Psalms 96
The Book of Psalms
܀ ܡܙܡܘܪܐ ܨܘ ܀
ܥܰܠ ܝܺܗܽܘ̈ܕܳܝܶܐ ܕܰܒܒܳܒܶܠ ܡܶܬܢܰܒܶܐ ܡܶܢ ܐܰܝܠܶܝܢ ܕܳܐܣܬܥܰܪܘ ܠܗܽܘܢ ܘܩܳܪܶܐ ܠܬܰܘܕܺܝܬܳܐ
ܥܰܠ ܦܽܘܢܳܝܶܗ ܕܥܰܡܳܐ ܕܡܶܢ ܒܳܒܶܠ ܡܶܬܢܰܒܶܐ ܒܰܕܡܽܘܬ ܬܶܫܒܽܘܚܬܳܐ ܘܬܰܘܕܺܝܬܳܐ
1 ܫܰܒܰܚܘ ܠܡܳܪܝܳܐ ܬܶܫܒܽܘܚܬܳܐ ܚܕܰܬܳܐ. ܫܰܒܰܚܘ ܠܡܳܪܝܳܐ ܟܽܠܳܗ̇ ܐܰܪܥܳܐ.
2 ܫܰܒܰܚܘ ܠܡܳܪܝܳܐ ܘܒܰܪܶܟܘ ܠܰܫܡܶܗ. ܣܰܒܰܪܘ ܡܶܢ ܝܽܘܡ ܠܝܽܘܡ ܦܽܘܪܩܳܢܶܗ.
3 ܘܶܐܫܬܰܥܘ ܒܥܰܡ̈ܡܶܐ ܐܺܝܩܳܪܶܗ. ܘܰܒܟܽܠܗܽܘܢ ܥܰܡ̈ܡܶܐ ܥܒܳܕܰܘ̈ܗܝ̱.
4 ܡܶܛܽܠ ܕܪܰܒ ܗܽܘ ܡܳܪܝܳܐ ܘܰܡܫܰܒܰܚ ܛܳܒ ܘܰܕܚܺܝܠ ܥܰܠ ܟܽܠܗܽܘܢ ܐܰܠܳܗ̈ܶܐ.
5 ܡܶܛܽܠ ܕܟܽܠܗܽܘܢ ܐܰܠܳܗ̈ܶܐ ܕܥܰܡ̈ܡܶܐ ܣܖ̈ܺܝܩܺܝܢ ܐܶܢܽܘܢ. ܘܡܳܪܝܳܐ ܫܡܰܝܳܐ ܥܒܰܕ.
6 ܙܺܝܘܳܐ ܘܫܽܘܒܚܳܐ ܩܕܳܡܰܘܗ̱ܝ. ܥܽܘܫܢܳܐ ܘܬܶܫܒܽܘܚܬܳܐ ܒܡܰܩܕܫܶܗ.
7 ܗܰܒܘ̱ ܠܡܳܪܝܳܐ ܫܰܖ̈ܒܳܬܳܐ ܕܥܰܡ̈ܡܶܐ. ܗܰܒܘ̱ ܠܡܳܪܝܳܐ ܬܶܫܒܽܘܚܬܳܐ ܘܺܐܝܩܳܪܳܐ.
8 ܗܰܒܘ̱ ܠܡܳܪܝܳܐ ܐܺܝܩܳܪܳܐ ܠܰܫܡܶܗ. ܫܩܽܘܠܘ̱ ܩܽܘܖ̈ܒܳܢܶܐ ܘܥܽܘܠܘ̱ ܠܕܳܖ̈ܰܘܗ̱ܝ.
9 ܣܓܽܘܕܘ ܠܡܳܪܝܳܐ ܒܕܳܪܬܳܐ ܕܩܽܘܕܫܶܗ. ܬܙܽܘܥ ܡܶܢ ܩܕܳܡܰܘܗ̱ܝ ܟܽܠܳܗ̇ ܐܰܪܥܳܐ.
10 ܐܶܡܰܪܘ ܒܶܝܬ ܥܰܡ̈ܡܶܐ ܕܡܳܪܝܳܐ ܐܰܡܠܶܟ. ܘܰܐܬܩܢܳܗ̇ ܠܬܺܒܶܝܠ ܕܠܳܐ ܬܙܽܘܥ. ܢܕܽܘܢ ܠܥܰܡ̈ܡܶܐ ܒܰܬܪܺܝܨܽܘܬܳܐ.
11 ܢܶܚܕܽܘܢ ܫܡܰܝ̈ܳܐ ܘܰܬܕܽܘܨ ܐܰܪܥܳܐ. ܢܶܪܘܰܙ ܝܰܡܳܐ ܒܰܡܠܳܐܶܗ.
12 ܢܶܥܫ̈ܢܳܢ ܚܰܩ̈ܠܳܬܳܐ ܘܟܽܠ ܕܺܐܝܬ ܒܗܶܝܢ. ܗܳܝܕܶܝܢ ܢܫܰܒܚܽܘܢ ܟܽܠܗܽܘܢ ܐܺܝ̈ܠܳܢܶܐ ܕܥܳܒܳܐ.
13 ܩܕܳܡ ܡܳܪܝܳܐ ܕܳܐܬܶܐ ܠܰܡܕܳܢܳܗ̇ ܠܰܐܪܥܳܐ. ܕܳܐܶܢ ܬܺܒܶܝܠ ܒܙܰܕܺܝܩܽܘܬܳܐ ܘܰܠܥܰܡ̈ܡܶܐ ܒܗܰܝܡܳܢܽܘܬܳܐ.