Psalms 66
The Book of Psalms
܀ ܡܙܡܘܪܐ ܣܘ ܀
ܐܰܡܺܝܪ ܥܰܠ ܦܽܘܢܳܝܳܐ. ܡܶܢ ܦܰܪܨܽܘܦ ܬܰܡܺܝ̈ܡܶܐ ܕܰܒܗܽܘܢ
1 ܫܰܒܰܚܘ ܠܰܐܠܳܗܳܐ ܟܽܠܳܗ̇ ܐܰܪܥܳܐ.
2 ܙܡܰܪܘ ܠܺܐܝܩܳܪܳܐ ܕܰܫܡܶܗ ܙܡܰܪܘ ܠܺܐܝܩܳܪܳܐ ܕܬܶܫܒܽܘܚܬܶܗ.
3 ܐܶܡܰܪܘ ܠܰܐܠܳܗܳܐ ܡܳܐ ܕܚܺܝܠܺܝܢ ܥܒܳܕܰܝ̈ܟ. ܒܣܽܘܓܳܐܐ ܕܥܽܘܫܢܳܟ ܢܶܬܟܰܕܒܽܘܢ ܠܳܟ ܒܥܶܠܕ̈ܒܳܒܰܝܟ.
4 ܒܟܽܠܳܗ̇ ܐܰܪܥܳܐ ܢܶܣܓܕܽܘܢ ܠܳܟ ܘܰܢܙܰܡܪܽܘܢ ܠܳܟ. ܘܰܢܫܰܒܚܽܘܢ ܠܰܫܡܳܟ ܠܥܳܠܡܺܝܢ.
5 ܘܢܺܐܡܪܽܘܢ ܕܬܰܘ ܚܙܰܘ ܥܒܳܕܰܘ̈ܗܝ ܕܰܐܠܳܗܳܐ. ܕܣܰܓܺܝܐܳܢ ܬܶܕܡܖ̈ܳܬܶܗ ܥܰܠ ܒܢܰܝ̈ܢܳܫܳܐ.
6 ܕܰܗܦܰܟ ܝܰܡܳܐ ܠܝܰܒܫܳܐ. ܘܰܠܢܰܗܪܳܐ ܥܰܒܪܽܘܗ̱ܝ ܡܶܢ ܪܓܶܠ.
7 ܬܰܡܳܢ ܢܶܚܕܶܐ ܒܶܗ ܡܰܢ ܕܫܰܠܺܝܛ ܒܓܰܢ̱ܒܳܪܽܘܬܶܗ ܠܥܳܠܰܡ. ܥܰܝ̈ܢܰܘܗ̱ܝ ܒܥܰܡ̈ܡܶܐ ܚܳܝܖ̈ܳܢ. ܘܡܳܖ̈ܽܘܕܶܐ ܠܳܐ ܢܶܬܬܪܺܝܡܽܘܢ ܠܥܳܠܰܡ.
8 ܒܰܪܶܟܘ̱ ܥܰܡ̈ܡܶܐ ܠܰܐܠܳܗܳܐ ܘܰܐܫܡܰܥܘ̱ ܩܳܠܳܐ ܕܫܽܘܒܚܶܗ.
9 ܕܣܳܡ ܢܰܦܫܰܢ ܒܚܰܝ̈ܶܐ. ܘܠܳܐ ܝܰܗܒ ܪܶܓܠܰܢ ܠܙܰܘܥܬܳܐ.
10 ܡܶܛܽܠ ܕܰܒܚܰܪܬܳܢ ܐܰܠܳܗܳܐ ܘܰܒܩܰܝܬܳܢ. ܐܰܝܟ ܕܒܳܩܶܝܢ ܠܣܺܐܡܳܐ.
11 ܐܰܥܶܠܬܳܢ ܒܰܡܨܺܝܕܬܳܐ ܘܰܥܒܰܕܬ ܐܽܘܠܨܳܢܳܐ ܒܚܰܨܰܝ̈ܢ.
12 ܐܰܪܟܶܒܬ ܒܰܪܢܳܫܳܐ ܥܰܠ ܪܺܝܫܰܢ. ܐܰܥܶܠܬܳܢ ܒܢܽܘܪܳܐ ܘܰܒܡܰܝ̈ܳܐ ܘܰܐܦܶܩܬܳܢ ܠܰܪܘܰܚܬܳܐ.
13 ܐܺܬܶܐ ܠܒܰܝܬܳܟ ܒܺܐܝܩܳܪܳܐ ܘܶܐܦܪܥܳܟ ܢܶܕܖ̈ܰܝ.
14 ܡܶܕܶܡ ܕܰܦܬܰܚ̈ܝ ܣܶܦ̈ܘܳܬܝ ܒܡܰܡܠܠܶܗ ܕܦܽܘܡܝ̱ ܒܽܐܘܠܨܳܢܳܐ.
15 ܝܰܩ̈ܕܶܐ ܫܰܡܺܝ̈ܢܶܐ ܐܰܣܶܩ ܠܳܟ ܥܰܡ ܣܘܳܬܳܐ ܕܕܶܟܖ̈ܶܐ. ܘܶܐܥܒܶܕ ܬܰܘܖ̈ܶܐ ܘܰܓܕܰܝ̈ܳܐ.
16 ܬܰܘ ܫܡܰܥܘ ܘܶܐܫܬܰܥܶܐ ܠܟܽܘܢ. ܟܽܠܟܽܘܢ ܥܰܒܕܰܘ̈ܗܝ ܕܰܐܠܳܗܳܐ. ܡܶܕܶܡ ܕܰܥܒܰܕ ܠܢܰܦܫܝ̱.
17 ܒܦܽܘܡܝ̱ ܩܪܺܝܬܶܗ. ܘܰܥܢܳܢܝ̱ ܘܪܰܡܪܶܡܬܶܗ ܒܠܶܫܳܢܝ̱.
18 ܥܰܘܠܳܐ ܐܶܢ ܚܙܰܝܬ ܒܠܶܒܝ̱ ܠܳܐ ܬܶܦܪܽܘܩܰܝܢܝ̱ ܡܳܪܝܳܐ.
19 ܗܳܝܕܶܝܢ ܫܡܰܥ ܐܰܠܳܗܳܐ ܩܳܠܳܐ ܕܒܳܥܽܘܬܝ̱.
20 ܒܪܺܝܟ ܗܽܘ ܡܳܪܝܳܐ ܕܠܳܐ ܐܰܥܒܰܪ ܨܠܽܘܬܝ̱ ܘܛܰܝܒܽܘܬܶܗ ܡܶܢܝ̱.