Psalms 84
The Book of Psalms
܀ ܡܙܡܘܪܐ ܦܕ ܀
ܡܰܘܕܰܥ ܥܰܠ ܦܽܘܢܳܝܶܗ ܕܥܰܡܳܐ ܘܰܕܝܰܐܺܝܒܳܐܺܝܬ ܡܶܬܒܰܩܶܝܢ ܒܕܽܘܟܬܶܗ ܕܗܰܝܟܠܳܐ ܒܳܬܰܪ ܦܽܘܢܳܝܗܽܘܢ ܘܡܶܬܕܰܟܪܺܝܢ ܩܰܕܡܳܝ̈ܳܬܳܐ ܘܡܶܬܕܰܡܪܺܝܢ ܒܗܶܝܢ ܘܳܐܡܪܺܝܢ
1 ܡܳܐ ܚܰܒܺܝ̈ܒܺܝܢ ܡܰܫܟ̈ܢܰܝܟ ܡܳܪܝܳܐ ܚܰܝܠܬܳܢܳܐ.
2 ܣܰܟܝܰܬ ܢܰܦܫܝ̱ ܘܶܐܬܪܰܓܪܓܰܬ ܠܕܳܖ̈ܰܘܗ̱ܝ ܕܡܳܪܝܳܐ. ܠܶܒܝ̱ ܘܒܶܣܪܝ̱ ܫܰܒܰܚܘ̱ ܠܰܐܠܳܗܳܐ ܚܰܝܳܐ.
3 ܐܳܦ ܨܶܦܪܳܐ ܐܶܫܟܚܰܬ ܠܳܗ̇ ܒܰܝܬܳܐ ܘܫܽܘܦܢܺܝܢܳܐ ܩܶܢܳܐ. ܪܰܒܺܝܘ ܦܰܖ̈ܽܘܓܶܐ ܥܰܠ ܓܶܢ̱ܒ ܡܰܕܒܚܳܟ ܡܳܪܝܳܐ ܚܰܝܠܬܳܢܳܐ.
4 ܡܰܠܟܝ̱ ܘܰܐܠܳܗܝ̱ ܛܽܘܒܰܝܗܽܘܢ ܠܰܕܥܳܡܪܺܝܢ ܒܒܰܝܬܳܟ. ܢܫܰܒܚܽܘܢܳܟ ܠܥܳܠܰܡ.
5 ܛܽܘܒܰܘܗ̱ܝ ܠܒܰܪܢܳܫܳܐ ܕܰܐܢ̱ܬ ܗܽܘ ܡܣܰܝܥܳܢܶܗ. ܘܰܫܒܺܝ̈ܠܰܝܟ ܒܠܶܒܶܗ.
6 ܥܒܰܪܘ ܒܥܽܘܡܩܳܐ ܕܰܒܟܳܬܳܐ ܘܥܰܒܕܽܘܗ̱ܝ ܒܶܝܬ ܡܰܥܡܪܳܐ. ܐܳܦ ܒܽܘܪܟܬܳܐ ܢܶܬܥܰܛܰܦ ܣܳܐܶܡ ܢܳܡܽܘܣܳܐ.
7 ܢܺܐܙܽܠܘܢ ܡܶܢ ܚܰܝܠܳܐ ܠܚܰܝܠܳܐ. ܘܢܶܬܚܙܶܐ ܐܰܠܳܗ ܐܰܠܳܗܺܝ̈ܢ ܒܨܶܗܝܽܘܢ.
8 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܫܡܰܥ ܨܠܽܘܬܝ̱. ܘܨܽܘܬ ܐܰܠܳܗܶܗ ܕܝܰܥܩܽܘܒ.
9 ܘܰܚܙܺܝ ܐܰܢ̱ܬ ܐܰܠܳܗܳܐ ܡܣܰܝܥܳܢܰܢ. ܘܚܽܘܪ ܒܰܐܦܰܝ̈ ܡܫܺܝܚܳܟ.
10 ܡܶܛܽܠ ܕܛܳܒ ܗܽܘ ܚܰܕ ܝܽܘܡ ܒܕܰܝܪܳܟ ܡܶܢ ܐܳܠܶܦ. ܨܒܺܝܬ ܠܡܶܥܡܰܪ ܒܒܰܝܬܶܗ ܕܰܐܠܳܗܳܐ. ܛܳܒ ܡܶܢ ܕܰܠܡܶܥܡܰܪ ܒܡܰܫܟܢܳܐ ܕܖ̈ܰܫܺܝܥܶܐ.
11 ܡܶܛܽܠ ܕܰܡܬܰܪܣܝܳܢܰܢ ܘܥܳܕܽܘܪܰܢ ܡܳܪܝܰܐ ܗ̱ܘ ܐܰܠܳܗܳܐ. ܖ̈ܰܚܡܶܐ ܘܺܐܝܩܳܪܳܐ ܢܶܬܶܠ ܡܳܪܝܳܐ. ܘܠܳܐ ܢܶܟܠܳܐ ܛܳܒ̈ܳܬܶܗ ܡܶܢ ܐܰܝܠܶܝܢ ܕܰܡܗܰܠܟܺܝܢ ܒܬܰܡܺܝܡܽܘܬܳܐ.
12 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ. ܛܽܘܒܰܘܗ̱ܝ ܠܒܰܪܢܳܫܳܐ ܕܰܡܣܰܒܰܪ ܒܳܟ.