Psalms 59
The Book of Psalms
܀ ܡܙܡܘܪܐ ܢܛ ܀
ܐܰܡܺܝܪ ܡܶܢ ܦܰܪܨܽܘܦ ܡܰܩܒܳܝ̈ܶܐ. ܐܰܝܟ ܡܰܢ ܕܫܳܐܠܺܝܢ ܦܽܘܪܩܳܢܳܐ
1 ܦܰܨܳܢܝ̱ ܡܶܢ ܒܥܶܠܕ̈ܒܳܒܰܝ ܐܰܠܳܗܳܐ. ܘܡܶܢ ܐܰܝܠܶܝܢ ܕܩܳܝܡܺܝܢ ܥܠܰܝ ܐܰܪܺܝܡܰܝܢܝ̱.
2 ܦܰܨܳܢܝ̱ ܡܶܢ ܥܳܒ̈ܕܰܝ ܫܽܘܩܪܳܐ. ܘܡܶܢ ܓܰܒܖ̈ܶܐ ܐܳܫ̈ܕܰܝ ܕܡܳܐ ܦܪܽܘܩܰܝܢܝ̱.
3 ܡܶܛܽܠ ܕܗܶܢܽܘܢ ܟܡܶܢܘ ܠܢܰܦܫܝ̱. ܘܰܐܥܫܶܢܘ ܥܠܰܝ ܒܺܝܫܽܘܬܗܽܘܢ. ܠܳܐ ܒܣܰܟ̈ܠܘܳܬܝ̱ ܘܠܳܐ ܒܰܚܛܳܗܰܝ̈ ܡܳܪܝ.
4 ܕܠܳܐ ܒܣܰܟܠܽܘܬܳܐ ܪܗܶܛܘ ܥܠܰܝ ܘܶܐܬܛܰܝܰܒܘ ܥܠܰܝ.
5 ܐܶܬܬܥܺܝܪ ܘܰܚܙܺܝ ܐܰܢ̱ܬ ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ. ܐܰܠܳܗܶܗ ܕܺܝܣܪܳܐܶܝܠ ܐܶܬܬܥܺܝܪ. ܘܰܦܩܽܘܕ ܠܟܽܠܗܽܘܢ ܥܰܡ̈ܡܶܐ. ܘܠܳܐ ܬܶܫܒܽܘܩ ܠܟܽܠܗܽܘܢ ܥܰܘ̈ܳܠܶܐ.
6 ܢܶܗܦܟܽܘܢ ܒܪܰܡܫܳܐ ܘܢܶܥܘܢ ܐܰܝܟ ܟܰܠܒ̈ܶܐ. ܘܢܶܬܟܰܪܟܽܘܢ ܡܕܺܝܢ̱ܬܳܐ.
7 ܡܺܐܡܪܳܐ ܕܦܽܘܡܗܽܘܢ ܣܰܦܣܺܪܳܐ ܒܣܶܦ̈ܘܳܬܗܽܘܢ. ܘܳܐܡܪܺܝܢ ܡܰܢܽܘ ܫܳܡܰܥ.
8 ܘܰܐܢ̱ܬ ܡܳܪܝܳܐ ܓܚܰܟ ܥܠܰܝܗܽܘܢ. ܘܡܰܝܶܩ ܥܰܠ ܟܽܠܗܽܘܢ ܥܰܡ̈ܡܶܐ.
9 ܐܰܠܳܗܳܐ ܠܳܟ ܐܶܫܰܒܰܚ. ܡܶܛܽܠ ܕܰܐܢ̱ܬ ܗܽܘ ܒܶܝܬ ܓܰܘܣܝ̱.
10 ܐܰܠܳܗܳܐ ܛܰܝܒܽܘܬܳܟ ܬܩܰܕܡܰܢܝ̱. ܐܰܠܳܗܳܐ ܚܰܘܳܢܝ̱ ܒܰܒܥܶܠܕ̈ܒܳܒܰܝ.
11 ܠܳܐ ܬܶܩܛܽܘܠ ܐܶܢܽܘܢ ܕܠܳܐ ܢܰܛܥܽܘܢ ܠܥܰܡܝ̱. ܐܶܠܳܐ ܐܰܙܺܝܥ ܐܶܢܽܘܢ ܒܚܰܝܠܳܟ ܘܰܐܢܺܝܕ ܐܶܢܽܘܢ ܡܳܪܝܳܐ ܬܽܘܟܠܳܢܝ̱.
12 ܚܛܺܝܬܳܐ ܕܦܽܘܡܗܽܘܢ ܡܰܠܶܠ ܣܶܦ̈ܘܳܬܗܽܘܢ. ܢܶܬܬܰܚܕܽܘܢ ܒܫܽܘܒܗܳܪܗܽܘܢ. ܡܶܛܽܠ ܕܠܰܘܛܬܳܐ ܘܕܰܓܳܠܽܘܬܳܐ ܡܶܫܬܰܥܶܝܢ.
13 ܐܰܘܒܶܕ ܐܶܢܽܘܢ ܒܪܽܘܓܙܳܟ ܐܰܘܒܶܕ ܐܶܢܽܘܢ ܘܠܳܐ ܢܶܫܬܰܟܚܽܘܢ. ܕܢܶܕܥܽܘܢ ܕܰܐܠܳܗܳܐ ܫܰܠܺܝܛ ܥܰܠ ܝܰܥܩܽܘܒ ܘܥܰܠ ܥܶܒܖ̈ܶܝܗ̇ ܕܰܐܪܥܳܐ.
14 ܢܶܗܦܟܽܘܢ ܒܪܰܡܫܳܐ ܘܰܢܥܳܘܽܘܢ ܐܰܝܟ ܟܰܠܒ̈ܶܐ. ܘܢܶܬܟܰܪܟܽܘܢ ܡܕܺܝܢ̱ܬܳܐ.
15 ܢܶܒܥܽܘܢ ܠܡܶܐܟܰܠ ܘܠܳܐ ܢܶܣܒܥܽܘܢ ܘܠܳܐ ܢܒܽܘܬܽܘܢ.
16 ܘܶܐܢܳܐ ܐܶܫܰܒܰܚ ܠܚܰܝܠܳܟ. ܘܶܐܫܰܒܰܚ ܒܨܰܦܪܳܐ ܠܛܰܝܒܽܘܬܳܟ. ܡܶܛܽܠ ܕܰܗܘܰܝܬ ܠܺܝ ܒܶܝܬ ܓܰܘܣܳܐ ܘܰܡܦܰܨܝܳܢܳܐ ܒܝܰܘܡܳܐ ܕܽܐܘܠܨܳܢܳܐ.
17 ܐܰܠܳܗܳܐ ܠܳܟ ܐܶܙܰܡܰܪ. ܡܶܛܽܠ ܕܰܐܢ̱ܬ ܗܽܘ ܐܰܠܳܗܳܐ ܕܒܶܝܬ ܓܰܘܣܝ̱ ܘܰܐܠܳܗܳܐ ܕܛܰܝܒܽܘܬܝ̱.