Psalms 29
The Book of Psalms
܀ ܡܙܡܘܪܐ ܟܛ ܀
ܡܰܠܶܦ ܕܡܶܢ ܒܳܬܰܪ ܕܰܐܓܗܺܝ ܚܶܙܰܩܝܳܐ ܡܶܢ ܐܳܬܽܘܖ̈ܳܝܶܐ ܦܶܐܐ ܗܘܳܐ ܠܶܗ ܕܰܢܙܰܡܶܢ ܠܥܰܡܳܐ ܠܡܰܝܬܳܝܽܘ ܕܶܒܚ̈ܶܐ ܠܰܐܠܳܗܳܐ
1 ܐܰܝܬܰܘ ܠܡܳܪܝܳܐ ܒܢܰܝ̈ ܕܶܟܖ̈ܶܐ. ܐܰܝܬܰܘ ܠܡܳܪܝܳܐ ܫܽܘܒܚܳܐ ܘܺܐܝܩܳܪܳܐ.
2 ܐܰܝܬܰܘ ܠܡܳܪܝܳܐ ܐܺܝܩܳܪܳܐ ܠܰܫܡܶܗ. ܣܓܽܘܕܘ ܠܡܳܪܝܳܐ ܒܕܳܪܬܳܐ ܕܩܽܘܕܫܶܗ.
3 ܩܳܠܶܗ ܕܡܳܪܝܳܐ ܥܰܠ ܡܰܝ̈ܳܐ. ܐܰܠܳܗܳܐ ܡܫܰܒܚܳܐ ܪܥܶܡ. ܡܳܪܝܳܐ ܥܰܠ ܡܰܝ̈ܳܐ ܣܰܓܺܝ̈ܐܶܐ.
4 ܩܳܠܶܗ ܕܡܳܪܝܳܐ ܒܚܰܝܠܳܐ ܘܩܳܠܶܗ ܕܡܳܪܝܳܐ ܒܫܽܘܒܚܳܐ.
5 ܩܳܠܶܗ ܕܡܳܪܝܳܐ ܕܰܡܚܰܬܶܦ ܐܰܖ̈ܙܶܐ. ܘܬܰܒܰܪ ܡܳܪܝܳܐ ܐܰܖ̈ܙܶܐ ܕܠܶܒܢܳܢ.
6 ܪܰܩܶܕ ܐܶܢܽܘܢ ܐܰܝܟ ܥܶܓ̈ܠܶܐ. ܠܠܶܒܢܳܢ ܘܰܠܣܳܢܺܝܪ ܐܰܝܟ ܒܢܰܝ̈ ܪܰܝܡܳܐ.
7 ܩܳܠܶܗ ܕܡܳܪܝܳܐ ܕܦܳܣܶܩ ܫܰܠܗܶܒܺܝܬܳܐ ܕܢܽܘܪܳܐ.
8 ܩܳܠܶܗ ܕܡܳܪܝܳܐ ܕܰܡܙܺܝܥ ܡܰܕܒܪܳܐ. ܘܰܡܙܺܝܥ ܡܳܪܝܳܐ ܡܰܕܒܪܳܐ ܕܰܩܕܶܫ.
9 ܩܳܠܶܗ ܕܡܳܪܝܳܐ ܕܰܡܙܺܝܥ ܐܺܝ̈ܠܳܬܳܐ ܘܰܡܥܰܩܰܪ ܥܳܒ̈ܶܐ. ܘܰܒܗܰܝܟܠܶܗ ܟܽܠܢܳܫ ܐܳܡܰܪ ܫܽܘܒܚܳܐ.
10 ܡܳܪܝܳܐ ܡܳܡܽܘܠܳܐ ܐܰܗܦܶܟ. ܝܳܬܶܒ ܡܳܪܝܳܐ ܡܰܠܟܳܐ ܠܥܳܠܰܡ.
11 ܡܳܪܝܳܐ ܢܶܬܶܠ ܚܰܝܠܳܐ ܠܥܰܡܶܗ. ܡܳܪܝܳܐ ܢܒܰܪܶܟ ܠܥܰܡܶܗ ܒܰܫܠܳܡܳܐ.