Psalms 101
The Book of Psalms
܀ ܡܙܡܘܪܐ ܩܐ ܀
ܐܰܡܺܝܪ ܡܶܢ ܦܰܪܨܽܘܦ ܡܝܰܬܖ̈ܶܐ ܕܰܒܥܰܡܳܐ ܕܰܒܒܳܒܶܠ ܒܙܰܒܢܳܐ ܕܥܳܩ̈ܳܬܗܽܘܢ
ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܡܶܬܢܰܒܶܐ ܒܰܕܡܽܘܬ ܬܶܫܒܽܘܚܬܳܐ ܘܬܰܘܕܺܝܬܳܐ
1 ܛܰܝܒܽܘܬܳܐ ܘܕܺܝܢܳܐ ܐܶܙܰܡܰܪ ܘܠܳܟ ܐܶܫܰܒܰܚ ܡܳܪܝܳܐ.
2 ܘܶܐܗܰܠܶܟ ܒܽܐܘܪܚܳܟ ܕܠܳܐ ܡܽܘܡ. ܥܕܰܡܳܐ ܠܶܐܡܰܬܝ̱ ܬܺܐܬܶܐ ܠܘܳܬܝ̱. ܗܰܠܟܶܬ ܒܬܰܡܺܝܡܽܘܬܶܗ ܕܠܶܒܝ̱ ܒܓܰܘ ܒܰܝܬܝ̱.
3 ܘܠܳܐ ܣܳܡܶܬ ܠܽܘܩܒܰܠ ܥܰܝ̈ܢܰܝ ܡܶܠܬܳܐ ܕܥܰܘܠܳܐ. ܠܰܕܥܳܒܶܕ ܒܺܝܫܬܳܐ ܣܢܺܝܬ ܘܠܳܐ ܢܩܶܦ ܠܺܝ.
4 ܠܶܒܳܐ ܒܺܝܫܳܐ ܥܒܰܪ ܡܶܢܝ̱ ܘܒܺܝܫܬܐ ܠܳܐ ܝܶܕܥܶܬ.
5 ܠܡܰܢ ܕܳܐܟܶܠ ܩܰܪܨܳܐ ܕܚܰܒܪܶܗ ܒܣܶܬܪܳܐ ܡܰܘܒܶܕ ܗ̱ܘܺܝܬ. ܠܰܕܖ̈ܳܡܳܢ ܥܰܝ̈ܢܰܘܗ̱ܝ ܘܰܪܘܺܝܚ ܠܶܒܶܗ ܥܰܡܶܗ ܠܳܐ ܐܳܟܶܠ ܗ̱ܘܺܝܬ.
6 ܥܰܝ̈ܢܰܝ ܒܰܡܗܰܝ̈ܡܢܶܐ ܕܰܐܪܥܳܐ ܕܢܶܬܒܽܘܢ ܥܰܡܝ̱. ܕܰܡܗܰܠܶܟ ܒܽܐܘܪܚܳܐ ܕܠܳܐ ܡܽܘܡ ܗܽܘ ܢܫܰܡܫܰܢܝ̱.
7 ܘܠܳܐ ܢܶܬܶܒ ܒܓܰܘ ܒܰܝܬܝ̱ ܕܥܳܒܶܕ ܢܶܟܠܳܐ ܘܡܰܡܠܠܳܐ ܟܰܕܳܒܳܐ ܠܳܐ ܢܶܬܩܰܢ ܩܕܳܡ ܥܰܝ̈ܢܰܝ.
8 ܒܨܰܦܪܳܐ ܐܶܫܰܬܶܩ ܠܟܽܠܗܽܘܢ ܖ̈ܰܫܺܝܥܶܐ ܕܰܐܪܥܳܐ ܘܰܐܘܒܶܕ ܡܶܢ ܡܕܺܝܢ̱ܬܶܗ ܕܡܳܪܝܳܐ. ܠܟܽܠܗܽܘܢ ܥܳܒܕܰܝ̈ ܥܰܘܠܳܐ.