Psalms 107
The Book of Psalms
܀ ܡܙܡܘܪܐ ܩܙ ܀
ܡܒܰܕܶܩ ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܘܡܰܪܬܶܐ ܠܗܽܘܢ ܕܢܰܘܕܽܘܢ ܠܰܐܠܳܗܳܐ ܐܰܦܪܰܩ ܐܶܢܽܘܢ ܡܶܢ ܡܦܰܬܟܽܘܬܳܐ ܕܒܺܝܫܽܘܬܗܽܘܢ
1 ܐܰܘܕܰܘ ܠܡܳܪܝܳܐ ܕܛܳܒ ܗܽܘ ܘܰܠܥܳܠܰܡ ܛܰܝܒܽܘܬܶܗ.
2 ܢܺܐܡܪܽܘܢ ܦܖ̈ܺܝܩܰܘܗ̱ܝ ܕܡܳܪܝܳܐ ܕܰܦܪܰܩ ܐܶܢܽܘܢ ܡܶܢ ܐܺܝܕܳܐ ܕܳܐܠܽܘܨܳܐ.
3 ܘܡܶܢ ܟܽܠܗܶܝܢ ܐܰܖ̈ܥܳܬܳܐ ܟܰܢܶܫ ܐܶܢܽܘܢ ܡܶܢ ܡܰܕܢܚܳܐ ܘܡܶܢ ܡܰܥܪܒܳܐ ܘܡܶܢ ܓܰܪܒܝܳܐ ܘܡܶܢ ܝܰܡܳܐ.
4 ܛܥܰܘ ܒܡܰܕܒܪܳܐ ܕܰܐܫܺܝܡܽܘܢ ܐܘܪܚܳܐ ܕܰܩܪܺܝܬܳܐ ܕܝܳܬܒܳܐ ܠܳܐ ܐܶܫܟܰܚܘ̱.
5 ܟܦܶܢܘ̱ ܘܰܨܗܺܝܘ̱ ܘܢܰܦܫܗܽܘܢ ܐܶܬܛܰܪܦܰܬ.
6 ܒܥܰܘ ܡܶܢ ܡܳܪܝܳܐ ܒܽܐܘܠܨܳܢܰܝ̈ܗܽܘܢ ܘܡܶܢ ܥܳܩ̈ܳܬܗܽܘܢ ܐܰܦܶܩ ܐܶܢܽܘܢ.
7 ܗܰܠܶܟ ܐܶܢܽܘܢ ܒܽܐܘܪܚܳܐ ܕܩܽܘܫܬܳܐ ܠܡܺܐܙܰܠ ܠܩܽܘܖ̈ܝܳܐ ܕܝܳܬܒܳ̈ܢ.
8 ܢܰܘܕܽܘܢ ܠܡܳܪܝܳܐ ܙܰܕܺܝܩܰܘ̈ܗܝ̱ ܕܖ̈ܰܚܡܰܘܗ̱ܝ ܥܰܠ ܒܢܰܝ̈ܢܳܫܳܐ.
9 ܡܶܛܽܠ ܕܣܰܒܰܥ ܢܰܦ̈ܫܳܬܳܐ ܡܛܰܖ̈ܦܳܬܳܐ ܘܢܰܦܫܳܐ ܟܦܰܢܬܳܐ ܡܠܳܐ.
10 ܕܰܐܝܠܶܝܢ ܕܝܳܬܒܺܝܢ ܒܚܶܫܽܘܟܳܐ ܘܰܒ̈ܛܶܠܳܠܰܝ ܡܰܘܬܳܐ ܘܰܐܣܺܝܪܺܝܢ ܒܡܶܣܟܺܢܽܘܬܳܐ ܘܰܒܦܰܖ̈ܙܠܶܐ.
11 ܡܶܛܽܠ ܕܡܰܪܡܰܪܘ ܡܶܠܬܶܗ ܕܰܐܠܳܗܳܐ ܘܬܰܪܥܺܝܬܶܗ ܕܰܡܪܰܝܡܳܐ ܐܰܣܠܺܝܘ.
12 ܬܒܰܪ ܒܥܰܡܠܳܐ ܠܶܒܗܽܘܢ ܘܶܐܬܟܪܰܗܘ ܘܠܰܝܬ ܕܰܡܥܰܕܰܪ ܠܗܽܘܢ.
13 ܘܨܰܠܺܝܘ ܠܘܳܬ ܡܳܪܝܳܐ ܒܥܳܩ̈ܳܬܗܽܘܢ ܘܡܶܢ ܐܽܘܠܨܳܢܰܝ̈ܗܽܘܢ ܦܪܰܩ ܐܶܢܽܘܢ.
14 ܐܰܦܶܩ ܐܶܢܽܘܢ ܡܶܢ ܚܶܫܽܘܟܳܐ ܘܡܶܢ ܛܶܠܳܠܰܝ̈ ܡܰܘܬܳܐ ܘܰܚܢܳܩܰܝ̈ܗܽܘܢ ܦܰܣܶܩ.
15 ܢܰܘܕܽܘܢ ܠܡܳܪܝܳܐ ܙܰܕܺܝܩܰܘ̈ܗܝ̱ ܕܖ̈ܰܚܡܰܘܗ̱ܝ ܥܰܠ ܒܢܰܝ̈ܢܳܫܳܐ.
16 ܡܶܛܽܠ ܕܰܬܒܰܪ ܬܰܖ̈ܥܶܐ ܕܰܢܚܳܫܳܐ ܘܡܽܘܟ̈ܠܶܐ ܕܦܰܪܙܠܳܐ ܓܰܕܶܡ.
17 ܥܰܕܰܪ ܐܶܢܽܘܢ ܡܶܢ ܐܽܘܪܚܳܐ ܕܰܚܛܳܗܰܝ̈ܗܽܘܢ ܘܡܶܢ ܥܰܘܠܗܽܘܢ ܐܶܬܡܰܟܰܟܘ̱.
18 ܟܽܠ ܡܶܐܟܠܳܐ ܣܢܳܬ ܢܰܦܫܗܽܘܢ ܘܡܰܛܺܝܘ ܥܕܰܡܳܐ ܠܬܰܖ̈ܥܰܝ ܡܰܘܬܳܐ.
19 ܒܥܰܘ ܡܶܢ ܡܳܪܝܳܐ ܒܽܐܘܠܨܳܢܰܝ̈ܗܽܘܢ ܘܡܶܢ ܥܳܩ̈ܳܬܗܽܘܢ ܐܰܦܶܩ ܐܶܢܽܘܢ.
20 ܫܰܕܰܪ ܡܶܠܬܶܗ ܘܰܐܣܺܝ ܐܶܢܽܘܢ ܘܦܰܨܺܝ ܐܶܢܽܘܢ ܡܶܢ ܚܒܳܠܳܐ.
21 ܢܰܘܕܽܘܢ ܠܡܳܪܝܳܐ ܙܰܕܺܝ̈ܩܰܘܗ̱ܝ ܕܖ̈ܰܚܡܰܘܗ̱ܝ ܥܰܠ ܒܢܰܝ̈ܢܳܫܳܐ.
22 ܕܰܒܰܚܘ ܠܶܗ ܕܶܒ̈ܚܶܐ ܕܫܽܘܒܚܳܐ ܘܫܰܒܰܚܘ̱ ܥܒܳܕܰܘ̈ܗܝ̱ ܒܬܶܕܡܖ̈ܳܬܶܗ.
23 ܢܳܚ̈ܬܰܝ ܝܰܡܳܐ ܒܶܐܠܦ̈ܶܐ ܘܥܳܒ̈ܕܰܝ ܥܒܳܕܳܐ ܒܡܰܝ̈ܳܐ ܣܰܓܺܝ̈ܐܶܐ.
24 ܗܶܢܽܘܢ ܚܙܰܘ ܥܒܳܕܰܘ̈ܗܝ̱ ܕܡܳܪܝܳܐ ܘܬܶܕܡܖ̈ܳܬܶܗ ܒܥܽܘ̈ܡܩܰܘܗ̱ܝ ܕܝܰܡܳܐ.
25 ܕܰܐܩܺܝܡ ܪܽܘܚܳܐ ܕܥܰܠܥܳܠܳܐ ܘܶܐܬܬܪܺܝܡܘ̱ ܓܰܠܠܰܘ̈ܗܝ̱ ܕܝܰܡܳܐ.
26 ܣܳܠܩܺܝܢ ܠܰܫܡܰܝܳܐ ܘܢܳܚܬܺܝܢ ܠܰܬܗܽܘܡܳܐ ܘܢܰܦܫܗܽܘܢ ܒܗܽܘܢ ܡܶܬܛܰܪܦܳܐ.
27 ܙܳܥܘ ܘܢܳܕܘ ܐܰܝܟ ܖ̈ܰܘܳܝܶܐ ܘܟܽܠܳܗ̇ ܚܶܟܡܰܬܗܽܘܢ ܐܶܒܕܰܬ.
28 ܓܥܰܘ ܠܘܳܬ ܡܳܪܝܳܐ ܒܽܐܘܠܨܳܢܰܝ̈ܗܽܘܢ ܘܡܶܢ ܥܳܩ̈ܳܬܗܽܘܢ ܐܰܦܶܩ ܐܶܢܽܘܢ.
29 ܐܰܫܠܺܝ ܥܰܠܥܳܠܳܐ ܘܰܫܬܶܩ ܘܶܐܬܬܢܺܝܚܘ̱ ܓܰܠܠܰܘ̈ܗܝ ܕܝܰܡܳܐ.
30 ܘܰܚܕܺܝܘ̱ ܟܰܕ ܫܬܶܩܘ̱ ܘܰܕܒܰܪ ܐܶܢܽܘܢ ܠܰܠܡܺܐܢܳܐ ܕܰܨܒܰܘ.
31 ܢܰܘܕܽܘܢ ܠܡܳܪܝܳܐ ܙܰܕܺܝ̈ܩܰܘܗ̱ܝ ܕܖ̈ܰܚܡܰܘܗ̱ܝ ܥܰܠ ܒܢܰܝ̈ܢܳܫܳܐ.
32 ܫܰܒܚܽܘܗ̱ܝ ܒܥܺܕܬܳܐ ܕܥܰܡ̈ܡܶܐ ܘܥܰܠ ܡܰܘܬܒܳܐ ܕܣܳܒ̈ܶܐ ܪܰܡܪܡܽܘܗ̱ܝ.
33 ܕܰܥܒܰܕ ܢܰܗܖ̈ܰܘܳܬܳܐ ܐܰܝܟ ܡܰܕܒܪܳܐ ܘܡܰܒܽܘ̈ܥܶܐ ܕܡܰܝ̈ܳܐ ܠܨܶܗܝܳܐ.
34 ܐܰܪܥܳܐ ܝܶܗܒܰܬ ܦܺܐܖ̈ܶܝܗ̇ ܠܡܳܠܰܚܬܳܐ ܡܶܢ ܥܒܳܕܰܝ̈ܗܽܘܢ ܒܺܝ̈ܫܶܐ ܕܝܳܬܒܶܝ̈ܗ̇.
35 ܕܰܥܒܰܕ ܡܰܕܒܪܳܐ ܠܰܐܓ̈ܡܶܐ ܕܡܰܝ̈ܳܐ ܘܰܐܪܥܳܐ ܨܗܺܝܬܐ ܠܡܰܒܽܘ̈ܥܶܐ ܕܡܰܝ̈ܳܐ.
36 ܐܰܘܬܶܒ ܬܰܡܳܢ ܟܰܦ̈ܢܶܐ ܘܰܒܢܰܘ ܩܽܘܖ̈ܝܳܐ ܘܺܝܬܶܒܘ ܒܗܶܝܢ.
37 ܙܪܰܥܘ ܚܰܩ̈ܠܳܬܳܐ ܘܰܢܨܰܒܘ ܟܰܖ̈ܡܶܐ ܘܶܐܟܰܠܘ ܡܶܢ ܦܺܐܖ̈ܶܐ ܕܥܰܠ̈ܠܳܬܗܽܘܢ.
38 ܒܰܪܶܟ ܐܶܢܽܘܢ ܘܰܣܓܺܝܘ ܛܳܒ ܘܰܒܥܺܝܪܗܽܘܢ ܠܳܐ ܙܥܰܖ̈ܝ.
39 ܘܰܙܥܰܪܘ ܘܶܐܬܡܰܟܰܟܘ ܒܣܽܘܓܳܐܐ ܕܒܺܝܫܬܳܐ ܘܰܕܕܽܘܘܳܢܳܐ.
40 ܐܰܪܡܺܝ ܒܺܝܫܬܳܐ ܥܰܠ ܫܰܠܺܝ̈ܛܶܐ ܘܰܐܛܥܺܝ ܐܶܢܽܘܢ ܒܬܰܘܫܳܐ ܕܠܳܐ ܐܽܘܪܚܳܐ.
41 ܘܰܐܥܫܶܢ ܠܡܶܣ̈ܟܺܢܶܐ ܘܰܥܒܰܕ ܐܰܝܟ ܥܳܢ̈ܳܐ ܫܰܖ̈ܒܳܬܗܽܘܢ.
42 ܕܢܶܚܙܽܘܢ ܙܰܕܺܝ̈ܩܶܐ ܘܢܶܚܕܽܘܢ ܘܟܽܠܗܽܘܢ ܥܰܘ̈ܳܠܶܐ ܢܶܣܟܪܽܘܢ ܚܶܟܗܽܘܢ.
43 ܡܰܢ ܕܚܰܟܺܝܡ ܢܶܛܰܪ ܗܳܠܶܝܢ ܘܢܶܕܰܥ ܚܶܣܕܶܗ ܕܡܳܪܝܳܐ.