Psalms 74
The Book of Psalms
܀ ܡܙܡܘܪܐ ܥܕ ܀
ܡܒܰܕܶܩ ܥܰܠ ܪܰܒܽܘܬ ܐܽܘܠ̈ܨܳܢܶܐ ܕܡܰܩܒܳܝ̈ܶܐ. ܐܰܝܟ ܡܰܢ ܕܰܡܬܰܢܶܝܢ ܒܺܝ̈ܫܳܬܳܐ ܕܰܚܕܺܝܖ̈ܳܢ ܠܗܽܘܢ
1 ܐܰܠܳܗܳܐ ܠܡܳܢܳܐ ܛܥܰܝܬܳܢܝ̱ ܠܥܳܠܰܡ. ܘܰܐܥܫܶܢܬ ܪܽܘܓܙܳܟ ܒܥܳܢܳ̈ܐ ܕܡܰܪܥܺܝܬܳܟ.
2 ܐܶܬܕܰܟܪ ܥܺܕܬܳܟ ܕܰܩܢܰܝܬ ܡܶܢ ܩܕܺܝܡ. ܘܰܦܪܰܩܬ ܫܰܒܛܳܐ ܕܝܳܪܬܽܘܬܳܟ. ܛܽܘܪܳܐ ܕܨܶܗܝܽܘܢ ܗܳܢܳܐ ܕܰܫܪܰܝܬ ܒܶܗ.
3 ܐܰܪܺܝܡ ܥܰܒ̈ܕܰܝܟ ܥܰܠ ܐܰܝܠܶܝܢ ܕܡܶܫܬܰܩܠܺܝܢ ܒܥܽܘܫܢܳܐ. ܟܽܠ ܕܡܰܒܐܶܫ ܒܥܶܠܕܒܳܒܳܐ ܠܩܽܘܕܫܳܟ.
4 ܐܶܫܬܰܒܗܰܪܘ ܒܥܶܠܕ̈ܒܳܒܰܝܟ ܒܓܰܘ ܥܺܐܕܳܟ. ܥܒܰܕܘ ܐܳܬܘ̈ܳܬܗܽܘܢ ܐܳܬܘ̈ܳܬܳܐ.
5 ܘܺܝܕܰܥܬ ܐܰܝܟ ܡܥܰܠܝܳܐ ܕܰܠܥܶܠ. ܐܰܝܟ ܥܳܒܳܐ ܕܩܰܝ̈ܣܶܐ ܒܢܳܖ̈ܓܶܐ ܨܰܠܰܚܘ ܬܰܖ̈ܥܶܐ.
6 ܐܰܟܚܕܳܐ ܒܦܶܠܩ̈ܶܐ ܘܰܒܟܽܘ̈ܠܒܶܐ.
7 ܐܰܪܡܺܝܘ ܘܰܐܘܩܶܕܘ ܒܢܽܘܪܳܐ ܡܰܩܕܫܳܟ. ܘܛܰܘܶܫܘ ܒܰܐܪܥܳܐ ܡܰܫܟܢܳܐ ܕܰܫܡܳܟ.
8 ܘܶܐܡܰܪܘ ܒܠܶܒܗܽܘܢ ܕܢܰܘܒܶܕ ܐܶܢܽܘܢ ܐܰܟܚܕܳܐ. ܘܢܰܘܒܶܕ ܟܽܠܗܽܘܢ ܥܰܕ̈ܥܺܐܕܰܘܗ̱ܝ ܕܰܐܠܳܗܳܐ ܡܶܢ ܐܰܪܥܳܐ.
9 ܐܳܬܘ̈ܳܬܗܽܘܢ ܠܳܐ ܚܙܰܘ. ܠܰܝܬ ܬܽܘܒ ܢܒܺܝܳܐ. ܐܳܦܠܳܐ ܐܺܝܬ ܥܰܡܰܢ ܚܰܟܺܝܡܳܐ.
10 ܥܕܰܡܳܐ ܠܶܐܡܰܬܝ̱ ܐܰܠܳܗܳܐ ܡܚܰܣܶܕ ܒܥܶܠܕܒܳܒܳܐ ܘܡܰܪܓܶܙ ܠܰܫܡܳܟ ܠܥܳܠܰܡ.
11 ܠܡܳܢܳܐ ܐܰܗܦܶܟܬ ܐܺܝܕܳܟ ܘܝܰܡܺܝܢܳܟ ܡܶܢ ܓܰܘ ܥܺܐܕܳܟ.
12 ܐܰܠܳܗܰܢ ܡܰܠܟܰܐ ܗ̱ܘ. ܕܰܦܩܰܕܬ ܡܶܢ ܩܕܺܝܡ ܥܰܠ ܦܽܘܪܩܳܢܶܗ ܕܝܰܥܩܽܘܒ.
13 ܐܰܢ̱ܬ ܒܥܽܘܫܢܳܟ ܦܪܰܫܬ ܝܰܡܳܐ. ܘܬܰܒܰܪܬ ܖ̈ܺܝܫܰܝܗܽܘܢ ܕܬܰܢܺܝ̈ܢܶܐ ܒܡܰܝ̈ܳܐ.
14 ܐܰܢ̱ܬ ܪܰܨܶܨܬ ܖ̈ܺܝܫܰܘܗ̱ܝ ܕܠܶܘܝܳܬܰܢ. ܘܝܰܗܒܬܳܝܗܝ̱ ܡܶܐܟܽܘܠܬܳܐ ܠܥܰܡܳܐ ܥܰܫܺܝܢܳܐ.
15 ܐܰܢ̱ܬ ܒܰܙܰܥܬ ܡܰܒܽܘ̈ܥܶܐ ܒܢܰܚ̈ܠܶܐ. ܐܰܢ̱ܬ ܐܰܘܒܶܫܬ ܢܰܗܖ̈ܰܘܳܬܳܐ ܥܰܫܺܝ̈ܢܶܐ.
16 ܕܺܝܠܳܟ ܗܽܘ ܐܺܝܡܳܡܳܐ ܘܕܺܝܠܳܟ ܗܽܘ ܠܺܠܝܳܐ. ܐܰܢ̱ܬ ܬܰܩܶܢܬ ܢܽܘܗܪܳܐ ܘܫܶܡܫܳܐ.
17 ܐܰܢ̱ܬ ܐܰܩܺܝܡܬ ܟܽܠܗܽܘܢ ܬܚܽܘ̈ܡܶܝܗ̇ ܕܰܐܪܥܳܐ. ܩܰܝܛܳܐ ܘܣܰܬܘܳܐ ܐܰܢ̱ܬ ܒܪܰܝܬ ܐܶܢܽܘܢ.
18 ܐܶܬܕܰܟܪ ܡܳܪܝܳܐ ܚܶܣܕܶܗ ܕܰܒܥܶܠܕܒܳܒܳܐ. ܥܰܡܳܐ ܣܰܟܠܳܐ ܐܰܪܓܶܙ ܠܰܫܡܳܟ.
19 ܠܳܐ ܬܶܬܶܠ ܠܰܬܒܳܪܳܐ ܢܰܦܫܳܐ ܕܡܰܘܕܝܳܐ ܠܳܟ. ܘܢܰܦ̈ܫܳܬܳܐ ܕܡܶܣ̈ܟܺܢܰܝܟ ܠܳܐ ܬܶܛܥܶܐ ܠܥܳܠܰܡ.
20 ܚܽܘܪ ܡܳܪܝܳܐ ܒܰܩܝܳܡܳܟ. ܡܶܛܽܠ ܕܶܐܬܡ̈ܠܺܝ ܕܰܝܖ̈ܶܐ ܕܰܐܪܥܳܐ ܚܶܫܽܘܟܳܐ ܘܥܰܘܠܳܐ.
21 ܠܳܐ ܢܶܬܶܒ ܡܶܣܟܺܢܳܐ ܟܰܕ ܒܰܗܺܝܬ. ܒܳܝ̈ܫܶܐ ܘܡܶܣ̈ܟܺܢܶܐ ܢܫܰܒܚܽܘܢ ܠܰܫܡܳܟ.
22 ܩܽܘܡ ܐܰܠܳܗܳܐ ܘܕܽܘܢ ܕܺܝܢܰܝ̈ܟ. ܘܶܐܬܕܰܟܪ ܚܶܣܕܳܟ ܕܡܶܢ ܣܰܟ̈ܠܶܐ ܕܟܽܠ ܝܽܘܡ.
23 ܘܠܳܐ ܬܶܛܥܶܐ ܩܳܠܳܐ ܕܰܒܥܶܠܕ̈ܒܳܒܰܝܟ ܘܰܕܠܽܘܚܝܳܐ ܕܰܐܝܠܶܝܢ ܕܩܳܝܡܺܝܢ ܥܠܰܝܟ ܕܣܳܠܶܩ ܒܟܽܠܙܒܰܢ.