Psalms 10
The Book of Psalms
܀ ܡܙܡܘܪܐ ܝ ܀
ܥܰܠ ܥܰܬܺܝܖ̈ܶ ܕܰܒܥܰܡܳܐ ܕܡܰܥܘܠܺܝܢ ܗܘܰܘ ܒܡܶܣܟܺܢ̈ܶܐ ܕܒܰܝܢܳܬܗܽܘܢ
1 ܠܡܳܢܳܐ ܡܳܪܝܳܐ ܩܳܡܬ ܒܪܽܘܚܩܳܐ. ܘܰܐܗܡܺܝܬ ܚܝܳܪܳܟ ܒܙܰܒ̈ܢܶܐ ܕܽܐܘܠܨܳܢܳܐ.
2 ܒܫܽܘܒܗܳܪܶܗ ܕܪܰܫܺܝܥܳܐ ܝܳܩܶܕ ܡܶܣܟܺܢܳܐ. ܢܶܬܬܰܚܕܽܘܢ ܒܬܰܪܥܺܝܬܳܐ ܗܳܝ ܕܶܐܬܚܰܫܰܒܘ̱.
3 ܡܶܛܽܠ ܕܡܶܫܬܰܒܗܰܪ ܪܰܫܺܝܥܳܐ ܒܰܖ̈ܓܺܝܓܳܬܳܐ ܕܢܰܦܫܶܗ. ܥܰܘܳܠܳܐ ܡܶܬܒܰܪܰܟ ܘܪܳܓܶܙ ܡܳܪܝܳܐ.
4 ܘܪܰܫܺܝܥܳܐ ܒܪܳܡܽܘܬܶܗ ܠܳܐ ܡܥܰܩܶܒ. ܘܠܰܝܬ ܐܰܠܳܗܳܐ ܒܟܽܠܗܶܝܢ ܬܰܖ̈ܥܝܳܬܶܗ.
5 ܘܫܰܖ̈ܝܳܢ ܐܽܘܖ̈ܚܳܬܶܗ ܒܟܽܠܙܒܰܢ. ܘܰܡܥܰܠܰܝ ܕܺܝܢܳܟ ܡܶܢ ܠܩܽܘܒܠܶܗ. ܘܰܠܟܽܠܗܽܘܢ ܒܥܶܠܕ̈ܒܳܒܰܘܗ̱ܝ ܫܳܐܶܛ.
6 ܐܳܡܰܪ ܒܠܶܒܶܗ ܕܠܳܐ ܐܶܙܽܘܥ ܠܕܳܪܕܳܖ̈ܺܝܢ. ܪܳܢܶܐ ܒܺܝܫܬܳܐ.
7 ܘܠܰܘܛܬܳܐ ܡܠܶܐ ܦܽܘܡܶܗ ܬܽܘܟܳܐ ܘܢܶܟܠܳܐ. ܬܚܶܝܬ ܠܶܫܳܢܶܗ ܥܰܘܠܳܐ ܘܥܶܬܳܐ.
8 ܝܳܬܶܒ ܒܰܟܡܺܐܢܳܐ ܒܕܰܝܪܳܐ. ܘܰܒܛܽܘܫܝܳܐ ܩܳܛܶܠ ܠܙܰܕܺܝܩܳܐ. ܥܰܝܢܰܘ̈ܗܝ̱ ܠܒܳܝ̈ܫܶܐ ܕܳܝ̈ܩܳܢ.
9 ܘܟܳܡܶܢ ܠܡܶܚܛܰܦ ܠܡܶܣܟܺܢܳܐ ܒܢܶܓܕܳܐ ܕܰܡܨܺܝܕܬܶܗ.
10 ܗܽܘ ܢܶܬܡܰܟܰܟ ܘܢܶܦܶܠ. ܘܰܒܓܰܖ̈ܡܰܘܗ̱ܝ ܟܽܘܖ̈ܗܳܢܶܐ ܘܟܺܐܒ̈ܶܐ.
11 ܐܳܡܰܪ ܒܠܶܒܶܗ ܕܰܛܥܳܐ ܐܰܠܳܗܳܐ. ܘܰܐܦܢܺܝ ܐܰܦܰܘ̈ܗܝ ܘܠܳܐ ܚܳܙܶܐ ܠܥܳܠܰܡ.
12 ܩܽܘܡ ܡܳܪܝܳܐ ܐܰܠܳܗܝ ܘܰܐܪܺܝܡ ܐܺܝܕܳܟ. ܘܠܳܐ ܬܶܛܥܶܝܘܗ̱ܝ ܠܒܳܝܫܳܐ.
13 ܠܡܳܢܳܐ ܐܰܪܓܶܙ ܚܰܛܳܝܳܐ ܠܰܐܠܳܗܳܐ. ܘܳܐܡܰܪ ܒܠܶܒܶܗ ܕܠܳܐ ܬܳܒܰܥ.
14 ܚܳܙܶܐ ܐܰܢ̱ܬ ܕܺܐܝܬ ܥܰܘܠܳܐ ܘܪܽܘܓܙܳܐ. ܘܚܳܐܰܪ ܐܰܢ̱ܬ ܕܢܶܫܬܠܶܡ ܒܺܐܝ̈ܕܰܝܟ. ܥܠܰܝܟ ܢܶܫܬܒܶܩ ܒܳܝܫܳܐ. ܘܰܕܝܰܬܡܳܐ ܐܰܢ̱ܬ ܗܽܘ ܥܳܕܽܘܪܶܗ.
15 ܬܰܒܰܪ ܕܪܳܥܶܗ ܕܚܰܛܳܝܳܐ ܘܰܕܒܺܝܫܳܐ ܬܶܬܒܥܶܗ ܚܛܺܝܬܶܗ ܘܠܳܐ ܬܶܫܬܟܰܚ.
16 ܡܳܪܝܳܐ ܡܰܠܟܰܐ ܗ̱ܘ ܠܥܳܠܰܡ ܥܳܠܡܺܝܢ. ܐܶܒܰܕܘ ܥܰܡ̈ܡܶܐ ܡܶܢ ܐܰܪܥܶܗ.
17 ܣܰܒܪܳܐ ܕܡܶܣ̈ܟܺܢܶܐ ܫܳܡܰܥ ܐܰܢ̱ܬ ܡܳܪܝܳܐ. ܘܛܽܘܝܳܒܳܐ ܕܠܶܒܗܽܘܢ ܬܨܽܘܬ ܐܶܕܢܳܟ.
18 ܠܰܡܕܳܢ ܠܝܰܬܡ̈ܶܐ ܘܰܠܒܳܝ̈ܫܶܐ. ܕܠܳܐ ܢܰܘܣܶܦ ܬܽܘܒ ܠܡܰܘܒܳܕܽܘ ܒܢܰܝ̈ܢܳܫܳܐ ܡܶܢ ܐܰܪܥܳܐ.