Psalms 25
The Book of Psalms
܀ ܡܙܡܘܪܐ ܟܗ ܀
ܡܶܬܢܰܒܶܐ ܥܰܠ ܬܰܟܫܶܦܬܳܐ ܕܥܰܡܳܐ ܕܰܒܒܳܒܶܠ
1 ܠܘܳܬܳܟ ܡܳܪܝܳܐ ܢܰܦܫܝ̱ ܐܰܪܺܝܡܶܬ.
2 ܐܰܠܳܗܝ ܒܳܟ ܣܰܒܪܶܬ ܠܳܐ ܐܶܒܗܰܬ. ܠܳܐ ܢܶܫܬܰܒܗܪܽܘܢ ܥܠܰܝ ܒܥܶܠܕ̈ܒܳܒܰܝ.
3 ܘܐܳܦ ܟܽܠ ܕܰܡܣܰܒܪܺܝܢ ܒܳܟ ܠܳܐ ܢܶܒܗܬܽܘܢ. ܢܶܒܗܬܽܘܢ ܥܰܘ̈ܳܠܶܐ ܒܰܣܪܺܝܩܽܘܬܗܽܘܢ.
4 ܐܽܘܖ̈ܚܳܬܳܟ ܡܳܪܝܳܐ ܚܰܘܳܢܝ̱ ܘܰܫܒܺܝܠܰܝ̈ܟ ܐܰܘܕܰܥܰܝܢܝ̱.
5 ܕܰܒܰܪܰܝܢܝ̱ ܒܩܽܘܫܬܳܟ ܘܰܐܠܶܦܰܝܢܝ̱. ܡܶܛܽܠ ܕܰܐܢ̱ܬ ܗܽܘ ܐܰܠܳܗܝ ܘܦܳܪܽܘܩܝ̱. ܘܠܳܟ ܣܰܟܺܝܬ ܒܟܽܠܝܽܘܡ.
6 ܐܶܬܕܰܟܪ ܡܳܪܝܳܐ ܖ̈ܰܚܡܰܝܟ ܕܡܶܢ ܥܳܠܰܡ ܘܛܰܝ̈ܒܘܳܬܳܟ.
7 ܘܣܰܟ̈ܠܘܳܬܳܐ ܕܛܰܠܝܽܘܬܝ̱ ܠܳܐ ܬܶܕܟܰܪ ܠܺܝ. ܐܶܠܳܐ ܐܰܝܟ ܣܽܘܓܳܐܐ ܕܖ̈ܰܚܡܰܝܟ ܐܶܬܕܰܟܪܰܝܢܝ̱. ܡܶܛܽܠ ܛܰܝܒܽܘܬܳܟ ܐܰܠܳܗܳܐ.
8 ܛܳܒ ܗܽܘ ܘܰܬܪܺܝܨ ܡܳܪܝܳܐ. ܡܶܛܽܠ ܗܳܢܳܐ ܬܳܪܶܨ ܠܚܰܛܳܝ̈ܶܐ ܒܽܐܘܪܚܳܐ.
9 ܘܰܡܕܰܒܰܪ ܠܡܰܟܺܝ̈ܟܶܐ ܒܕܺܝܢܳܐ. ܘܡܰܠܶܦ ܠܡܶܣ̈ܟܺܢܶܐ ܐܽܘܪܚܶܗ.
10 ܟܽܠܗܶܝܢ ܐܽܘܖ̈ܚܳܬܶܗ ܕܡܳܪܝܳܐ ܛܰܝܒܽܘܬܳܐ ܘܩܽܘܫܬܳܐ. ܠܰܐܝܠܶܝܢ ܕܢܳܛܪܺܝܢ ܩܝܳܡܶܗ ܘܣܳܗ̈ܕܘܳܬܶܗ.
11 ܡܶܛܽܠ ܫܡܳܟ ܡܳܪܝܳܐ ܚܰܣܳܢܝ̱ ܡܶܢ ܥܰܘܠܝ̱ ܕܪܰܒ ܗܽܘ.
12 ܡܰܢܽܘ ܓܰܒܪܳܐ ܕܕܳܚܶܠ ܡܶܢ ܡܳܪܝܳܐ. ܢܰܠܦܺܝܘܗ̱ܝ ܐܽܘܪܚܳܐ ܕܰܓܒܳܐ.
13 ܢܰܦܫܶܗ ܬܒܽܘܬ ܒܛܰܝܒܽܘܬܳܐ ܘܙܰܪܥܶܗ ܢܺܐܪܰܬ ܐܰܪܥܳܐ.
14 ܬܰܪܥܺܝܬܶܗ ܕܡܳܪܝܳܐ ܥܰܠ ܕܳܚܠܰܘ̈ܗܝ̱. ܘܰܩܝܳܡܶܗ ܐܰܘܕܰܥ ܐܶܢܽܘܢ.
15 ܥܰܝ̈ܢܰܝ ܒܟܽܠܙܒܰܢ ܠܘܳܬ ܡܳܪܝܳܐ. ܡܶܛܽܠ ܕܗܽܘ ܡܰܦܶܩ ܡܶܢ ܡܨܺܝܕܬܳܐ ܖ̈ܶܓܠܰܝ.
16 ܐܶܬܦܰܢ ܥܠܰܝ ܘܪܰܚܶܡ ܥܠܰܝ. ܡܶܛܽܠ ܕܺܝܚܺܝܕܳܝܳܐ ܐ̱ܢܳܐ ܘܒܳܝܫܳܐ.
17 ܥܳܩ̈ܳܬܶܗ ܕܠܶܒܝ̱ ܣܓܺܝ̈ ܘܡܶܢ ܥܳܩ̈ܳܬܝ̱ ܐܰܦܶܩܰܝܢܝ̱.
18 ܚܙܺܝ ܫܽܘܥܒܳܕܝ̱ ܘܥܰܡܠܝ̱ ܘܰܫܒܽܘܩ ܠܺܝ ܟܽܠܳܗ̇ ܚܛܺܝܬܝ̱.
19 ܘܰܚܙܺܝ ܕܰܣܓܺܝܘ ܒܥܶܠܕ̈ܒܳܒܰܝ. ܘܣܶܢܶܐܬܳܐ ܕܥܰܘܠܳܐ ܣܢܰܐܢܝ̱.
20 ܛܰܪ ܢܰܦܫܝ̱ ܘܦܰܨܳܢܝ̱ ܡܶܛܽܠ ܕܒܳܟ ܣܰܒܪܶܬ.
21 ܬܰܡܺܝ̈ܡܶܐ ܘܰܬܖ̈ܺܝܨܶܐ ܢܩܶܦܘ ܠܺܝ ܡܶܛܽܠ ܕܠܳܟ ܣܰܟܺܝܬ.
22 ܦܪܰܩ ܐܰܠܳܗܳܐ ܠܺܝܣܪܳܐܶܝܠ ܡܶܢ ܟܽܠܗܽܘܢ ܐܳܠܽܘ̈ܨܰܘܗ̱ܝ.