Psalms 65
The Book of Psalms
܀ ܡܙܡܘܪܐ ܣܗ ܀
ܥܰܠ ܥܰܡܳܐ ܕܰܒܒܳܒܶܠ ܕܡܶܬܝܰܐܒܺܝܢ ܠܦܽܘܢܳܝܳܐ
1 ܠܳܟ ܝܳܐܝܳܐ ܬܶܫܒܽܘܚܬܳܐ ܐܰܠܳܗܳܐ ܒܨܶܗܝܽܘܢ. ܘܠܳܟ ܡܶܬܦܪܰܥ ܢܶܕܪܳܐ ܫܡܰܥ ܨܠܽܘܬܝ̱.
2 ܠܘܳܬܳܟ ܟܽܠ ܒܣܰܪ ܢܺܐܬܶܐ.
3 ܡ̈ܶܠܶܐ ܕܥܰܘ̈ܳܠܶܐ ܥܫܶܢܶܝ̈ܢ ܡܶܢܝ̱. ܘܰܚܛܳܗܰܝ̈ ܐܰܢ̱ܬ ܬܚܰܣܶܐ ܐܶܢܽܘܢ.
4 ܛܽܘܒܰܘܗ̱ܝ ܠܡܰܢ ܕܨܳܒܶܐ ܐܰܢ̱ܬ ܒܶܗ. ܘܰܡܩܰܪܶܒ ܐܰܢ̱ܬ ܠܶܗ ܕܢܶܥܡܰܪ ܒܕܰܝܪܳܟ. ܘܢܶܣܒܰܥ ܡܶܢ ܛܳܒ̈ܳܬܶܗ ܕܒܰܝܬܳܟ.
5 ܘܡܶܢ ܩܰܕܺܝܫܽܘܬܶܗ ܕܗܰܝܟܠܳܟ. ܘܡܶܢ ܙܰܕܺܝܩܽܘܬܳܟ ܕܚܺܝܠܬܳܐ. ܥܢܺܝܢܝ̱ ܐܰܠܳܗܳܐ ܦܳܪܽܘܩܰܢ. ܣܰܒܪܳܐ ܕܟܽܠܗܽܘܢ ܣܰܘ̈ܦܶܝܗ̇ ܕܰܐܪܥܳܐ ܘܰܕܥܰܡ̈ܡܶܐ ܖ̈ܰܚܺܝܩܶܐ.
6 ܡܰܬܩܶܢ ܛܽܘܖ̈ܶܐ ܒܚܰܝܠܶܗ ܘܡܶܬܥܰܫܰܢ ܒܓܰܢ̱ܒܳܪܽܘܬܶܗ.
7 ܡܫܰܬܶܩ ܡܰܚܫܽܘ̈ܠܶܐ ܕܝܰܡ̈ܡܶܐ ܘܩܳܠܳܐ ܕܓܰܠܠܰܝ̈ܗܽܘܢ.
8 ܘܢܶܬܕܰܠܚܽܘܢ ܥܰܡ̈ܡܶܐ ܘܢܶܕܚܠܽܘܢ ܥܳܡܽܘܖ̈ܶܝܗ̇ ܕܰܐܪܥܳܐ. ܡܶܢ ܐܳܬܘ̈ܳܬܳܟ ܘܡܶܢ ܡܰܦܳܩܰܝ̈ ܨܰܦܪܳܐ ܘܪܰܡܫܳܐ.
9 ܒܫܽܘܒܚܳܐ ܐܶܬܕܟܰܪܬܳܗ̇ ܠܰܐܪܥܳܐ. ܐܰܫܠܺܝܬܳܗ̇ ܘܰܒܣܽܘܓܳܐܐ ܐܰܥܬܰܪܬܳܗ̇. ܬܰܦ̈ܶܐ ܕܰܐܠܳܗܳܐ ܡܰܠܝ̈ܳܢ ܡܰܝ̈ܳܐ. ܛܰܝܶܒܬ ܡܶܐܟܽܘܠܬܗܽܘܢ ܟܰܕ ܬܰܩܶܢܬܳܗ̇.
10 ܟܖ̈ܳܒܶܝܗ̇ ܐܰܪܘܺܝܬ ܕܢܶܬܪܰܒܽܘܢ ܦܺܐܖ̈ܶܝܗ̇. ܒܰܖ̈ܣܺܝܣܶܐ ܬܶܬܪܰܒܶܐ ܘܡܰܘܥܺܝܬܳܗ̇ ܬܶܬܒܰܪܰܟ.
11 ܒܰܪܶܟ ܟܠܺܝܠܳܐ ܕܫܰܢ̱ܬܳܐ ܒܛܰܝܒܽܘܬܳܟ. ܘܥܶܓܠܰܝ̈ܟ ܢܶܣܒܥܽܘܢ ܬܰܕܐܳܐ.
12 ܘܢܶܣܒܥܽܘܢ ܡܶܢ ܕܰܝܖ̈ܶܐ ܕܰܒܡܰܕܒܪܳܐ. ܒܫܽܘܒܚܳܐ ܖ̈ܳܡܳܬܳܐ ܢܶܬܚܰܙܩܳ̈ܢ.
13 ܘܢܶܠܒܫܽܘܢ ܫܰܡܺܝ̈ܢܶܐ ܕܥܳܢܳ̈ܐ. ܘܥܽܘܡ̈ܩܶܐ ܢܶܬܡܠܽܘܢ ܥܒܽܘܪܳܐ. ܘܢܶܪܘܙܽܘܢ ܘܰܢܫܰܒܚܽܘܢ.