Psalms 26
The Book of Psalms
܀ ܡܙܡܘܪܐ ܟܘ ܀
ܥܰܠ ܒܳܥܽܘܬܳܐ ܕܰܒܦܰܪܶܗܣܺܝܰܐ ܕܐ̱ܢܳܫ̈ܳܐ ܡܝܰܬܖ̈ܶܐ ܕܰܗܘܰܘ ܒܥܰܡܳܐ ܕܒܳܒܶܠ
1 ܕܽܘܢ ܠܺܝ ܡܳܪܝܳܐ ܡܶܛܽܠ ܕܶܐܢܳܐ ܒܬܰܡܺܝܡܽܘܬܝ̱ ܗܰܠܟܶܬ. ܒܡܳܪܝܳܐ ܣܰܒܪܶܬ ܠܳܐ ܐܶܙܽܘܥ.
2 ܒܚܽܘܪܰܝܢܝ̱ ܡܳܪܝܳܐ ܘܢܰܣܳܢܝ̱. ܘܰܒܩܺܝ ܟܽܘ̈ܠܝܳܬܝ̱ ܘܠܶܒܝ̱.
3 ܡܶܛܽܠ ܕܖ̈ܰܚܡܰܝܟ ܠܽܘܩܒܰܠ ܥܰܝ̈ܢܰܝ. ܗܰܠܟܶܬ ܒܗܰܝܡܳܢܽܘܬܳܐ.
4 ܘܠܳܐ ܝܶܬܒܶܬ ܥܰܡ ܒܺܝ̈ܫܶܐ. ܘܥܰܡ ܫܳܛܰܝ̈ܳܐ ܠܳܐ ܥܶܠܶܬ.
5 ܣܢܺܝܬ ܟܢܽܘܫܬܳܐ ܕܒܺܝ̈ܫܶܐ. ܘܥܰܡ ܖ̈ܰܫܺܝܥܶܐ ܠܳܐ ܝܶܬܒܶܬ.
6 ܐܰܫܺܝܓܶܬ ܕܰܟܝܳܐܺܝܬ ܐܺܝ̈ܕܰܝ. ܘܶܐܬܟܰܪܟܶܬ ܠܡܰܕܒܚܳܟ ܡܳܪܝܳܐ.
7 ܕܶܐܫܡܰܥ ܩܳܠܶܗ ܕܫܽܘܒܚܳܟ. ܘܶܐܫܬܰܥܶܐ ܟܽܠܗܶܝܢ ܬܶܕܡܖ̈ܳܬܳܟ.
8 ܡܳܪܝܳܐ ܪܶܚܡܶܬ ܬܶܫܡܶܫܬܶܗ ܕܒܰܝܬܳܟ. ܘܰܐܬܪܳܐ ܕܡܰܫܪܝܶܗ ܕܫܽܘܒܚܳܟ.
9 ܠܳܐ ܬܰܘܒܶܕܰܝܢܝ̱ ܥܰܡ ܚܰܛܳܝ̈ܶܐ. ܘܥܰܡ ܓܰܒܖ̈ܶܐ ܕܰܕܡܳܐ ܚܰܝܰܝ̈.
10 ܕܒܺܐܝ̈ܕܰܝܗܽܘܢ ܢܶܟܠܳܐ. ܘܝܰܡܺܝܢܗܽܘܢ ܡܰܠܝܳܐ ܫܽܘܚܕܳܐ.
11 ܐܶܢܳܐ ܕܶܝܢ ܒܬܰܡܺܝܡܽܘܬܝ̱ ܗܰܠܟܶܬ. ܦܪܽܘܩܰܝܢܝ̱ ܘܪܰܚܶܡ ܥܠܰܝ.
12 ܘܪܶܓܠܝ̱ ܩܳܡܰܬ ܒܰܬܪܺܝܨܽܘܬܳܐ. ܘܰܒܥܺܕܬܳܐ ܐܶܒܰܪܶܟ ܠܡܳܪܝܳܐ.