Psalms 83
The Book of Psalms
܀ ܡܙܡܘܪܐ ܦܓ ܀
ܐܰܡܺܝܪ ܡܶܢ ܦܰܪܨܽܘܦ ܡܰܩܒܳܝ̈ܶܐ ܡܶܢ ܒܳܬܰܪ ܕܰܐܓܗܺܝܘ ܡܶܢ ܐܰܢܛܝܳܟܳܘܣ ܘܶܐܬܟܰܢܰܫܘ ܥܠܰܝܗܽܘܢ ܒܰܚܣܳܡܳܐ ܥܰܡ̈ܡܶܐܕܒܰܚܕܳܖ̈ܰܝܗܽܘܢ ܕܰܢܓܰܡܪܽܘܢ ܐܶܢܽܘܢ
1 ܐܰܠܳܗܳܐ ܡܰܢܽܘ ܕܕܳܡܶܐ ܠܳܟ. ܠܳܐ ܬܶܫܬܽܘܩ ܘܠܳܐ ܬܶܫܠܶܐ ܐܰܠܳܗܳܐ.
2 ܡܶܛܽܠ ܕܗܳܐ ܒܥܶܠܕ̈ܒܳܒܰܝܟ ܡܶܬܪܰܓܫܺܝܢ. ܘܣܳܢܰܐܝ̈ܟ ܐܰܪܺܝܡܘ̱ ܪܺܝܫܳܐ ܥܰܠ ܥܰܡܳܟ.
3 ܒܚܳܪܥܽܘܬܗܽܘܢ ܚܫܰܠܘ ܐ̱ܪܳܙܳܐ. ܘܶܐܬܡܰܠܰܟܘ̱ ܥܰܠ ܩܰܕܺܝ̈ܫܰܝܟ ܘܶܐܡܰܪܘ.
4 ܬܰܘ ܢܰܘܒܶܕ ܐܶܢܽܘܢ ܡܶܢ ܥܰܡܳܐ. ܘܠܳܐ ܢܶܬܕܟܰܪ ܬܽܘܒ ܫܡܶܗ ܕܺܝܣܪܳܐܶܝܠ.
5 ܡܶܛܽܠ ܕܶܐܬܪܰܥܺܝܘ ܒܠܶܒܗܽܘܢ ܐܰܟܚܕܳܐ. ܘܰܥܠܰܝܟ ܐܰܩܺܝܡܘ ܩܝܳܡܳܐ.
6 ܡܰܫܟܢܳܐ ܕܰܐܕܽܘܡ ܘܰܕܥܰܖ̈ܰܒܳܝܶܐ ܘܰܕܡܽܘܐܳܒ ܘܰܕܓܳܕܖ̈ܳܝܶܐ.
7 ܬܚܽܘܡܳܐ ܕܥܰܡܽܘܢ ܘܕܰܥܡܳܠܺܝܩ ܘܕܰܦܠܶܫܬ ܥܰܡ ܝܳܬܒܰܝ̈ ܨܽܘܪ.
8 ܐܳܦ ܐܳܬܽܘܪܳܝܳܐ ܐܶܫܬܘܺܝ ܥܰܡܗܽܘܢ. ܘܰܗܘܰܘ ܥܽܘܕܪܳܢܳܐ ܠܰܒ̈ܢܰܝ ܠܽܘܛ.
9 ܥܒܶܕ ܠܗܽܘܢ ܐܰܝܟ ܕܰܠܡܶܕܝܰܢ ܘܰܐܝܟ ܕܰܠܣܺܝܣܪܳܐ ܘܰܐܝܟ ܕܰܠܢܳܒܺܝܢ ܒܢܰܚܠܳܐ ܕܩܺܝܫܽܘܢ.
10 ܕܶܐܬܚܪܶܒܘ ܒܥܺܝܢܕܽܘܪ. ܘܰܗܘܰܘ ܙܶܒܠܳܐ ܒܰܐܪܥܳܐ.
11 ܚܪܽܘܒ ܐܶܢܽܘܢ ܘܰܐܘܒܶܕ ܐܶܢܽܘܢ. ܐܰܝܟ ܕܰܠܥܽܘܪܺܝܒ ܘܰܐܝܟ ܙܺܝܒ ܘܰܐܝܟ ܙܳܒܰܚ ܘܰܐܝܟ ܨܰܠܡܢܰܥ. ܟܽܠܗܽܘܢ ܫܰܠܺܝ̈ܛܳܢܰܝܗܽܘܢ.
12 ܕܶܐܡܰܪܘ. ܢܺܐܪܰܬ ܠܰܢ ܩܪܺܝܬܶܗ ܕܰܐܠܳܗܳܐ.
13 ܐܰܠܳܗܳܐ ܥܒܶܕ ܐܶܢܽܘܢ ܐܰܝܟ ܓܺܝܓܠܳܐ ܘܰܐܝܟ ܓܶܠܳܐ ܩܕܳܡ ܪܽܘܚܳܐ.
14 ܘܰܐܝܟ ܢܽܘܪܳܐ ܕܡܶܫܬܰܒܩܳܐ ܒܥܳܒܳܐ. ܘܰܐܝܟ ܫܰܠܗܶܒܺܝܬܳܐ ܕܡܰܘܩܕܳܐ ܛܽܘܖ̈ܶܐ.
15 ܗܳܟܰܢܳܐ ܪܕܽܘܦ ܐܶܢܽܘܢ ܒܥܰܠܥܳܠܰܝ̈ܟ. ܘܰܒܩܶܖ̈ܚܰܝܟ ܕܰܠܰܚ ܐܶܢܽܘܢ.
16 ܡܠܺܝ ܐܰܦܰܝ̈ܗܽܘܢ ܨܰܥܪܳܐ. ܕܢܶܒܥܽܘܢ ܠܰܫܡܳܟ ܡܳܪܝܳܐ.
17 ܢܶܒܗܬܽܘܢ ܘܢܶܬܕܰܠܚܽܘܢ ܠܥܳܠܰܡ ܥܳܠܡܺܝܢ. ܘܢܰܚܦܪܽܘܢ ܘܢܺܐܒܕܽܘܢ.
18 ܘܢܶܕܥܽܘܢ ܕܰܫܡܳܟ ܗܽܘ ܡܳܪܝܳܐ ܒܰܠܚܽܘܕܰܝܟ ܪܳܡ ܒܟܽܠܳܗ̇ ܐܰܪܥܳܐ.