Psalms 22
The Book of Psalms
܀ ܡܙܡܘܪܐ ܟܒ ܀
ܐܰܡܺܝܪ ܠܕܰܘܺܝܕ ܚܠܳܦ ܨܠܽܘܬܳܐ ܟܰܕ ܐܶܬܪܕܶܦ ܡܶܢ ܐܰܒܫܳܠܳܘܡ
1 ܐܰܠܳܗܝ ܐܰܠܳܗܝ ܠܡܳܢܳܐ ܫܒܰܩܬܳܢܝ̱. ܘܰܐܪܚܶܩܬ ܡܶܢܝ ܦܽܘܪܩܳܢܝ̱ ܒܡ̈ܶܠܶܐ ܕܣܰܟ̈ܠܘܳܬܝ̱.
2 ܐܰܠܳܗܝ ܐܶܩܪܶܝܟ ܒܺܐܝܡܳܡܳܐ ܘܠܳܐ ܬܶܥܢܶܝܢܝ̱. ܘܰܒܠܺܠܝܳܐ ܘܠܳܐ ܬܟܰܬܰܪ ܠܺܝ.
3 ܐܰܢ̱ܬ ܩܰܕܺܝܫ ܘܝܳܬܶܒ ܒܫܽܘܒܚܳܟ ܝܺܣܪܳܐܶܝܠ.
4 ܒܳܟ ܣܰܒܰܪܘ ܐܰܒܳܗܰܝ̈. ܣܰܒܰܪܘ ܒܳܟ ܘܦܰܨܺܝܬ ܐܶܢܽܘܢ.
5 ܠܘܳܬܳܟ ܓܥܰܘ ܘܶܐܬܦܰܨܺܝܘ. ܘܒܳܟ ܣܰܒܰܪܘ ܘܠܳܐ ܒܗܶܬܘ.
6 ܐܶܢܳܐ ܬܰܘܠܥܳܐ ܐ̱ܢܳܐ ܘܠܳܐ ܒܰܪܢܳܫܳܐ. ܚܶܣܕܳܐ ܕܰܒܢܰܝ̈ܢܳܫܳܐ ܘܣܽܘܠܳܢܶܗ ܕܥܰܡܳܐ.
7 ܟܽܠ ܕܰܚܙܰܐܢܝ̱ ܡܰܝܶܩܘ ܒܺܝ. ܐܰܦܛܰܪܘ ܒܣܶܦ̈ܘܳܬܗܽܘܢ ܘܰܐܢܺܝܕܘ ܒܖ̈ܺܝܫܰܝܗܽܘܢ.
8 ܐܶܬܬܟܶܠ ܥܰܠ ܡܳܪܝܳܐ ܢܦܰܨܶܝܘܗ̱ܝ. ܘܰܢܦܰܠܛܺܝܘܗ̱ܝ ܐܶܢ ܨܳܒܶܐ ܒܶܗ.
9 ܡܶܛܽܠ ܕܰܐܢ̱ܬ ܗܽܘ ܬܽܘܟܠܳܢܝ̱ ܡܶܢ ܡܰܪܒܥܳܐ. ܘܣܰܒܪܝ̱ ܥܰܠ ܬܕܶܝ̈ܗ̇ ܕܶܐܡܝ̱.
10 ܥܠܰܝܟ ܐܶܫܬܕܺܝܬ ܡܶܢ ܡܰܪܒܥܳܐ. ܘܡܶܢ ܟܰܪܣܳܗ̇ ܕܶܐܡܝ̱. ܐܰܠܳܗܝ ܐܰܢ̱ܬ.
11 ܠܳܐ ܬܰܪܚܶܩ ܡܶܢܝ̱. ܡܶܛܽܠ ܕܽܐܘܠܨܳܢܳܐ ܩܪܶܒ ܘܠܰܝܬ ܕܰܡܥܰܕܰܪ.
12 ܐܶܬܟܰܪܟܽܘܢܝ̱ ܬܰܘܖ̈ܶܐ ܣܰܓܺܝ̈ܐܶܐ. ܘܰܐܖ̈ܘܳܢܶܐ ܕܒܰܝܫܳܢ ܚܰܕܪܽܘܢܝ̱.
13 ܘܰܦܬܰܚܘ ܥܠܰܝ ܦܽܘܡܗܽܘܢ. ܐܰܝܟ ܐܰܪܝܳܐ ܕܢܳܗܶܡ ܘܚܳܛܶܦ.
14 ܘܰܐܝܟ ܡܰܝ̈ܳܐ ܐܶܬܰܐܫܕܶܬ. ܘܶܐܬܒܰܕܰܪܘ ܟܽܠܗܽܘܢ ܓܰܖ̈ܡܰܝ. ܘܰܗܘܳܐ ܠܶܒܝ̱ ܐܰܝܟ ܫܥܽܘܬܳܐ. ܘܶܐܬܡܣܺܝܘ ܒܓܰܘܝ ܡܥܰܝ̈.
15 ܘܺܝܒܶܫ ܐܰܝܟ ܚܶܨܦܳܐ ܕܦܰܚܳܪܳܐ ܚܰܝܠܝ̱. ܘܠܶܫܳܢܝ̱ ܕܒܶܩ ܠܰܫ̈ܡܰܝ ܚܶܟܝ̱. ܘܥܰܠ ܥܰܦܪܳܐ ܕܡܰܘܬܳܐ ܫܕܰܝܬܳܢܝ̱.
16 ܡܶܛܽܠ ܕܚܰܕܪܽܘܢܝ̱ ܟܰܠܒ̈ܶܐ. ܘܰܟܢܽܘܫܬܳܐ ܕܒܺܝ̈ܫܶܐ ܟܰܪܟܽܘܢܝ̱. ܒܰܙܰܥܘ ܐܺܝ̈ܕܰܝ ܘܖ̈ܶܓܠܰܝ.
17 ܘܰܐܝܠܶܠܘ ܟܽܠܗܽܘܢ ܓܰܖ̈ܡܰܝ. ܗܶܢܽܘܢ ܚܳܪܘ ܘܰܚܙܰܘ ܒܺܝ.
18 ܘܦܰܠܶܓܘ ܢܰܚ̈ܬܰܝ ܒܰܝܢܳܬܗܽܘܢ. ܘܥܰܠ ܠܒܽܘܫܝ̱ ܐܰܪܡܺܝܘ ܦܶܣ̈ܶܐ.
19 ܘܰܐܢ̱ܬ ܡܳܪܝܳܐ ܠܳܐ ܬܰܪܚܶܩ ܡܶܢܝ̱. ܐܺܝܠ ܐܺܝܠ ܠܥܽܘܕܪܳܢܝ̱ ܟܰܬܰܪ.
20 ܘܦܰܨܳܗ̇ ܡܶܢ ܚܰܪܒܳܐ ܢܰܦܫܝ̱. ܘܡܶܢ ܐܺܝܕܳܐ ܕܟܰܠܒ̈ܶܐ ܝܺܚܺܝܕܽܘܬܝ̱.
21 ܦܪܽܘܩܰܝܢܝ̱ ܡܶܢ ܦܽܘܡܶܗ ܕܰܐܪܝܳܐ. ܘܡܶܢ ܩܰܪܢܳܐ ܪܳܡܬܳܐ ܡܽܘܟܳܟܝ̱.
22 ܕܶܐܣܰܒܰܪ ܫܡܳܟ ܠܰܐܚܰܝ̈. ܘܰܒܓܰܘ ܟܢܽܘܫܬܳܐ ܐܶܫܰܒܚܳܟ.
23 ܕܳܚܠܰܘ̈ܗܝ̱ ܕܡܳܪܝܳܐ ܫܰܒܚܽܘܗ̱ܝ. ܘܟܽܠܶܗ ܙܰܪܥܶܗ ܕܝܰܥܩܽܘܒ ܐܽܘܩܪܽܘܗ̱ܝ. ܘܰܕܚܰܠܘ ܡܶܢܶܗ ܟܽܠܶܗ ܙܰܪܥܶܗ ܕܺܝܣܪܳܐܶܝܠ.
24 ܡܶܛܽܠ ܕܠܳܐ ܫܳܛ ܘܠܳܐ ܐܰܣܠܺܝ ܓܥܳܬܶܗ ܕܡܶܣܟܺܢܳܐ. ܘܠܳܐ ܐܰܗܦܶܟ ܐܰܦܰܘ̈ܗܝ̱ ܡܶܢܶܗ. ܟܰܕ ܓܥܳܐ ܠܘܳܬܶܗ ܫܰܡܥܶܗ.
25 ܡܶܢ ܩܕܳܡܰܝܟ ܗܺܝ ܬܶܫܒܽܘܚܬܝ̱ ܒܥܺܕܬܳܐ ܪܰܒܬܳܐ. ܘܢܶܕܖ̈ܰܝ ܐܶܫܰܠܶܡ ܩܕܳܡ ܕܳܚܠܰܘ̈ܗܝ̱.
26 ܢܶܐܟܠܽܘܢ ܡܶܣ̈ܟܺܢܶܐ ܘܢܶܣܒܥܽܘܢ. ܘܰܢܫܰܒܚܽܘܢ ܠܡܳܪܝܳܐ ܐܰܝܠܶܝܢ ܕܒܳܥܶܝܢ ܠܶܗ. ܘܢܺܚܶܐ ܠܶܒܗܽܘܢ ܠܥܳܠܡܺܝܢ.
27 ܢܶܬܕܰܟܪܽܘܢ ܘܢܶܬܦܢܽܘܢ ܠܘܳܬ ܡܳܪܝܳܐ ܟܽܠܗܽܘܢ ܥܶܒܖ̈ܶܝܗ̇ ܕܰܐܪܥܳܐ. ܘܰܩܕܳܡܰܘܗ̱ܝ ܢܶܣܓ̈ܕܳܢ ܟܽܠܗܶܝܢ ܫܰܖ̈ܒܳܬܳܐ ܕܥܰܡ̈ܡܶܐ.
28 ܡܶܛܽܠ ܕܰܕܡܳܪܝܳܐ ܗ̱ܝ ܡܰܠܟܽܘܬܳܐ. ܘܗܽܘܝܽܘ ܫܰܠܺܝܛ ܥܰܠ ܥܰܡ̈ܡܶܐ.
29 ܢܶܐܟܠܽܘܢ ܘܢܶܣܓܕܽܘܢ ܩܕܳܡ ܡܳܪܝܳܐ ܟܽܠܗܽܘܢ ܟܰܦܢܶܝ̈ܗ̇ ܕܰܐܪܥܳܐ. ܘܰܩܕܳܡܰܘܗ̱ܝ ܢܶܒܪܟܽܘܢ ܟܽܠ ܢܳܚ̈ܬܰܝ ܥܰܦܪܳܐ. ܢܰܦܫܝ̱ ܠܶܗ ܗܽܘ ܚܰܝܳܐ.
30 ܙܰܪܥܳܐ ܕܢܶܦܠܚܺܝܘܗ̱ܝ ܢܣܰܒܰܪ ܕܳܪܶܗ ܠܡܳܪܝܳܐ.
31 ܢܺܐܬܽܘܢ ܘܰܢܚܰܘܢ ܙܰܕܺܝܩܽܘܬܶܗ ܠܥܰܡܳܐ ܕܡܶܬܺܝܠܶܕ ܕܥܳܒܶܕ ܡܳܪܝܳܐ.