Psalms 7
The Book of Psalms
܀ ܡܙܡܘܪܐ ܙ ܀
ܐܰܡܺܝܪ ܠܕܰܘܺܝܕ ܟܰܕ ܫܡܰܥ ܥܰܠ ܚܢܽܘܩܝܶܗ ܕܰܐܚܺܝܬܽܘܦܶܠ
1 ܡܳܪܝܳܐ ܐܰܠܳܗܝ ܒܳܟ ܣܰܒܪܶܬ ܦܪܽܘܩܰܝܢܝ̱. ܘܡܶܢ ܟܽܠ ܖ̈ܳܕܽܘܦܰܝ ܦܰܨܳܢܝ̱.
2 ܕܰܠܡܳܐ ܐܰܝܟ ܐܰܪܝܳܐ ܠܡܶܬܒܰܪ ܠܢܰܦܫܝ̱. ܘܠܰܝܬ ܕܦܳܪܶܩ ܘܰܡܦܰܨܶܐ.
3 ܡܳܪܝܳܐ ܐܰܠܳܗܝ ܐܶܢ ܥܶܒܕܶܬ ܗܳܕܶܐ. ܘܶܐܢ ܐܺܝܬ ܥܰܘܠܳܐ ܒܺܐܝ̈ܕܰܝ.
4 ܘܶܐܢ ܦܶܪܥܶܬ ܠܡܰܢ ܕܰܥܒܰܕ ܠܺܝ ܒܺܝܫܬܳܐ ܘܶܐܢ ܐܶܠܨܶܬ ܠܰܒܥܶܠܕܒܳܒܝ̱ ܣܪܺܝܩܳܐܺܝܬ.
5 ܢܶܪܕܽܘܦ ܒܥܶܠܕܒܳܒܳܐ ܠܢܰܦܫܝ̱ ܘܢܰܕܪܟܺܝܗ̇. ܘܰܢܕܽܘܫ ܚܰܝܰܝ̈ ܒܰܐܪܥܳܐ. ܘܫܽܘܒܚܝ̱ ܒܥܰܦܪܳܐ ܢܰܫܪܶܐ.
6 ܩܽܘܡ ܡܳܪܝܳܐ ܒܪܽܘܓܙܳܟ. ܘܶܐܫܬܰܩܠ ܥܰܠ ܩܕܳܠܳܐ ܕܰܒܥܶܠܕ̈ܒܳܒܰܝ. ܐܶܬܬܥܺܝܪ ܥܠܰܝ ܒܕܺܝܢܳܐ ܕܰܦܩܰܕܬ.
7 ܘܥܺܕܬܳܐ ܕܶܐܡܘ̈ܳܬܳܐ ܬܶܚܕܪܳܟ. ܘܥܰܠ ܐܰܦܶܝ̈ܗ̇ ܠܰܡܪܰܘܡܳܐ ܬܶܗܦܽܘܟ.
8 ܡܳܪܝܳܐ ܢܕܽܘܢ ܥܰܡ̈ܡܶܐ. ܕܽܘܢܰܝܢܝ̱ ܡܳܪܝܳܐ ܐܰܝܟ ܙܰܕܺܝܩܽܘܬܝ̱ ܘܰܐܝܟ ܬܰܡܺܝܡܽܘܬܝ̱.
9 ܬܶܓܡܰܪ ܒܺܝܫܬܳܐ ܥܰܠ ܖ̈ܰܫܺܝܥܶܐ. ܘܬܰܬܩܶܢ ܠܙܰܕܺܝ̈ܩܶܐ. ܒܳܚܰܪ ܠܶܒܳܐ ܘܟܽܘ̈ܠܝܳܬܳܐ.
10 ܐܰܠܳܗܳܐ ܙܰܕܺܝܩܳܐ ܡܣܰܝܥܳܢܝ̱. ܐܰܠܳܗܳܐ ܕܦܳܪܶܩ ܠܰܬܖ̈ܺܝܨܰܝ ܠܶܒܳܐ.
11 ܐܰܠܳܗܳܐ ܕܰܝܳܢܳܐ ܕܩܽܘܫܬܳܐ. ܠܳܐ ܪܳܓܶܙ ܟܽܠ ܝܽܘܡ.
12 ܐܶܠܳܐ ܗܳܦܶܟ. ܣܰܝܦܶܗ ܠܳܛܶܫ ܘܩܶܫܬܶܗ ܡܳܬܰܚ.
13 ܐܰܬܩܶܢ ܘܡܰܬܩܶܢ ܠܶܗ ܡܳܐܢ̈ܶܐ ܕܪܽܘܓܙܳܐ. ܓܶܐܖ̈ܰܘܗ̱ܝ ܥܒܰܕ ܠܰܕܝܳܩܕܺܝܢ.
14 ܡܶܛܽܠ ܕܚܰܒܶܠ ܥܰܘܳܠܳܐ ܘܰܒܛܶܢ ܫܽܘܩܪܳܐ ܘܺܝܠܶܕ ܥܰܘܠܳܐ.
15 ܒܺܪܳܐ ܚܦܰܪ ܘܚܰܛܳܗ̇. ܘܰܢܦܰܠ ܒܓܽܘܡܳܨܳܐ ܕܰܥܒܰܕ.
16 ܢܶܗܦܽܘܟ ܥܰܘܠܶܗ ܒܪܺܝܫܶܗ. ܘܥܰܠ ܒܺܝܥܬܶܗ ܥܰܘܠܶܗ ܢܶܚܽܘܬ.
17 ܐܰܘܕܶܐ ܠܡܳܪܝܳܐ ܐܰܝܟ ܙܰܕܺܝܩܽܘܬܝ̱. ܘܶܐܙܡܰܪ ܠܰܫܡܶܗ ܕܡܳܪܝܳܐ ܡܪܰܝܡܳܐ.