Psalms 76
The Book of Psalms
܀ ܡܙܡܘܪܐ ܥܘ ܀
ܡܶܬܢܰܒܶܐ ܥܰܠ ܙܳܟܽܘܬܳܐ ܕܰܗܘܳܬ ܠܥܰܡܳܐ ܠܽܘܩܒܰܠ ܐܳܬܽܘܖ̈ܳܝܶܐ ܒܝܰܘ̈ܡܳܬܶܗ ܕܚܶܙܰܩܝܳܐ
1 ܝܺܕܺܝܥ ܒܺܝܗܽܘܕܳܐ ܐܰܠܳܗܳܐ. ܘܒܺܝܣܪܳܐܶܝܠ ܪܰܒ ܫܡܶܗ.
2 ܢܶܗܘܶܐ ܒܫܳܠܺܝܡ ܡܰܛܠܠܶܗ. ܘܡܰܥܡܪܶܗ ܒܨܶܗܝܽܘܢ.
3 ܬܰܡܳܢ ܬܰܒܰܪ ܕܖ̈ܳܥܶܐ ܕܩܶܫ̈ܬܳܬܳܐ. ܙܰܝܢܳܐ ܘܣܰܝܦܳܐ ܒܰܩܪܳܒܳܐ.
4 ܢܰܗܺܝܪ ܐܰܢ̱ܬ ܘܰܡܫܺܝܚ ܡܶܢ ܛܽܘܪܳܟ ܥܰܫܺܝܢܳܐ.
5 ܐܶܬܕܰܠܰܚܘ ܟܽܠܗܽܘܢ ܣܰܟ̈ܠܰܝ ܠܶܒܳܐ. ܘܰܕܡܶܟܘ ܫܶܢܰܬܗܽܘܢ ܓܰܒܖ̈ܶܐ ܚܰܝܠ̈ܬܳܢܶܐ.
6 ܘܠܳܐ ܐܶܫܟܰܚܘ ܐܺܝ̈ܕܰܝܗܽܘܢ ܡܶܢ ܟܳܐܬܳܟ ܐܰܠܳܗܶܗ ܕܝܰܥܩܽܘܒ. ܢܳܡܘ ܖ̈ܳܟܒܰܝ ܖ̈ܰܟܫܳܐ ܘܰܐܢ̱ܬ ܕܚܺܝܠ ܐܰܢ̱ܬ.
7 ܡܰܢܽܘ ܢܩܽܘܡ ܩܕܳܡܰܝܟ ܒܗܳܢܳܐ ܪܽܘܓܙܳܐ.
8 ܡܶܢ ܫܡܰܝܳܐ ܐܰܫܡܰܥܬ ܕܺܝܢܳܐ. ܐܰܪܥܳܐ ܚܙܳܬ ܘܕܶܚܠܰܬ.
9 ܡܳܐ ܕܩܳܐܶܡ ܐܰܠܳܗܳܐ ܠܰܡܕܳܢ ܘܰܠܡܶܦܪܰܩ ܠܟܽܠܗܽܘܢ ܡܶܣ̈ܟܺܢܶܐ ܕܰܐܪܥܳܐ.
10 ܡܶܛܽܠ ܕܬܰܪܥܺܝܬܶܗ ܕܒܰܪܢܳܫܳܐ ܬܰܘܕܶܐ ܠܳܟ. ܘܫܰܪܟܳܐ ܕܚܶܡܬܶܗ ܬܰܦܪܶܩ ܪܽܘܓܙܳܐ.
11 ܢܕܽܘܪܘ ܘܫܰܠܶܡܘ ܠܡܳܪܝܳܐ ܐܰܠܳܗܟܽܘܢ. ܟܽܠ ܕܰܚܕܺܝܪܺܝܢ ܠܶܗ ܢܰܘܒܠܽܘܢ ܩܽܘܖ̈ܒܳܢܶܐ ܠܰܕܚܺܝܠܳܐ.
12 ܕܰܡܡܰܟܶܟ ܪܽܘܚܳܐ ܕܫܰܠܺܝ̈ܛܳܢܶܐ. ܘܰܕܚܺܝܠ ܥܰܠ ܡܰܠ̈ܟܶܐ ܕܰܐܪܥܳܐ.