Psalms 33
The Book of Psalms
܀ ܡܙܡܘܪܐ ܠܓ ܀
ܡܶܬܢܰܒܶܐ ܥܰܠ ܙܳܟܽܘܬܶܗ ܕܥܰܡܳܐ ܕܰܒܝܰܘܡܰܝ̈ ܚܶܙܰܩܝܳܐ
1 ܫܰܒܰܚܘ ܙܰܕܺܝ̈ܩܶܐ ܠܡܳܪܝܳܐ. ܘܠܰܬܖ̈ܺܝܨܶܐ ܝܳܐܝܳܐ ܬܶܫܒܽܘܚܬܳܐ.
2 ܐܰܘܕܰܘ ܠܶܗ ܒܟܶܢܳܪܳܐ. ܘܰܒܩܺܝܬܳܪܳܐ ܕܰܥܣܰܪ ܡܢܺܝ̈ܢ ܙܡܰܪܘ ܠܶܗ.
3 ܫܰܒܰܚܘ ܠܶܗ ܬܶܫܒܽܘܚܬܳܐ ܚܕܰܬܳܐ. ܘܶܐܡܰܪܘ ܫܰܦܺܝܪ ܒܩܳܠܳܐ.
4 ܡܶܛܽܠ ܕܰܬܪܺܝܨ ܗܽܘ ܦܶܬܓܳܡܶܗ ܕܡܳܪܝܳܐ. ܘܟܽܠܗܽܘܢ ܥܒܳܕܰܘ̈ܗܝ ܒܗܰܝܡܳܢܽܘܬܳܐ.
5 ܪܳܚܶܡ ܙܰܕܺܝܩܽܘܬܳܐ ܘܕܺܝܢܳܐ. ܛܰܝܒܽܘܬܶܗ ܕܡܳܪܝܳܐ ܡܰܠܝܳܐ ܐܰܪܥܳܐ.
6 ܒܡܶܠܬܶܗ ܕܡܳܪܝܳܐ ܐܶܬܥܒܶܕ ܫܡܰܝܳܐ. ܘܰܒܪܽܘܚܳܐ ܕܦܽܘܡܶܗ ܟܽܠܗܽܘܢ ܚܰܝ̈ܠܰܘܳܬܶܗ.
7 ܟܢܰܫܘ ܐܰܝܟ ܕܰܒܙܶܩ̈ܶܐ ܡܰܝ̈ܳܐ ܕܝܰܡܳܐ. ܘܣܳܡ ܒܰܐܘܨܖ̈ܶܐ ܬܗܽܘ̈ܡܶܐ.
8 ܬܶܕܚܰܠ ܡܶܢ ܡܳܪܝܳܐ ܟܽܠܳܗ̇ ܐܰܪܥܳܐ. ܘܰܢܙܽܘܥܽܘܢ ܡܶܢ ܩܕܳܡܰܘܗ̱ܝ ܟܽܠܗܽܘܢ ܥܳܡܽܘܖ̈ܶܝܗ̇ ܕܬܺܒܶܝܠ.
9 ܡܶܛܽܠ ܕܗܽܘ ܐܶܡܰܪ ܘܰܗܘܰܘ. ܘܗܽܘܝܽܘ ܦܩܰܕ ܘܰܐܩܺܝܡ.
10 ܡܳܪܝܳܐ ܡܒܰܛܶܠ ܡܶܠܟܳܐ ܕܥܰܡ̈ܡܶܐ. ܘܰܡܒܰܛܶܠ ܡܳܪܝܳܐ ܡܰܚܫ̈ܒܳܬܗܽܘܢ ܕܥܰܡ̈ܡܶܐ.
11 ܬܰܪܥܺܝܬܶܗ ܕܡܳܪܝܳܐ ܠܥܳܠܰܡ ܩܰܝܳܡܳܐ. ܘܡܰܚܫܰܒܬܳܐ ܕܠܶܒܶܗ ܠܕܳܪܕܳܖ̈ܺܝܢ.
12 ܛܽܘܒܰܘܗ̱ܝ ܠܥܰܡܳܐ ܕܡܳܪܝܰܐ ܗ̱ܘ ܐܰܠܳܗܶܗ. ܥܰܡܳܐ ܕܰܓܒܳܐ ܠܶܗ ܠܝܳܪܬܽܘܬܳܐ.
13 ܡܶܢ ܫܡܰܝܳܐ ܐܰܕܺܝܩ ܡܳܪܝܳܐ. ܘܰܚܙܳܐ ܠܟܽܠܗܽܘܢ ܒܢܰܝ̈ܢܳܫܳܐ.
14 ܘܡܶܢ ܡܰܘܬܒܶܗ ܚܙܳܐ ܠܟܽܠܗܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ.
15 ܕܰܓܒܰܠ ܐܰܟܚܕܳܐ ܠܶܒܗܽܘܢ. ܘܡܶܬܒܰܝܰܢ ܒܟܽܠܗܽܘܢ ܥܒܳܕܰܝ̈ܗܽܘܢ.
16 ܡܰܠܟܳܐ ܠܳܐ ܡܶܬܦܪܶܩ ܒܣܽܘܓܳܐܐ ܕܚܰܝܠܳܐ. ܐܳܦܠܳܐ ܓܰܢ̱ܒܳܪܳܐ ܡܶܬܦܰܨܶܐ ܒܣܽܘܓܳܐܐ ܕܚܰܝܠܶܗ.
17 ܕܰܓܳܠ ܗܽܘ ܦܽܘܪܩܳܢܶܗ ܕܣܽܘܣܝܳܐ. ܕܰܒܣܽܘܓܳܐܐ ܕܚܰܝܠܶܗ ܠܳܐ ܡܦܰܨܶܐ ܠܪܳܟܒܶܗ.
18 ܥܰܝܢܰܘ̈ܗܝ ܕܡܳܪܝܳܐ ܥܰܠ ܙܰܕܺܝ̈ܩܶܐ. ܕܰܡܣܰܟܶܝܢ ܠܛܰܝܒܽܘܬܶܗ.
19 ܕܰܡܦܰܨܶܐ ܢܰܦ̈ܫܳܬܗܽܘܢ ܡܶܢ ܡܰܘܬܳܐ. ܘܢܰܚܶܐ ܐܶܢܽܘܢ ܒܟܰܦܢܳܐ.
20 ܢܰܦܫܰܢ ܣܰܟܝܰܬ ܠܡܳܪܝܳܐ. ܡܶܛܽܠ ܕܗܽܘܝܽܘ ܡܥܰܕܪܳܢܰܢ ܘܰܡܣܰܝܥܳܢܰܢ.
21 ܘܒܶܗ ܗܽܘ ܢܶܚܕܶܐ ܠܶܒܰܢ. ܕܒܰܫܡܶܗ ܩܰܕܺܝܫܳܐ ܣܰܒܰܪܢ.
22 ܬܶܗܘܶܐ ܛܰܝܒܽܘܬܳܟ ܥܠܰܝܢ ܡܳܪܝܳܐ. ܐܰܝܟܰܢܳܐ ܕܣܰܟܺܝܢܰܢ ܠܳܟ.