Psalms 95
The Book of Psalms
܀ ܡܙܡܘܪܐ ܨܗ ܀
ܥܰܠ ܝܺܗܽܘ̈ܕܳܝܶܐ ܕܰܒܒܳܒܶܠ ܡܶܬܢܰܒܶܐ ܡܶܢ ܐܰܝܠܶܝܢ ܕܳܐܣܬܥܰܪܘ ܠܗܽܘܢ ܘܩܳܪܶܐ ܠܬܰܘܕܺܝܬܳܐ
1 ܬܰܘ ܢܫܰܒܰܚ ܠܡܳܪܝܳܐ. ܘܢܶܙܡܰܪ ܠܰܐܠܳܗܰܢ ܦܳܪܽܘܩܳܐ.
2 ܢܩܰܕܶܡ ܐܰܦܰܘ̈ܗܝ̱ ܒܬܰܘܕܺܝܬܳܐ ܘܒܰܙܡܺܝܖ̈ܳܬܳܐ ܢܫܰܒܚܺܝܘܗ̱ܝ.
3 ܡܶܛܽܠ ܕܰܐܠܳܗܰܐ ܗ̱ܘ ܪܰܒܳܐ ܡܳܪܝܳܐ. ܡܰܠܟܳܐ ܕܪܰܒ ܥܰܠ ܟܽܠܗܽܘܢ ܐܰܠܳܗ̈ܶܐ.
4 ܕܒܺܐܝܕܰܘ̈ܗܝ̱ ܐܶܢܶܝܢ ܫܶܬܶܐܣܶܝ̈ܗ̇ ܕܰܐܪܥܳܐ ܘܪܰܘܡܳܐ ܕܛܽܘܖ̈ܶܐ.
5 ܕܺܝܠܶܗ ܗܽܘ ܝܰܡܳܐ ܘܗܽܘ ܥܰܒܕܶܗ. ܘܝܰܒܺܝܫܬܳܐ ܐܺܝ̈ܕܰܘܗ̱ܝ ܓܒܰܠܝ̱̈.
6 ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ ܘܰܢܒܰܪܟܺܝܘܗ̱ܝ ܠܡܳܪܝܳܐ ܕܥܰܒܕܰܢ.
7 ܡܶܛܽܠ ܕܗܽܘܝܽܘ ܐܰܠܳܗܰܢ ܘܰܚܢܰܢ ܥܰܡܳܐ ܕܺܝܠܶܗ ܘܥܳܢ̈ܳܐ ܕܡܰܪܥܺܝܬܶܗ. ܝܰܘܡܳܢܳܐ ܐܶܢ ܒܩܳܠܶܗ ܬܶܫܡܥܽܘܢ.
8 ܠܳܐ ܬܩܰܫܽܘܢ ܠܶܒܰܘ̈ܳܬܟܽܘܢ ܠܡܰܪܓܳܙܽܘܬܶܗ ܐܰܝܟ ܡܡܰܖ̈ܡܪܳܢܶܐ ܘܰܐܝܟ ܝܰܘܡܳܐ ܕܢܶܣܝܽܘܢܳܐ ܕܰܒܡܰܕܒܪܳܐ.
9 ܕܢܰܣܝܽܘܢܝ̱ ܐܰܒܳܗܰܝ̈ܟܽܘܢ ܘܰܒܩܰܘ̱ ܘܰܚܙܰܘ ܥܒܳܕܰܝ̈ ܐܰܖ̈ܒܥܺܝܢ ܫܢܺܝ̈ܢ.
10 ܡܶܐܢܰܬ ܠܺܝ ܒܕܳܪܳܐ ܗܰܘ. ܘܶܐܡܪܶܬ ܕܥܰܡܳܐ ܗܽܘ ܕܛܳܥܶܐ ܠܶܒܗܽܘܢ ܘܗܶܢܽܘܢ ܠܳܐ ܝܺܕܰܥܘ ܐܽܘܖ̈ܚܳܬܝ̱.
11 ܐܰܝܟ ܕܺܝܡܺܝܬ ܒܪܽܘܓܙܝ̱ ܕܠܳܐ ܢܶܥܠܽܘܢ ܠܰܢܝܳܚܬܝ̱.