Psalms 73
The Book of Psalms
܀ ܡܙܡܘܪܐ ܥܓ ܀
ܐܰܡܺܝܪ ܡܶܢ ܦܰܪܨܽܘܦ ܥܰܡܳܐ ܡܶܢ ܒܳܬܰܪ ܦܽܘܢܳܝܗܽܘܢ ܥܰܠ ܐܰܦܰܝ̈ ܡܶܬܬܰܘܝܳܢܽܘܬܗܽܘܢ ܘܥܰܠ ܕܶܐܬܥܰܕܰܠܘ ܡܰܪܳܚܳܐܺܝܬ ܒܰܐܠܳܗܳܐ ܥܳܒܶܕ ܛܳܒ̈ܳܬܗܽܘܢ ܒܙܰܒܢܳܐ ܕܫܶܒܝܗܽܘܢ
1 ܐܰܠܳܗܳܐ ܛܳܒ ܠܺܝܣܪܳܐܶܝܠ ܘܠܰܒܪܺܝܖ̈ܰܝ ܠܶܒܳܐ.
2 ܘܶܐܢܳܐ ܥܰܕ ܩܰܠܺܝܠ ܡܶܨ̈ܛܰܠܝܳܢ ܗܘܰܝ̈ ܖ̈ܶܓܠܰܝ. ܘܰܐܝܟ ܠܳܐ ܡܶܕܶܡ ܡܶܬܰܐܫ̈ܕܳܢ ܗܘܰܝ̈ ܗܶܠܟ̈ܳܬܝ̱.
3 ܡܶܛܽܠ ܕܛܶܢܶܬ ܒܥܰܘ̈ܳܠܶܐ ܟܰܕ ܚܳܙܶܐ ܗ̱ܘܺܝܬ ܫܠܳܡܳܐ ܕܖ̈ܰܫܺܝܥܶܐ.
4 ܡܶܛܽܠ ܕܠܰܝܬ ܣܳܟܳܐ ܠܡܰܘܬܗܽܘܢ. ܘܣܰܓܺܝܐܳܐ ܗ̱ܝ ܫܳܛܝܽܘܬܗܽܘܢ.
5 ܒܥܰܡܠܳܐ ܕܐ̱ܢܳܫܳܐ ܠܰܝܬ ܐܶܢܽܘܢ. ܘܥܰܡ ܒܢܰܝ̈ܢܳܫܳܐ ܠܳܐ ܡܶܬܢܰܓܕܺܝܢ.
6 ܡܶܛܽܠ ܗܳܢܳܐ ܐܶܚܕܰܬ ܐܶܢܽܘܢ ܡܒܰܣܪܳܢܽܘܬܳܐ. ܘܶܐܬܟܰܣܺܝܘ ܥܰܘܠܗܽܘܢ ܘܪܽܘܫܥܗܽܘܢ.
7 ܘܰܢܦܰܩ ܐܰܝܟ ܬܰܪܒܳܐ ܥܰܘܠܗܽܘܢ. ܘܰܥܒܰܕܘ ܐܰܝܟ ܬܰܪܥܺܝܬܳܐ ܕܠܶܒܳܐ.
8 ܐܶܬܚܰܫܰܒܘ̱ ܘܡܰܠܶܠܘ̱ ܒܺܝܫܬܳܐ. ܘܰܛܠܽܘܡܝܳܐ ܥܰܠ ܡܪܰܝܡܳܐ ܡܰܠܶܠܘ̱.
9 ܣܳܡܘ ܦܽܘܡܗܽܘܢ ܒܰܫܡܰܝܳܐ. ܘܠܶܫܳܢܗܽܘܢ ܡܗܰܠܶܟ ܒܰܐܪܥܳܐ.
10 ܡܶܛܽܠ ܗܳܢܳܐ ܢܶܗܦܽܘܟ ܥܰܡܝ̱ ܠܗܳܪܟܳܐ. ܘܡܰܠܝܳܐܺܝܬ ܢܶܫܟܚܽܘܢ ܠܗܽܘܢ.
11 ܘܢܺܐܡܪܽܘܢ ܐܰܝܟܰܢ ܝܳܕܰܥ ܐܰܠܳܗܳܐ. ܘܺܐܝܬ ܝܺܕܰܥܬܳܐ ܒܰܡܪܰܝܡܳܐ.
12 ܕܗܳܐ ܗܳܠܶܝܢ ܖ̈ܰܫܺܝܥܶܐ ܟܰܗܺܝܢܺܝܢ ܒܥܳܠܡܳܐ ܘܥܰܫܺܝܢܺܝܢ ܒܚܰܝܠܳܐ.
13 ܘܶܐܢܳܐ ܒܰܠܚܽܘܕܰܝ ܕܰܟܺܝܬ ܠܶܒܝ̱. ܘܰܐܫܺܝܓܶܬ ܐܺܝ̈ܕܰܝ ܒܕܰܟܝܽܘܬܳܐ.
14 ܘܰܗܘܺܝܬ ܠܰܡܚܽܘܬܳܐ ܟܽܠܶܗ ܝܰܘܡܳܐ. ܘܡܰܟܣܳܢܽܘܬܝ̱ ܠܨܰܦܪܳܐ.
15 ܐܶܢ ܐܶܡܪܶܬ ܕܶܐܥܒܶܕ ܐܰܟܘܳܬܗܽܘܢ ܥܰܘܠܰܐ ܗ̱ܘ ܒܥܰܝ̈ܢܰܝ.
16 ܥܕܰܡܳܐ ܕܶܐܥܠ ܠܡܰܩܕܫܶܗ ܕܰܐܠܳܗܳܐ. ܘܶܐܬܒܰܝܰܢ ܒܚܰܪܬܗܽܘܢ.
17 ܐܰܝܟ ܢܶܟܠܗܽܘܢ ܬܣܺܝܡ ܠܗܽܘܢ. ܘܬܰܪܡܶܐ ܐܶܢܽܘܢ ܟܰܕ ܢܶܬܬܪܺܝܡܽܘܢ.
18 ܐܰܝܟܰܢ ܗܘܰܘ ܠܬܶܡܗܳܐ ܡܶܢ ܫܶܠܝܳܐ. ܣܳܦܘ ܘܰܓܡܰܪܘ ܡܶܢ ܕܠܽܘܚܝܳܐ.
19 ܐܰܝܟ ܗܰܘ ܕܡܶܬܬܥܺܝܪ ܡܳܐ ܕܰܚܙܳܐ ܚܶܠܡܳܐ. ܡܳܪܝܳܐ ܒܰܩܪܺܝܬܳܐ ܨܰܠܡܗܽܘܢ ܬܫܽܘܛ.
20 ܘܶܐܢܳܐ ܐܶܬܕܰܠܰܚ ܠܶܒܝ̱ ܘܟܽܘ̈ܠܝܳܬܝ̱ ܐܶܫ̈ܬܰܢܺܝ.
21 ܘܶܐܢܳܐ ܒܪܺܝܪ ܗ̱ܘܺܝܬ ܘܠܳܐ ܝܳܕܰܥ. ܘܰܒܥܺܝܪܳܐ ܗܘܺܝܬ ܥܰܡܳܟ.
22 ܒܬܰܪܥܺܝܬܳܟ ܒܰܝܰܐܰܝܢܝ̱. ܘܒܳܬܰܪ ܐܺܝܩܳܪܳܟ ܕܰܒܰܪܰܝܢܝ̱.
23 ܡܳܢܳܐ ܐܺܝܬ ܠܺܝ ܒܰܫܡܰܝܳܐ ܥܰܡܳܟ. ܘܡܳܢܳܐ ܨܒܺܝܬ ܒܰܐܪܥܳܐ.
24 ܕܶܐܚܰܕܬ ܐܺܝܕܝ̱ ܕܝܰܡܺܝܢܳܐ.
25 ܘܰܓܡܰܪ ܠܶܒܝ̱ ܘܒܶܣܪܝ̱ ܘܥܽܘܫܢܶܗ ܕܠܶܒܝ̱. ܡܢܳܬܝ̱ ܒܰܐܠܳܗܳܐ ܗ̱ܝ ܠܥܳܠܰܡ.
26 ܡܶܛܽܠ ܕܗܳܐ ܖ̈ܰܚܺܝܩܰܝܟ ܢܺܐܒܕܽܘܢ. ܘܬܰܘܒܶܕ ܠܟܽܠ ܕܛܳܥܶܝܢ ܡܶܢܳܟ ܠܥܳܠܰܡ.
27 ܘܶܐܢܳܐ ܨܒܺܝܬ ܕܶܐܬܩܰܪܰܒ ܠܰܐܠܳܗܳܐ. ܛܐܶܒ ܠܺܝ ܫܡܳܟ ܡܳܪܝܳܐ ܬܽܘܟܠܳܢܝ̱. ܕܶܐܫܬܰܥܶܐ ܟܽܠܗܶܝܢ ܬܶܕܡܖ̈ܳܬܳܟ.