Psalms 109
The Book of Psalms
܀ ܡܙܡܘܪܐ ܩܛ ܀
ܡܶܫܬܰܥܶܐ ܥܰܠ ܡܰܩܒܳܝ̈ܶܐ ܕܰܟܡܳܐ ܒܺܝ̈ܫܳܬܳܐ ܣܒܰܠܘ ܡܶܢ ܢܽܘܟܖ̈ܳܝܶܐ: ܘܰܟܡܳܐ ܡܶܢ ܒܢܰܝ̈ ܥܰܡܗܽܘܢ. ܘܡܶܬܟܰܫܦܺܝܢ ܠܰܐܠܳܗܳܐ ܢܝܰܬܶܐ ܡܣܳܡ ܒܪܺܝܫܳܐ ܥܰܠ ܐܰܝܠܶܝܢ ܕܰܐܣܒܶܠܘ ܐܶܢܽܘܢ
1 ܐܰܠܳܗܳܐ ܕܬܶܫܒܽܘܚܬܝ̱ ܠܳܐ ܬܶܫܬܽܘܩ.
2 ܡܶܛܽܠ ܕܦܽܘܡܶܗ ܕܪܰܫܺܝܥܳܐ ܘܦܽܘܡܶܗ ܕܢܰܟܽܘܠܬܳܢܳܐ ܐܶܬܦܬܰܚ ܥܠܰܝ.
3 ܡܰܠܶܠܘ̱ ܥܰܡܝ̱ ܒܠܶܫܳܢܳܐ ܕܰܓܳܠܳܐ ܘܰܒܩܳܠܳܐ ܕܣܶܢܶܐܬܳܐ ܘܶܐܬܟܰܬܰܫܘ̱ ܥܰܡܝ̱ ܣܪܺܝܩܳܐܺܝܬ.
4 ܘܰܚܠܳܦ ܪܶܚܡܰܬܝ̱ ܣܰܩܪܽܘܢܝ̱ ܘܶܐܢܳܐ ܡܨܰܠܶܐ ܗ̱ܘܺܝܬ ܥܠܰܝܗܽܘܢ.
5 ܦܰܪܥܽܘܢܝ̱ ܒܺܝܫܬܳܐ ܚܠܳܦ ܛܳܒܬܳܐ ܘܣܶܢܶܐܬܳܐ ܚܠܳܦ ܪܶܚܡܬܳܐ.
6 ܦܩܽܘܕ ܥܠܰܝܗܽܘܢ ܥܰܘܠܳܐ ܘܣܳܛܳܢܳܐ ܢܩܽܘܡ ܡܶܢ ܝܰܡܺܝܢܗܽܘܢ.
7 ܘܡܳܐ ܕܡܶܬܕܺܝܢܺܝܢ ܢܶܦܩܽܘܢ ܟܰܕ ܚܰܝܳܒܺܝܢ ܘܰܨܠܽܘܬܗܽܘܢ ܬܶܗܘܶܐ ܚܛܺܝܬܳܐ.
8 ܢܶܗܘܽܘܢ ܝܰܘܡܰܝ̈ܗܽܘܢ ܙܥܽܘܖ̈ܺܝܢ ܘܡܶܕܶܡ ܕܡܰܛܰܪ ܠܗܽܘܢ ܐ̱ܚܖ̈ܳܢܶܐ ܢܶܣܒܽܘܢ.
9 ܢܶܗܘܽܘܢ ܒܢܰܝ̈ܗܽܘܢ ܝܰܬܡ̈ܶܐ ܘܢܶܫܰܝ̈ܗܽܘܢ ܐܰܖ̈ܡܠܳܬܳܐ.
10 ܢܩܽܘܡ ܡܳܪܶܐ ܚܰܘܒܳܐ ܥܰܠ ܟܽܠ ܕܺܐܝܬ ܠܗܽܘܢ ܘܢܶܒܨܽܘܢ ܢܽܘܟܖ̈ܳܝܶܐ ܚܰܝܠܗܽܘܢ.
11 ܘܠܳܐ ܢܶܗܘܶܐ ܠܗܽܘܢ ܡܪܰܚܡܳܢܳܐ ܘܠܳܐ ܢܶܗܘܶܐ ܕܰܡܪܰܚܶܡ ܥܰܠ ܝܰܬܡܰܝ̈ܗܽܘܢ.
12 ܬܶܗܘܶܐ ܚܰܪܬܗܽܘܢ ܠܰܐܒܕܳܢܳܐ ܘܰܠܕܳܪܳܐ ܐ̱ܚܪܳܝܳܐ ܢܶܬܥܛܶܐ ܫܶܡܗܽܘܢ.
13 ܢܶܬܕܟܰܪ ܥܰܘܠܳܐ ܕܰܐܒܳܗܰܝ̈ܗܽܘܢ ܘܰܚܛܳܗ̈ܶܐ ܕܶܐܡ̈ܗܳܬܗܽܘܢ ܠܳܐ ܢܶܬܥܛܽܘܢ.
14 ܐܶܠܳܐ ܢܶܗܘܽܘܢ ܩܕܳܡ ܡܳܪܝܳܐ ܒܟܽܠܙܒܰܢ ܘܢܰܘܒܶܕ ܡܶܢ ܐܰܪܥܳܐ ܕܽܘܟܪܳܢܗܽܘܢ.
15 ܥܰܠ ܕܠܳܐ ܥܶܗܰܕܘ ܠܡܶܥܒܰܕ ܛܳܒܬܳܐ ܘܰܪܕܰܦܘ ܠܡܶܣܟܺܢܳܐ ܘܰܠܒܳܝܫܳܐ ܘܠܰܕܡܰܟܐܰܒ ܠܶܒܶܗ ܠܡܰܘܬܳܐ.
16 ܪܚܶܡܘ ܠܰܘ̈ܛܳܬܳܐ ܘܠܳܐ ܨܒܰܘ ܒܒܽܘܖ̈ܟܳܬܳܐ. ܘܰܠܒܶܫܘ ܠܰܘ̈ܛܳܬܳܐ ܐܰܝܟ ܙܰܝܢܳܐ.
17 ܘܥ̣ܰܠ̈ܝ ܒܗܽܘܢ ܐܰܝܟ ܡܰܝ̈ܳܐ ܘܰܐܝܟ ܡܶܫܚܳܐ ܒܓܰܖ̈ܡܰܝܗܽܘܢ.
18 ܬܶܗܘܶܐ ܠܗܽܘܢ ܐܰܝܟ ܡܰܪܛܽܘܛܳܐ ܕܡܶܬܟܰܣܶܝܢ ܘܰܐܝܟ ܐܶܣܳܪ ܚܰܨ̈ܶܐ ܒܟܽܠܙܒܰܢ.
19 ܗܳܢܰܘ ܥܒܳܕܳܐ ܕܰܐܝܠܶܝܢ ܕܣܳܩܪܺܝܢ ܠܡܳܪܝܳܐ ܘܕܰܐܝܠܶܝܢ ܕܰܡܡܰܠܠܺܝܢ ܒܺܝܫܬܳܐ ܥܰܠ ܢܰܦܫܝ̱.
20 ܘܰܐܢ̱ܬ ܡܳܪܝܳܐ ܥܒܶܕ ܥܰܡܝ̱ ܡܶܛܽܠ ܫܡܳܟ. ܡܶܛܽܠ ܕܛܳܒܳܐ ܗ̱ܝ ܛܰܝܒܽܘܬܳܟ ܦܰܨܳܢܝ̱.
21 ܡܶܛܽܠ ܕܡܶܣܟܺܢܳܐ ܐ̱ܢܳܐ ܘܒܳܝܫܳܐ ܘܠܶܒܝ̱ ܐܶܬܕܰܠܰܚ ܒܓܰܘܝ̱.
22 ܘܰܐܝܟ ܛܶܠܳܠܳܐ ܐܶܬܖ̈ܟܶܢܝ ܗܶܠܟ̈ܳܬܝ̱ ܘܶܐܬܢܰܦܨܶܬ ܐܰܝܟ ܩܰܡܨܳܐ.
23 ܘܒܽܘܖ̈ܟܰܝ ܐܶܬܟܖ̈ܰܗܝ ܡܶܢ ܨܰܘܡܳܐ ܘܒܶܣܪܝ̱ ܢܚܶܒ ܡܶܢ ܡܶܫܚܳܐ.
24 ܘܶܐܢܳܐ ܗܘܺܝܬ ܠܗܽܘܢ ܠܚܶܣܕܳܐ. ܚܙܰܐܢܝ̱ ܘܰܐܢܺܝܕܘ ܒܖ̈ܺܝܫܰܝܗܽܘܢ.
25 ܥܰܕܰܪܰܝܢܝ̱ ܡܳܪܝܳܐ ܐܰܠܳܗܝ ܘܰܦܪܽܘܩܰܝܢܝ̱ ܐܰܝܟ ܛܰܝܒܽܘܬܳܟ.
26 ܕܢܶܕܥܽܘܢ ܕܕܺܝܠܳܟ ܗܺܝ ܗܳܕܶܐ ܘܰܐܢ̱ܬ ܥܒܰܕܬܳܗ̇.
27 ܢܶܬܬܠܺܝܛܽܘܢ ܗܶܢܽܘܢ ܘܰܐܢ̱ܬ ܬܶܬܒܰܪܰܟ ܘܥܰܒܕܳܟ ܢܶܚܕܶܐ.
28 ܢܶܠܒܫܽܘܢ ܒܶܗܬܬܳܐ ܐܰܝܠܶܝܢ ܕܣܳܩܪܺܝܢ ܗ̱ܘܰܘ ܠܺܝ ܘܢܶܬܥܰܛܦܽܘܢܳܗ̇ ܐܰܝܟ ܦܪܺܝܣܳܐ.
29 ܐܰܘܕܶܐ ܠܡܳܪܝܳܐ ܒܦܽܘܡܝ̱ ܘܒܰܝܢܳܬ ܣܰܓܺܝ̈ܐܶܐ ܐܶܫܰܒܚܺܝܘܗ̱ܝ.
30 ܡܶܛܽܠ ܕܩܳܡ ܡܶܢ ܝܰܡܺܝܢܶܗ ܕܒܳܝܫܳܐ ܠܡܶܦܪܰܩ ܢܰܦܫܶܗ ܡܶܢ ܕܺܝܢܳܐ.