Psalms 44
The Book of Psalms
܀ ܡܙܡܘܪܐ ܡܕ ܀
ܬܰܟܫܶܦܬܳܐ ܕܡܰܩܒܳܝ̈ܶܐ ܟܰܕ ܐܶܬܶܐܠܶܨܘ ܡܶܢ ܐܰܢܛܝܳܟܳܘܣ
1 ܐܰܠܳܗܳܐ ܫܡܰܥܢܰܢ ܒܶܐܕ̈ܢܰܝܢ. ܐܳܦ ܐܰܒܳܗܰܝ̈ܢ ܐܶܫܬܰܥܺܝܘ ܠܰܢ. ܡܶܕܶܡ ܕܰܥܒܰܕܬ ܒܝܰܘ̈ܡܰܝܗܽܘܢ ܒܝܰܘ̈ܡܳܬܳܐ ܩܰܕ̈ܡܳܝܶܐ.
2 ܐܺܝܕܳܟ ܐܰܘܒܕܰܬ ܠܥܰܡ̈ܡܶܐ ܘܰܢܨܰܒܬ ܐܶܢܽܘܢ. ܘܰܐܒܐܶܫܬ ܠܡܰܠܟ̈ܘܳܬܳܐ ܘܫܰܪܰܪܬ ܐܶܢܽܘܢ.
3 ܡܶܛܽܠ ܕܠܳܐ ܗܘܳܐ ܒܚܰܪܒܗܽܘܢ ܝܺܪܶܬܘ ܐܰܪܥܳܐ ܐܳܦܠܳܐ ܕܪܳܥܗܽܘܢ ܦܪܰܩ ܐܶܢܽܘܢ. ܐܶܠܳܐ ܝܰܡܺܝܢܳܟ ܘܰܕܪܳܥܳܟ ܘܢܽܘܗܪܳܐ ܕܰܐܦܰܝ̈ܟ ܕܰܨܒܰܝܬ ܒܗܽܘܢ.
4 ܐܰܢ̱ܬ ܗܽܘ ܐܰܠܳܗܳܐ ܡܰܠܟܝ̱. ܕܰܦܩܰܕܬ ܥܰܠ ܦܽܘܪܩܳܢܶܗ ܕܝܰܥܩܽܘܒ.
5 ܒܳܟ ܢܕܰܩܰܪ ܠܰܒܥܶܠܕ̈ܒܳܒܰܝܢ. ܘܡܶܛܽܠ ܫܡܳܟ ܢܕܽܘܫ ܠܣܳܢܰܐܝ̈ܢ.
6 ܡܶܛܽܠ ܕܠܳܐ ܗܘܳܐ ܥܰܠ ܩܶܫ̈ܬܳܬܰܢ ܬܟܺܝܠܺܝܢܰܢ. ܐܳܦܠܳܐ ܥܰܠ ܙܰܝܢܰܢ ܕܢܶܦܪܩܰܢ.
7 ܐܰܢ̱ܬ ܗܽܘ ܦܪܰܩܬܳܢ ܡܶܢ ܣܳܢܰܐܝ̈ܢ. ܘܰܐܒܗܶܬܬ ܠܰܒܥܶܠܕ̈ܒܳܒܰܝܢ.
8 ܫܰܒܰܚܢܳܟ ܐܰܠܳܗܳܐ ܟܽܠܶܗ ܝܰܘܡܳܐ. ܘܠܰܫܡܳܟ ܠܥܳܠܰܡ ܢܰܘܕܶܐ.
9 ܘܗܳܫܳܐ ܛܥܰܝܬܳܢ ܘܰܐܒܗܶܬܬܳܢ. ܘܠܳܐ ܢܳܦܶܩ ܐܰܢ̱ܬ ܒܚܰܝܠܰܢ.
10 ܐܶܠܳܐ ܐܰܗܦܶܟܬܳܢ ܠܒܶܣܬܪܰܢ ܘܒܰܙܽܘܢ ܒܥܶܠܕ̈ܒܳܒܰܝܢ.
11 ܝܰܗܒܬܳܢ ܐܰܝܟ ܥܳܢ̈ܳܐ ܠܡܶܐܟܽܘܠܬܳܐ. ܘܒܰܕܰܪܬܳܢ ܒܶܝܬ ܥܰܡ̈ܡܶܐ.
12 ܙܰܒܶܢܬ ܠܥܰܡܳܟ ܕܠܳܐ ܕܡܰܝ̈ܳܐ. ܘܠܳܐ ܐܰܣܓܺܝܬ ܚܽܘܠܳܦܗܽܘܢ.
13 ܥܒܰܕܬܳܢ ܚܶܣܕܳܐ ܠܰܫܒܳܒܰܝ̈ܢ. ܘܡܽܘܝܳܩܳܐ ܘܒܽܘܙܳܚܳܐ ܠܰܐܝܠܶܝܢ ܕܰܚܕܳܖ̈ܰܝܢ ܐܶܢܽܘܢ.
14 ܥܒܰܕܬܳܢ ܠܡܰܬܠܳܐ ܒܶܝܬ ܥܰܡ̈ܡܶܐ. ܘܰܢܝܳܕܳܐ ܕܪܺܝܫܳܐ ܒܶܐܡ̈ܘܳܬܳܐ.
15 ܘܟܽܠܶܗ ܝܰܘܡܳܐ ܒܶܗܬܰܬܝ̱ ܩܕܳܡܰܝ ܗܺܝ. ܘܒܶܗܬܬܳܐ ܕܰܐܦܰܝ̈ ܟܰܣܝܰܬܰܢܝ̱.
16 ܡܶܢ ܩܳܠܳܐ ܕܰܡܚܰܣܶܕ ܘܰܡܓܰܕܶܦ. ܘܡܶܢ ܩܕܳܡ ܒܥܶܠܕܒܳܒܳܐ ܕܡܶܬܢܰܩܰܡ.
17 ܗܳܠܶܝܢ ܟܽܠܗܶܝܢ ܓܕܰܫ̈ܝ̱ ܠܰܢ ܘܠܳܐ ܛܥܰܝܢܳܟ. ܘܠܳܐ ܕܰܓܶܠܢܰܢ ܒܰܩܝܳܡܳܟ.
18 ܘܠܳܐ ܗܦܰܟܢ ܠܒܶܣܬܪܰܢ. ܘܠܳܐ ܐܰܗܦܶܟܢ ܫܒܺܝ̈ܠܰܝܢ ܡܶܢ ܐܽܘܪܚܳܟ.
19 ܡܶܛܽܠ ܕܡܰܟܶܟܬܳܢ ܒܰܐܬܪܳܐ ܬܶܢܝܳܢܳܐ. ܘܟܰܣܺܝܬܳܢ ܒܛܶܠܳܠܰܝ̈ ܡܰܘܬܳܐ.
20 ܘܠܳܐ ܛܥܰܝܢ ܫܡܶܗ ܕܰܐܠܳܗܰܢ. ܘܠܳܐ ܦܫܰܛܢ ܐܺܝܕܰܝ̈ܢ ܠܘܳܬ ܐܠܗ̈ܶܐ ܢܽܘܟܖ̈ܳܝܶܐ.
21 ܐܠܗܰܐ ܗ̱ܘ ܒܳܨܶܐ ܠܳܗ̇ ܠܗܳܕܶܐ. ܡܶܛܽܠ ܕܗܽܘ ܝܳܕܰܥ ܡܰܚܫ̈ܒܳܬܶܗ ܕܠܶܒܳܐ.
22 ܡܶܛܽܠܳܬܳܟ ܐܶܬܩܰܛܰܠܢ ܟܽܠ ܝܽܘܡ. ܘܶܐܬܚܫܶܒܢ ܐܰܝܟ ܐܶܡܖ̈ܶܐ ܠܢܶܟܣܬܳܐ.
23 ܐܶܬܬܥܺܝܪ ܘܠܳܐ ܬܶܕܡܰܟ ܡܳܪܝܳܐ. ܥܶܗܰܕܰܝܢ ܘܠܳܐ ܬܶܛܥܶܝܢ.
24 ܘܠܳܐ ܬܰܗܦܶܟ ܐܰܦܰܝ̈ܟ ܡܶܢܰܢ. ܘܠܳܐ ܬܶܛܥܶܐ ܡܽܘܟܳܟܰܢ ܐܘ̈ܠܨܳܢܰܝܢ.
25 ܡܶܛܽܠ ܕܡܶܟܰܬ ܥܰܠ ܥܰܦܪܳܐ ܢܰܦܫܰܢ. ܘܕܶܒܩܰܬ ܟܰܪܣܰܢ ܠܰܐܪܥܳܐ.
26 ܩܽܘܡ ܥܰܕܰܪܰܝܢ ܘܰܦܪܽܘܩܰܝܢ ܡܶܛܽܠ ܖ̈ܰܚܡܰܝܟ.