Psalms 72
The Book of Psalms
܀ ܡܙܡܘܪܐ ܥܒ ܀
ܡܶܬܢܰܒܶܐ ܥܰܠ ܫܠܶܝܡܽܘܢ ܘܥܰܠ ܟܰܗܺܝܢܽܘܬܶܗ ܕܥܰܡܳܐ ܕܡܶܛܽܠܳܬܶܗ܆ ܘܰܡܨܰܠܶܐ ܕܰܡܫܰܡܠܝܳܐܺܝܬ ܢܶܬܢܰܛܖ̈ܳܢ ܠܘܳܬܶܗ ܛܳܒ̈ܳܬܳܐ
1 ܐܰܠܳܗܳܐ ܗܰܒ ܕܺܝܢܳܟ ܠܡܰܠܟܳܐ ܘܙܰܕܺܝܩܽܘܬܳܟ ܠܒܰܪ ܡܰܠܟܳܐ.
2 ܕܰܢܕܽܘܢ ܠܥܰܡܳܟ ܒܙܰܕܺܝܩܽܘܬܳܐ ܘܰܠܡܶܣ̈ܟܺܢܰܝܟ ܒܕܺܝܢܳܐ.
3 ܢܶܫܩܠܽܘܢ ܛܽܘܖ̈ܶܐ ܫܠܳܡܳܐ ܠܥܰܡܳܟ ܘܖ̈ܳܡܳܬܳܐ ܙܰܕܺܝܩܽܘܬܳܟ.
4 ܕܰܢܕܽܘܢ ܠܡܶܣ̈ܟܺܢܶܐ ܕܥܰܡܳܐ. ܢܶܦܪܽܘܩ ܠܰܒ̈ܢܰܝ ܒܳܝ̈ܫܶܐ. ܘܰܢܡܰܟܶܟ ܠܛܳܠܽܘ̈ܡܶܐ.
5 ܢܶܕܚܠܽܘܢ ܠܳܟ ܥܰܡ ܫܶܡܫܳܐ. ܘܰܩܕܳܡ ܣܰܗܪܳܐ ܠܕܳܪܕܳܖ̈ܺܝܢ.
6 ܢܶܚܽܘܬ ܐܰܝܟ ܡܶܛܪܳܐ ܥܰܠ ܓܶܙܬܳܐ. ܘܰܐܝܟ ܖ̈ܣܺܝܣܶܐ ܕܢܳܚܬܺܝܢ ܥܰܠ ܐܰܪܥܳܐ.
7 ܢܶܫܘܰܚ ܒܝܰܘ̈ܡܳܬܶܗ ܙܶܕܩܳܐ. ܘܣܽܘܓܳܐܐ ܕܰܫܠܳܡܳܐ ܥܕܰܡܳܐ ܕܢܶܥܒܰܪ ܣܰܗܪܳܐ.
8 ܢܶܐܚܽܘܕ ܡܶܢ ܝܰܡܳܐ ܠܝܰܡܳܐ. ܘܡܶܢ ܢܰܗܖ̈ܰܘܳܬܳܐ ܥܕܰܡܳܐ ܠܣܰܘ̈ܦܶܝܗ̇ ܕܰܐܪܥܳܐ.
9 ܩܕܳܡܰܘܗ̱ܝ ܢܶܒܖ̈ܟܳܢ ܓܳܙܖ̈ܳܬܳܐ. ܘܰܒܥܶܠܕ̈ܒܳܒܰܘܗ̱ܝ ܥܰܦܪܳܐ ܢܶܠܚܟܽܘܢ.
10 ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܖ̈ܳܬܳܐ ܩܽܘܖ̈ܒܳܢܶܐ ܢܰܝܬܽܘܢ ܠܶܗ. ܡܰܠ̈ܟܶܐ ܕܰܫܒܳܐ ܘܰܕܣܰܒܰܐ ܩܽܘܖ̈ܒܳܢܶܐ ܢܩܰܪܒܽܘܢ ܠܶܗ.
11 ܢܶܣܓܕܽܘܢ ܠܶܗ ܟܽܠܗܽܘܢ ܡܰܠ̈ܟܶܐ. ܘܟܽܠܗܽܘܢ ܥܰܡ̈ܡܶܐ ܢܶܦܠܚܽܘܢܳܝܗܝ̱.
12 ܡܶܛܽܠ ܕܰܡܦܰܨܶܐ ܠܒܳܝܫܳܐ ܡܶܢ ܡܰܢ ܕܥܰܫܺܝܢ ܡܶܢܶܗ. ܘܰܠܡܶܣܟܺܢܳܐ ܕܠܰܝܬ ܠܶܗ ܡܥܰܕܪܳܢܳܐ.
13 ܚܳܐܶܣ ܥܰܠ ܡܶܣ̈ܟܺܢܶܐ ܘܥܰܠ ܒܳܝ̈ܫܶܐ. ܘܢܰܦ̈ܫܳܬܳܐ ܕܡܶܣ̈ܟܺܢܶܐ ܦܳܪܶܩ.
14 ܡܶܢ ܬܽܘܟܳܐ ܘܡܶܢ ܥܰܘܠܳܐ ܦܳܪܶܩ ܢܰܦ̈ܫܳܬܗܽܘܢ. ܝܰܩܺܝܪ ܗܽܘ ܕܶܡܗܽܘܢ ܒܥܰܝ̈ܢܰܘܗ̱ܝ.
15 ܢܺܚܶܐ ܘܢܶܬܺܝܗܶܒ ܠܶܗ ܡܶܢ ܕܰܗܒܳܐ ܕܰܫܒܳܐ. ܘܰܢܨܰܠܶܐ ܥܠܰܘܗ̱ܝ ܒܟܽܠܙܒܰܢ. ܘܟܽܠܶܗ ܝܰܘܡܳܐ ܢܒܰܪܟܺܝܘܗ̱ܝ.
16 ܢܶܗܘܶܐ ܐܰܝܟ ܣܽܘܓܳܐܐ ܕܰܥܒܽܘܪܳܐ ܒܰܐܪܥܳܐ. ܘܰܒܪܺܝܫܳܐ ܕܛܽܘܖ̈ܶܐ ܢܰܫܘܰܚ ܦܺܐܖ̈ܰܘܗ̱ܝ ܐܰܝܟ ܕܠܶܒܢܳܢ. ܘܢܰܘܥܶܐ ܡܶܢ ܡܕܺܝܢ̱ܬܶܗ ܐܰܝܟ ܥܶܣܒܳܐ ܕܰܐܪܥܳܐ.
17 ܘܢܶܗܘܶܐ ܫܡܶܗ ܠܥܳܠܰܡ. ܘܰܩܕܳܡ ܫܶܡܫܳܐ ܐܺܝܬܰܘܗ̱ܝ ܫܡܶܗ. ܢܶܬܒܰܪܟܽܘܢ ܒܶܗ ܟܽܠܗܽܘܢ ܥܰܡ̈ܡܶܐ. ܘܟܽܠܗܽܘܢ ܢܫܰܒܚܽܘܢܳܝܗܝ̱.
18 ܒܪܺܝܟ ܗܽܘ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ ܕܰܥܒܰܕ ܬܶܕܡܖ̈ܳܬܳܐ ܪܰܘܖ̈ܒܳܬܳܐ ܒܰܠܚܽܘܕܰܘܗ̱ܝ.
19 ܘܰܒܪܺܝܟ ܗܽܘ ܫܡܳܐ ܕܺܐܝܩܳܪܶܗ ܠܥܳܠܰܡ. ܬܶܬܡܠܶܐ ܐܺܝܩܳܪܶܗ ܟܽܠܳܗ̇ ܐܰܪܥܳܐ ܐܰܡܺܝܢ ܘܰܐܡܺܝܢ.