Psalms 58
The Book of Psalms
܀ ܡܙܡܘܪܐ ܢܚ ܀
ܡܒܰܕܶܩ ܥܰܠ ܢܶܟ̈ܠܶܐ ܘܦܽܘܖ̈ܣܶܐ ܕܥܰܡ̈ܡܶܐ ܕܶܐܨܛܰܢܰܥܘ ܠܽܘܩܒܰܠ ܡܰܩܒܳܝ̈ܶܐ
1 ܐܺܝܢ ܫܰܪܺܝܪܳܐܺܝܬ ܙܰܕܺܝܩܽܘܬܳܐ ܡܡܰܠܠܺܝܢ ܐܢ̱ܬܽܘܢ. ܘܰܬܪܺܝܨܽܘܬܳܐ ܕܳܝܢܺܝܢ ܐܢ̱ܬܽܘܢ ܒܢܰܝ̈ܢܳܫܳܐ.
2 ܗܳܐ ܟܽܠܟܽܘܢ ܥܰܘܠܳܐ ܡܡܰܠܠܺܝܢ ܐܢ̱ܬܽܘܢ ܒܰܐܪܥܳܐ. ܘܰܒܥܰܘܠܳܐ ܡܥܰܖ̈ܙܠܳܢ ܐܺܝܕܰܝ̈ܟܽܘܢ.
3 ܐܶܬܦܪܶܫܘ ܥܰܘ̈ܳܠܶܐ ܡܶܢ ܟܰܪܣܳܐ. ܘܰܛܥܰܘ ܡܶܢ ܡܰܪܒܥܳܐ ܕܰܡܡܰܠܠܺܝܢ ܕܰܓܳܠܽܘܬܳܐ.
4 ܚܶܡܬܗܽܘܢ ܐܰܝܟ ܕܶܚܘܝܳܐ ܚܰܪܡܳܢܳܐ. ܘܰܐܝܟ ܕܶܐܣܦܶܣ ܚܰܪܫܬܳܐ. ܕܰܡܣܰܟܪܳܐ ܐܶܕܢܶܝ̈ܗ̇.
5 ܕܠܳܐ ܬܶܫܡܰܥ ܩܳܠܳܐ ܕܠܳܚܽܘܫܳܐ ܘܰܕܚܰܒܳܪܳܐ ܘܰܕܚܰܟܺܝܡܳܐ.
6 ܐܰܠܳܗܳܐ ܢܬܰܒܰܪ ܫܶܢܰܝ̈ܗܽܘܢ ܒܦܽܘܡܗܽܘܢ.
7 ܘܢܺܝܒܰܝ̈ܗܽܘܢ ܕܰܐܖ̈ܝܰܘܳܬܳܐ ܥܳܩܰܪ ܡܳܪܝܳܐ. ܢܶܣܬܠܽܘܢ ܐܰܝܟ ܡܰܝ̈ܳܐ ܕܡܶܬܰܐܫܕܺܝܢ. ܘܢܶܫܕܶܐ ܓܶܐܖ̈ܰܘܗ̱ܝ ܥܕܰܡܳܐ ܕܰܢܣܽܘܦܽܘܢ.
8 ܐܰܝܟ ܫܥܽܘܬܳܐ ܕܡܶܬܦܰܫܪܳܐ ܘܢܳܦܠܳܐ ܡܶܢ ܩܕܳܡ ܢܽܘܪܳܐ ܢܶܬܚܰܪܒܽܘܢ. ܢܶܦܠܰܬ ܢܽܘܪܳܐ ܘܠܳܐ ܚܙܰܘ. ܘܫܶܡܫܳܐ ܘܠܳܐ ܐܶܣܬܰܟܰܠܘ.
9 ܢܶܗܘܽܘܢ ܟܽܘܒܰܝ̈ܗܽܘܢ ܗ̈ܰܛܛܶܐ. ܘܪܽܘܓܙܳܐ ܢܕܰܠܰܚ ܐܶܢܽܘܢ.
10 ܢܶܚܕܶܐ ܙܰܕܺܝܩܳܐ ܕܚܳܙܶܐ ܦܽܘܪܥܳܢܳܐ. ܘܺܐܝܕܰܘ̈ܗܝ̱ ܢܫܺܝܓ ܒܰܕܡܶܗ ܕܪܰܫܺܝܥܳܐ.
11 ܘܢܺܐܡܰܪ ܒܰܪܢܳܫܳܐ ܐܺܝܬ ܟܰܝ ܦܺܐܖ̈ܶܐ ܠܙܰܕܺܝܩܳܐ. ܘܺܐܝܬ ܐܰܠܳܗܳܐ ܕܰܢܕܽܘܢ ܐܶܢܽܘܢ ܒܰܐܪܥܳܐ.