Psalms 92
The Book of Psalms
܀ ܡܙܡܘܪܐ ܨܒ ܀
ܬܰܘܕܺܝܬܶܗ ܕܥܰܡܳܐ ܕܥܰܠ ܐܰܦܰܝ̈ ܙܳܟܽܘܬܶܗ ܕܚܶܙܰܩܝܳܐ
1 ܛܳܒ ܠܡܰܘܕܳܝܽܘ ܠܡܳܪܝܳܐ. ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ.
2 ܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝܠܰܘ̈ܳܬܳܐ.
3 ܐܶܢܳܐ ܐܶܩܽܘܫ ܒܟܶܢܳܪܳܐ ܕܰܥܣܰܪ ܘܶܐܩܽܘܫ ܒܩܺܝܬܳܪܳܐ.
4 ܡܶܛܽܠ ܕܚܰܕܺܝܬܳܢܝ̱ ܡܳܪܝܳܐ ܒܰܥܒܳܕܰܝ̈ܟ. ܘܒܰܥܒܳܕ ܐܺܝ̈ܕܰܝܟ ܐܶܫܬܰܒܰܚ.
5 ܡܳܐ ܖ̈ܰܘܪܒܺܝܢ ܥܒܳܕܰܝ̈ܟ ܡܳܪܝܳܐ ܘܛܳܒ ܥܰܡܺܝ̈ܩܳܢ ܡܰܚܫ̈ܒܳܬܳܟ.
6 ܘܓܰܒܪܳܐ ܫܳܛܝܳܐ ܠܳܐ ܝܳܕܰܥ. ܘܣܰܟܠܳܐ ܠܳܐ ܡܶܣܬܰܟܰܠ ܒܗܳܕܶܐ.
7 ܡܳܐ ܕܦܳܪܥܺܝܢ ܖ̈ܰܫܺܝܥܶܐ ܐܰܝܟ ܥܶܣܒܳܐ ܘܫܳܘܚܺܝܢ ܟܽܠ ܥܳܒ̈ܕܰܝ ܥܰܘܠܳܐ. ܕܢܺܐܒܕܽܘܢ ܠܥܳܠܰܡ ܥܳܠܡܺܝܢ.
8 ܘܰܐܢ̱ܬ ܡܳܪܝܳܐ ܡܪܰܝܡܳܐ ܠܥܳܠܰܡ.
9 ܡܶܛܽܠ ܕܗܳܐ ܒܥܶܠܕ̈ܒܳܒܰܝܟ ܡܳܪܝܳܐ. ܡܶܛܽܠ ܕܗܳܐ ܒܥܶܠܕ̈ܒܳܒܰܝܟ ܢܺܐܒܕܽܘܢ. ܘܢܶܬܒܰܕܪܽܘܢ ܟܽܠ ܥܳܒ̈ܕܰܝ ܥܰܘܠܳܐ.
10 ܐܰܪܺܝܡܬ ܩܰܖ̈ܢܳܬܝ̱ ܐܰܝܟ ܕܪܰܝܡܳܐ ܘܨܰܒܰܥܬܳܢܝ̱ ܒܡܶܫܚܳܐ ܡܒܰܣܡܳܐ.
11 ܘܰܚ̈ܙܰܝ ܥܰܝ̈ܢܰܝ ܒܰܒܥܶܠܕ̈ܒܳܒܰܝ ܘܰܒܒܺܝ̈ܫܶܐ ܕܩܳܝܡܺܝܢ ܥܠܰܝ ܢܶܫܡ̈ܥܳܢ ܐܶܕܢܰܝ̈.
12 ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܘܰܐܝܟ ܐܰܖ̈ܙܶܐ ܕܠܶܒܢܳܢ ܢܰܫܘܰܚ.
13 ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܘܰܒܕܳܖ̈ܰܘܗ̱ܝ ܕܰܐܠܳܗܰܢ.
14 ܢܰܦܪܥܽܘܢ ܬܽܘܒ ܘܢܶܬܪܰܒܽܘܢ ܒܣܰܝܒܽܘܬܳܐ. ܫܰܡܺܝ̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ.
15 ܘܰܢܚܰܘܢ ܕܰܬܪܺܝܨ ܗܽܘ ܡܳܪܝܳܐ. ܥܰܫܺܝܢܳܐ ܘܠܰܝܬ ܒܶܗ ܥܰܘܠܳܐ.