰܠܟܽܘܬܳܐ ܥܰܡ ܡܰܠܟܽܘܬܳܐ.
3 ܘܬܶܬܦܣܶܩ ܪܽܘܚܶܗ ܕܡܶܨܪܳܝܳܐ ܒܓܰܘܶܗ: ܘܬܰܪܥܺܝܬܶܗ ܐܶܛܰܒܰܥ. ܘܢܶܫ̱ܐܠܽܘܢ ܡ̣ܶܢ ܦܬܰܟܖ̈ܶܐ ܘܡ̣ܶܢ ܡܓܽܘ̈ܫܶܐ: ܘܡ̣ܶܢ ܙܰܟܽܘܖ̈ܶܐ ܘܡ̣ܶܢ ܝܰܕܽܘ̈ܥܶܐ.
4 ܘܰܐܫܠܶܡ ܠܡܶܨܖ̈ܳܝܶܐ ܒܺܐܝܕܳܐ ܕܡܳܖ̈ܰܝܳܐ ܩܫܰܝ̈ܳܐ. ܘܡܰܠܟܳܐ ܥܰܫܺܝܢܳܐ ܢܶܫܬܰܠܰܛ ܒܗܽܘܢ: ܐܳܡܰܪ ܡܳܪܝܳܐ ܚܰܝܠܬܳܢܳܐ.
5 ܘܰܢܓܽܘܙܽܘܢ ܡܰܝ̈ܳܐ ܡ̣ܶܢ ܝܰܡܳܐ. ܘܢܰܗܪܳܐ ܢܶܚܪܰܒ ܘܢܺܐܒܰܫ.
6 ܘܰܢܓܽܘܙܽܘܢ ܢܰܗܖ̈ܰܘܳܬܳܐ: ܘܢܶܬܡܰܣܟܢܽܘܢ. ܘܢܶܚܪܒܽܘܢ ܢܰܗܖ̈ܰܘܳܬܳܐ ܥܰܫܺܝ̈ܢܶܐ. ܩܰܢܝܳܐ ܘܰܐܪܒܳܢܳܐ ܘܦܳܦܳܪܽܘܢ ܢܺܐܒܫܽܘܢ.
7 ܘܠܽܘܥܳܐ ܕܥܰܠ ܢܰܗܪܳܐ: ܘܥܰܠ ܦܽܘܡܶܗ ܕܢܰܗܪܳܐ: ܘܟܽܠ ܕܡܶܙܕܪܰܥ ܥܰܠ ܓܰܒܶܗ ܕܢܰܗܪܳܐ ܢܺܐܒܰܫ. ܘܢܶܫܬܩܶܦ ܘܠܳܐ ܢܶܫܬܟܰܚ.
8 ܘܢܶܐܠܽܘܢ ܨܰܝܳܕ̈ܶܐ. ܘܢܶܬܒܽܘܢ ܒܶܐܒܠܳܐ ܕܪܳܡܶܝܢ ܨܶܢܳܖ̈ܝܳܬܳܐ ܒܢܰܗܪܳܐ. ܘܰܕܦܰܪܣܺܝܢ ܡܨܺܝ̈ܕܳܬܳܐ ܥܰܠ ܐܰܦܰܝ̈ ܡܰܝ̈ܳܐ ܐܶܬܟܪܰܗܘ.
9 ܘܢܶܒܗܬܽܘܢ ܥܳܒܕܰܝ ܟܶܬܳܢܳܐ: ܕܣܳܪܩܺܝܢ ܘܙܳܩܪܺܝܢ ܠܚܰܕܽܘܬܳܐ.
10 ܘܢܶܬܡܰܟܟܽܘܢ ܟܽܠ ܕܥܳܒܕܺܝܢ ܫܰܟܪܳܐ: ܠܡܰܫܬܝܳܐ ܕܢܰܦܫܳܐ.
11 ܫܛܳܘ ܪܰܘܖ̈ܒܢܶܐ ܕܨܳܥܳܢ: ܘܚܰܟܺܝܡܶܐ ܕܡܳܠܟܺܝܢ ܠܦܶܪܥܽܘܢ ܡܰܠܟܳܐ ܡܶܠ̈ܟܶܐ ܫܳܛܰܝ̈ܳܐ. ܐܰܝܟܰܢܳܐ ܬܶܐܡܪܽܘܢ ܠܦܶܪܥܽܘܢ ܕܚܰܟܺܝܡܶܐ ܚܢܰܢ: ܘܰܒܢܰܝ̈ ܡܰܠ̈ܟܶܐ ܩܰܕܡܳܝ̈ܶܐ.
12 ܐܰܝܟܳܐ ܐܶܢܽܘܢ ܚܰܟܺܝܡܰܝ̈ܟ: ܢܚܰܘܢܳܟ: ܘܢܶܕܥܽܘܢ ܡܳܢܳܐ ܐܶܬܪܰܥܺܝ ܡܳܪܝܳܐ ܚܰܝܠܬܳܢܳܐ ܥܰܠ ܡܶܨܪܶܝܢ.
13 ܫܛܳܘ ܪܰܘܖ̈ܒܢܶܐ ܕܨܳܥܳܢ. ܐܶܬܬܪܺܝܡܘ ܪܰܘܖ̈ܒܢܶܐ ܕܡܰܦܰܣ: ܘܰܐܛܥܺܝܘ ܠܡܶܨܪܶܝܢ ܒܙܳܘ̈ܝܳܬܳܐ ܕܫܰܖ̈ܒܳܬܳܗ̇.
14 ܡܳܪܝܳܐ ܡܙܰܓ ܒܓܰܘܳܗ̇ ܪܽܘܚܳܐ ܛܳܥܺܝܬܳܐ: ܘܰܐܛܥܶܝܗ ܠܡܶܨܪܳܝܳܐ ܒܟܽܠܗܽܘܢ ܥܒܳܕܰܘ̈ܗܝ: ܐܰܝܟ ܕܛܳܥܶܐ ܪܳܘܝܳܐ ܒܰܬܝܳܒܬܶܗ.
15 ܘܠܳܐ ܢܶܗܘܶܐ ܠܡܶܨܪܳܝܳܐ ܓܰܒܪܳܐ ܕܢܶܥܒܶܕ ܪܺܝܫܳܐ ܘܕܽܘܢܒܬܳܐ: ܘܕܽܘܢܒܬܳܐ ܘܪܺܝܫܳܐ.
16 ܒܝܰܘܡܳܐ ܗܰܘ: ܢܶܗܘܶܐ ܡܶܨܪܳܝܳܐ ܐܰܝܟ ܢܶܫ̈ܶܐ. ܘܢܶܕܚܰܠ ܘܰܢܙܽܘܥ ܡ̣ܶܢ ܩܕܳܡ ܪܰܘܡܳܐ ܕܺܐܝܕܶܗ ܕܡܳܪܝܳܐ ܚܰܝܠܬܳܢܳܐ ܕܰܡܪܺܝܡ ܥܠܰܘܗ̱ܝ.
17 ܘܬܶܗܘܶܐ ܐܰܪܥܳܐ ܕܺܝܗܽܘܕܳܐ ܠܡܶܨܪܳܝܳܐ ܠܣܽܘܪܳܕܳܐ. ܘܟܽܠ ܕܢܰܕܟܪܺܝܗ̇ ܠܶܗ: ܢܶܬܪܗܶܒ: ܡ̣ܶܢ ܩܕܳܡ ܬܰܪܥܺܝܬܶܗ ܕܡܳܪܝܳܐ ܚܰܝܠܬܳܢܳܐ ܕܶܐܬܪܰܥܺܝ ܥܠܰܘܗ̱ܝ.
18 ܒܝܰܘܡܳܐ ܗܰܘ: ܢܶܗܘ̈ܝܳܢ ܚܰܡܶܫ ܩܽܘܖ̈ܝܳܐ ܒܰܐܪܥܳܐ ܕܡܶܨܪܶܝܢ: ܕܰܡܡܰܠ̈ܠܳܢ ܒܠܶܫܳܢܳܐ ܟܢܰܥܢܳܝܳܐ. ܘܝܳܡ̈ܝܳܢ ܒܡܳܪܝܳܐ ܚܰܝܠܬܳܢܳܐ. ܘܰܚܕܳܐ ܡܶܢܗܶܝܢ ܗܰܪܶܣ ܬܶܬܩܪܶܐ.
19 ܒܝܰܘܡܳܐ ܗܰܘ: ܢܶܗܘܶܐ ܡܰܕܒܚܳܐ ܠܡܳܪܝܳܐ ܚܰܝܠܬܳܢܳܐ ܒܓܰܘܳܗ̇ ܕܰܐܪܥܳܐ ܕܡܶܨܪܶܝܢ: ܘܩܳܝܳܡܬܳܐ ܠܡܳܪܝܳܐ ܥܰܠ ܓܶܢ̱ܒ ܬܚܽܘܡܶܝܗ̇.
20 ܘܬܶܗܘܶܐ ܠܳܐܬܳܐ ܘܰܠܣܳܗܕܽܘܬܳܐ ܠܡܳܪܝܳܐ ܚܰܝܠܬܳܢܳܐ ܒܰܐܪܥܳܐ ܕܡܶܨܪܶܝܢ: ܡܶܛܽܠ ܕܢܶܓܥܽܘܢ ܩܕܳܡ ܡܳܪܝܳܐ ܡ̣ܶܢ ܩܕܳܡ ܐܳܠܽܘܨܳܐ. ܘܰܢܫܰܕܰܪ ܠܗܽܘܢ ܦܳܪܽܘܩܳܐ: ܘܕܰܝܳܢܳܐ: ܘܰܢܦܰܨܶܐ ܐܶܢܽܘܢ.
21 ܘܢܶܬܺܝܕܰܥ ܡܳܪܝܳܐ ܠܡܶܨܖ̈ܳܝܶܐ: ܘܢܶܕܥܽܘܢܶܗ ܡܶܨܖ̈ܳܝܶܐ ܠܡܳܪܝܳܐ ܒܝܰܘܡܳܐ ܗܰܘ. ܘܰܢܩܰܪܒܽܘܢ ܕܶܒܚ̈ܶܐ ܘܰܣܡܺܝܕܳܐ. ܘܢܶܕܪܽܘܢ ܢܶܕܖ̈ܶܐ ܠܡܳܪܝܳܐ: ܘܰܢܫܰܠܡܽܘܢ.
22 ܘܢܶܡܚܶܐ ܡܳܪܝܳܐ ܠܡܶܨܖ̈ܳܝܶܐ ܡܚܽܘܬܳܐ: ܘܢܰܐܣܶܐ ܐܶܢܽܘܢ. ܘܢܶܬܦܢܽܘܢ ܠܘܳܬ ܡܳܪܝܳܐ: ܘܢܶܥܢܶܐ ܐܶܢܽܘܢ: ܘܢܰܐܣܶܐ ܐܶܢܽܘܢ.
23 ܒܝܰܘܡܳܐ ܗܰܘ: ܢܶܗܘܶܐ ܫܒܺܝܥܳܐ ܡ̣ܶܢ ܡܶܨܪܶܝܢ ܐܳܬܽܘܪ: ܘܡ̣ܶܢ ܐܳܬܽܘܪ ܠܡܶܨܪܶܝܢ. ܘܢܶܥܽܘܠ ܐܳܬܽܘܪܳܝܳܐ ܠܡܶܨܪܶܝܢ: ܘܡܶܨܪܳܝܳܐ ܠܐܳܬܽܘܪ. ܘܢܶܦܠܚܽܘܢ ܡܶܨܖ̈ܳܝܶܐ ܠܐܳܬܽܘܪܳܝܳܐ.
24 ܒܝܰܘܡܳܐ ܗܰܘ ܢܶܗܘܶܐ ܝܺܣܪܳܐܶܝܠ ܚܰܕ ܡ̣ܶܢ ܬܠܳܬܳܐ: ܠܡܶܨܖ̈ܳܝܶܐ ܘܠܳܐܬܽܘܖ̈ܳܝܶܐ ܒܽܘܪܟܬܳܐ ܒܓܰܘ ܐܰܪܥܳܐ.
25 ܕܠܶܗ ܒܰܪܶܟ ܡܳܪܝܳܐ ܚܰܝܠܬܳܢܳܐ: ܘܶܐܡܰܪ ܒܪܺܝܟ ܥܰܡܝ ܕܰܒܡܶܨܪܶܝܢ: ܘܰܥܒܳܕ ܐܺܝ̈ܕܰܝ ܕܒܳܐܬܽܘܪ. ܘܝܽܘܪܬܳܢܝ ܝܺܣܪܳܐܶܝܠ.