Psalms 69
The Book of Psalms
܀ ܡܙܡܘܪܐ ܣܛ ܀
ܡܶܫܬܰܥܶܐ ܡܶܢ ܦܰܪܨܽܘܦ ܡܰܩܒܳܝ̈ܶܐ. ܥܰܠ ܪܰܒܽܘܬܳܐ ܕܽܐܘܠܨܳܢܰܝ̈ܗܽܘܢ ܕܒܰܩܖ̈ܳܒܶܐ ܘܥܰܠ ܢܶܟ̈ܠܶܐ ܕܡܶܢ ܩܰܖ̈ܺܝܒܰܝܗܽܘܢ ܕܡܶܬܝܰܐܒܺܝܢ ܠܰܬܒܰܥܬܳܐ ܕܡܶܢܗܽܘܢ
1 ܦܪܽܘܩܰܝܢܝ̱ ܐܰܠܳܗܳܐ ܡܶܛܽܠ ܕܰܡܛܰܘ ܡܰܝ̈ܳܐ ܥܕܰܡܳܐ ܠܢܰܦܫܳܐ.
2 ܛܶܒܥܶܬ ܒܗܰܘܬܳܐ ܥܰܡܺܝܩܬܳܐ ܘܠܰܝܬ ܒܳܗ̇ ܒܶܝܬ ܩܝܳܡܳܐ. ܥܶܠܶܬ ܠܥܽܘܡܩܳܐ ܕܡܰܝ̈ܳܐ ܘܨܳܡܰܪܬܳܐ ܛܰܒܰܥܬܰܢܝ̱.
3 ܠܺܐܝܬ ܒܩܶܪܺܝܝ̱ ܘܚܶܪܰܬ ܓܰܓܰܪܬܝ̱. ܓܳܙ̈ܝ̱ ܥܰܝ̈ܢܰܝ ܟܰܕ ܡܣܰܟܶܐ ܐ̱ܢܳܐ ܠܰܐܠܳܗܝ̱.
4 ܣܓܺܝܘ ܡܶܢ ܣܰܥܪܳܐ ܕܪܺܝܫܝ̱ ܒܥܶܠܕ̈ܒܳܒܰܝ ܕܡܰܓܳܢ. ܘܰܥܫܶܢܘ ܡܶܢ ܓܰܖ̈ܡܰܝ ܒܥܶܠܕ̈ܒܳܒܰܝ ܕܫܽܘܩܪܳܐ. ܡܶܕܶܡ ܕܠܳܐ ܛܶܠܡܶܬ ܡܦܰܢܶܐ ܗ̱ܘܺܝܬ.
5 ܐܰܠܳܗܳܐ ܐܰܢ̱ܬ ܝܳܕܰܥ ܐܰܢ̱ܬ ܣܰܟ̈ܠܘܳܬܝ̱. ܘܰܚܛܳܗܰܝ̈ ܡܶܢܳܟ ܠܳܐ ܐܶܬܟܰܣܺܝܘ.
6 ܠܳܐ ܢܶܒܗܬܽܘܢ ܒܺܝ ܐܰܝܠܶܝܢ ܕܰܡܣܰܒܪܺܝܢ ܒܳܟ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ. ܘܠܳܐ ܢܰܚܦܪܽܘܢ ܒܺܝ ܐܰܝܠܶܝܢ ܕܒܳܥܶܝܢ ܠܳܟ ܐܰܠܳܗܶܗ ܕܺܝܣܪܳܐܶܝܠ.
7 ܡܶܛܽܠܳܬܳܟ ܩܰܒܠܶܬ ܚܶܣܕܳܐ. ܘܟܰܣܝܰܬ ܒܶܗܬܬܳܐ ܠܰܐܦܰܝ̈.
8 ܘܢܽܘܟܪܳܝܳܐ ܗܘܺܝܬ ܠܰܐܚܰܝ̈ ܘܰܐܟܣܢܳܝܳܐ ܠܰܒ̈ܢܰܝ ܐܶܡܝ̱.
9 ܡܶܛܽܠ ܕܰܛܢܳܢܶܗ ܕܒܰܝܬܳܟ ܐܰܟܠܰܢܝ̱. ܘܚܶܣܕܳܐ ܕܰܡܚܰܣ̈ܕܳܢܰܝܟ ܢܦܰܠ ܥܠܰܝ.
10 ܡܰܟܟܶܬ ܢܰܦܫܝ̱ ܒܨܰܘܡܳܐ. ܘܰܗܘܺܝܬ ܠܗܽܘܢ ܠܚܶܣܕܳܐ.
11 ܥܶܒܕܶܬ ܠܒܽܘܫܝ̱ ܣܰܩܳܐ. ܘܰܗܘܺܝܬ ܠܗܽܘܢ ܠܡܰܬܠܳܐ.
12 ܘܰܪܢܰܘ ܒܺܝ ܐܰܝܠܶܝܢ ܕܝܳܬܒܺܝܢ ܒܬܰܪܥܳܐ. ܘܰܪܢܰܘ ܒܺܝ ܐܰܝܠܶܝܢ ܕܫܳܬܶܝܢ ܫܰܟܪܳܐ.
13 ܘܶܐܢܳܐ ܨܰܠܺܝܬ ܩܕܳܡܰܝܟ ܡܳܪܝܳܐ ܒܙܰܒܢܳܐ ܡܩܰܒܠܳܐ. ܐܰܠܳܗܳܐ ܒܣܽܘܓܳܐܐ ܕܛܰܝܒܽܘܬܳܟ ܥܢܺܝܢܝ̱. ܘܰܒܣܽܘܓܳܐܐ ܕܦܽܘܪܩܳܢܳܟ ܦܰܨܳܢܝ̱.
14 ܡܶܢ ܣܝܳܢܳܐ ܕܠܳܐ ܐܶܛܒܰܥ. ܘܶܐܬܦܰܨܶܐ ܡܶܢ ܣܳܢ̈ܰܐܝ ܘܡܶܢ ܥܽܘܡܩܳܐ ܕܡܰܝ̈ܳܐ.
15 ܕܠܳܐ ܬܛܰܒܥܰܢܝ̱ ܨܳܡܰܪܬܳܐ ܕܡܰܝ̈ܳܐ. ܘܠܳܐ ܬܶܒܠܥܰܢܝ̱ ܗܰܘܬܳܐ. ܘܠܳܐ ܬܶܐܚܽܘܕ ܥܠܰܝ ܒܺܪܳܐ ܦܽܘܡܳܗ̇.
16 ܥܢܺܝܢܝ̱ ܡܳܪܝܳܐ ܡܶܛܽܠ ܕܛܳܒܳܐ ܗ̱ܝ ܛܰܝܒܽܘܬܳܟ. ܘܰܒܣܽܘܓܳܐܐ ܕܖ̈ܰܚܡܰܝܟ ܐܶܬܦܰܢ ܥܠܰܝ.
17 ܘܠܳܐ ܬܰܗܦܶܟ ܐܰܦܰܝ̈ܟ ܡܶܢ ܥܰܒܕܳܟ. ܡܶܛܽܠ ܕܥܳܩܰܬ ܠܺܝ ܒܰܥܓܰܠ ܥܢܺܝܢܝ̱.
18 ܩܰܪܶܒ ܢܰܦܫܝ̱ ܠܦܽܘܪܩܳܢܳܟ. ܡܶܛܽܠ ܒܥܶܠܕ̈ܒܳܒܰܝ ܦܪܽܘܩܰܝܢܝ̱.
19 ܐܰܢ̱ܬ ܝܳܕܰܥ ܐܰܢ̱ܬ ܚܶܣܕܝ̱. ܘܒܶܗܬܰܬܝ̱ ܠܽܘܩܒܰܠ ܟܽܠܗܽܘܢ ܒܥܶܠܕ̈ܒܳܒܰܝ.
20 ܐܰܣܳܐ ܬܒܳܪܶܗ ܕܠܶܒܝ ܘܰܥܨܽܘܒ. ܣܰܟܺܝܬ ܠܡܰܢ ܕܬܶܟܪܶܐ ܠܶܗ ܘܠܰܝܬ. ܘܠܰܡܒܰܝܐܳܢܳܐ ܘܠܳܐ ܐܶܫܟܚܶܬ.
21 ܝܰܗܒܘ ܒܡܶܐܟܽܘܠܬܝ̱ ܡܖ̈ܳܪܶܐ. ܘܰܠܨܶܗܺܝܝ ܚܰܠܳܐ ܐܰܫܩܝܽܘܢܝ̱.
22 ܢܶܗܘܶܐ ܦܳܬܽܘܪܗܽܘܢ ܩܕܳܡܳܝܗܽܘܢ ܦܰܚܳܐ. ܘܦܽܘܪܥܳܢܗܽܘܢ ܠܬܽܘܩܰܠܬܳܐ.
23 ܢܶܚܫ̈ܟܳܢ ܥܰܝܢܰܝ̈ܗܽܘܢ ܕܠܳܐ ܢܶܚܙܽܘܢ. ܘܚܰܨܗܽܘܢ ܒܟܽܠܙܒܰܢ ܢܶܗܘܶܐ ܟܦܺܝܦ.
24 ܐܰܫܽܘܕ ܥܠܰܝܗܽܘܢ ܪܽܘܓܙܳܟ. ܘܚܶܡܬܳܐ ܕܪܽܘܓܙܳܟ ܬܰܕܪܶܟ ܐܶܢܽܘܢ.
25 ܢܶܗܘܶܐ ܒܶܝܬ ܡܰܥܡܰܪܗܽܘܢ ܚܪܶܒ. ܘܰܒܡܰܫ̈ܟܢܰܝܗܽܘܢ ܠܳܐ ܢܶܗܘܶܐ ܕܥܳܡܰܪ.
26 ܡܶܛܽܠ ܕܰܠܡܰܢ ܕܰܐܢ̱ܬ ܡܚܰܝܬ ܪܕܰܦܘ. ܘܰܐܘܣܶܦܘ ܥܰܠ ܟܺܐܒܶܗ ܕܰܩܛܺܝܠܳܐ.
27 ܗܰܒ ܥܰܘܠܳܐ ܥܰܠ ܥܰܘܠܗܽܘܢ. ܕܠܳܐ ܢܶܥܠܽܘܢ ܒܙܰܕܺܝܩܽܘܬܳܟ.
28 ܢܶܬܥܛܽܘܢ ܡܶܢ ܣܶܦܪܳܟ ܕܚܰܝ̈ܶܐ. ܘܥܰܡ ܙܰܕܺܝ̈ܩܰܝܟ ܠܳܐ ܢܶܬܟܰܬܒܽܘܢ.
29 ܘܶܐܢܳܐ ܡܶܣܟܺܢܳܐ ܐ̱ܢܳܐ ܘܡܰܟܰܐܒܳܐ. ܦܽܘܪܩܳܢܳܟ ܐܰܠܳܗܳܐ ܥܰܕܪܰܢܝ̱.
30 ܐܶܫܰܒܰܚ ܫܡܶܗ ܕܰܐܠܳܗܳܐ ܒܬܶܫܒܽܘܚܬܳܐ. ܘܰܐܘܪܒܺܝܘܗ̱ܝ ܒܬܰܘܕܺܝܬܳܐ.
31 ܐܶܫܦܰܪ ܠܡܳܪܝܳܐ ܡܶܢ ܬܰܘܖ̈ܶܐ ܡܦܰܛܡ̈ܶܐ. ܩܰܖ̈ܢܳܢܶܐ ܘܦܰܖ̈ܣܳܢܶܐ.
32 ܚܙܰܘ ܡܶܣ̈ܟܺܢܶܐ ܘܰܚܕܰܘ ܘܢܺܚܶܐ ܠܶܒܟܽܘܢ.
33 ܡܶܛܽܠ ܕܫܳܡܰܥ ܡܳܪܝܳܐ ܠܡܶܣ̈ܟܺܢܶܐ. ܘܠܰܐܣܺܝܖ̈ܰܘܗ̱ܝ ܠܳܐ ܫܳܐܶܛ.
34 ܢܫܰܒܚܽܘܢܳܝܗܝ̱ ܫܡܰܝܳܐ ܘܰܐܪܥܳܐ. ܘܝܰܡ̈ܡܶܐ ܘܟܽܠ ܕܪܳܚܶܫ ܒܗܽܘܢ.
35 ܡܶܛܽܠ ܕܰܐܠܳܗܳܐ ܦܳܪܶܩ ܠܨܶܗܝܽܘܢ. ܘܰܡܒܰܢܶܐ ܠܩܽܘܖ̈ܝܳܐ ܕܺܝܗܽܘܕܳܐ.
36 ܕܢܶܬܒܽܘܢ ܒܳܗ̇ ܥܰܒܕܰܘ̈ܗܝ ܘܢܺܐܪܬܽܘܢܳܗ̇. ܘܖ̈ܳܚܡܰܝ ܫܡܶܗ ܢܶܫܪܽܘܢ ܒܳܗ̇.