Psalms 18
The Book of Psalms
܀ ܡܙܡܘܪܐ ܝܚ ܀
ܡ̈ܶܠܶܐ ܕܩܽܘܒܳܠܛܰܝܒܽܘܬܳܐ ܕܕܰܘܺܝܕ ܕܰܐܘܕܺܝ ܒܚܰܪܬܳܐ ܕܚܰܝܰܘ̈ܗܝ ܠܰܐܠܳܗܳܐ
1 ܐܶܪܚܡܳܟ ܡܳܪܝܳܐ ܚܰܝܠܝ̱ ܘܬܽܘܟܠܳܢܝ̱.
2 ܘܒܶܝܬ ܓܰܘܣܝ̱ ܘܡܦܰܨܝܳܢܝ̱. ܐܰܠܳܗܳܐ ܬܰܩܺܝܦܳܐ ܕܰܬܟܺܝܠ ܐ̱ܢܳܐ ܥܠܰܘܗ̱ܝ. ܡܣܰܝܥܳܢܝ̱ ܘܩܰܪܢܳܐ ܕܦܽܘܪܩܳܢܝ̱. ܘܒܶܝܬ ܓܰܘܣܝ̱ ܡܫܰܒܚܳܐ.
3 ܐܶܩܪܶܐ ܠܡܳܪܝܳܐ ܘܡܶܢ ܒܥܶܠܕ̈ܒܳܒܰܝ ܐܶܬܦܪܶܩ.
4 ܡܶܛܽܠ ܕܚܰܕܪܽܘܢܝ̱ ܚܶܒ̈ܠܶܐ ܕܡܰܘܬܳܐ. ܘܖ̈ܶܓܠܳܬܳܐ ܕܥܰܘ̈ܳܠܶܐ ܕܰܠܚܳܢ̈ܝ.
5 ܚܶܒ̈ܠܶܐ ܕܰܫܝܽܘܠ ܟܰܪܟܽܘܢܝ̱. ܘܩܰܕܡܽܘܢܝ̱ ܦܰܚܰܘ̈ܗܝ ܕܡܰܘܬܳܐ.
6 ܒܽܐܘܠܨܳܢܝ̱ ܩܪܺܝܬ ܠܡܳܪܳܝܐ ܘܠܰܐܠܳܗܳܐ ܩܪܺܝܬ. ܘܰܫܡܰܥ ܡܶܢ ܗܰܝܟܠܶܗ ܒܩܳܠܝ̱. ܘܰܓܥܳܬܝ̱ ܩܕܳܡܰܘܗ̱ܝ ܥܶܠܰܬ ܒܶܐܕܢܰܘ̈ܗܝ̱.
7 ܐܶܬܕܰܠܚܰܬ ܘܙܳܥܰܬ ܐܰܪܥܳܐ. ܘܫܶܬܶܐܣ̈ܶܐ ܕܛܽܘܖ̈ܶܐ ܙܳܥ̈ܝ̱ ܘܶܐܬܬܰܠܰܚ̈ܝ̱. ܡܶܛܽܠ ܕܶܐܬܚܰܡܰܬ ܥܠܰܝܗܽܘܢ.
8 ܣܠܶܩ ܬܶܢܳܢܳܐ ܒܪܽܘܓܙܶܗ. ܘܢܽܘܪܳܐ ܡܶܢ ܦܰܪܨܽܘܦܶܗ ܐܶܬܓܰܘܙܠܰܬ. ܘܓܽܘܡܖ̈ܶܐ ܚܰܒܶܝ̈ܢ ܡܶܢܶܗ.
9 ܐܰܪܟܶܢ ܫܡܰܝܳܐ ܘܰܢܚܶܬ. ܘܥܰܖ̈ܦܶܠܶܐ ܬܚܶܝܬ ܖ̈ܶܓܠܰܘܗ̱ܝ.
10 ܪܟܶܒ ܥܰܠ ܟܖ̈ܽܘܒܶܐ ܘܰܦܪܰܚ. ܘܛܳܣ ܥܰܠ ܟܶܢܦܶܝ̈ܗ̇ ܕܪܽܘܚܳܐ.
11 ܣܳܡ ܚܶܫܽܘܟܳܐ ܠܓܶܢܝܶܗ ܘܟܰܪܟܶܗ ܡܰܛܠܠܶܗ. ܚܶܫܽܘܟܳܐ ܕܡܰܝ̈ܳܐ ܒܰܥܢܳܢ̈ܶܐ ܕܳܐܐܰܪ.
12 ܡܶܢ ܙܰܗܪܳܐ ܕܡܰܛܠܠܶܗ. ܥܢܳܢܰܘ̈ܗܝ ܥܒܰܕ ܒܰܪܕܳܐ ܘܓܽܘܡܖ̈ܶܐ ܕܢܽܘܪܳܐ.
13 ܘܰܪܥܶܡ ܒܰܫܡܰܝܳܐ ܡܳܪܝܳܐ ܘܥܶܠܳܝܳܐ ܝܰܗܒ ܩܳܠܶܗ. ܒܰܪܕܳܐ ܘܓܽܘܡܖ̈ܶܐ ܕܢܽܘܪܳܐ.
14 ܫܰܕܰܪ ܓܶܐܖ̈ܰܘܗ̱ܝ ܘܒܰܕܰܪ ܐܶܢܽܘܢ. ܒܰܖ̈ܩܰܘܗ̱ܝ ܐܰܣܓܺܝ ܘܕܰܠܰܚ ܐܶܢܽܘܢ.
15 ܘܶܐܬܚܙܺܝܘ ܡܰܒܽܘ̈ܥܶܐ ܕܡܰܝ̈ܳܐ. ܘܶܐܬܓ̈ܠܺܝ ܫܶܬܶܐܣ̈ܶܐ ܕܬܺܒܶܝܠ. ܡܶܢ ܟܳܐܬܳܟ ܡܳܪܝܳܐ. ܘܡܶܢ ܢܫܰܡܬܳܐ ܕܪܽܘܚܳܐ ܕܪܽܘܓܙܳܟ.
16 ܫܰܕܰܪ ܡܶܢ ܡܪܰܘܡܳܐ ܘܰܫܠܳܢܝ̱. ܘܩܰܒܠܰܢܝ̱ ܡܶܢ ܡܰܝ̈ܳܐ ܣܰܓܺܝ̈ܐܶܐ.
17 ܘܦܰܨܝܰܢܝ̱ ܡܶܢ ܒܥܶܠܕ̈ܒܳܒܰܝ ܥܰܫܺܝ̈ܢܶܐ. ܘܡܶܢ ܣܳܢ̈ܰܐܝ ܕܰܥܫܶܢܘ ܡܶܢܝ̱.
18 ܩܰܕܡܽܘܢܝ̱ ܒܝܰܘܡܳܐ ܕܥܳܩܰܬܝ̱. ܘܰܗܘܳܐ ܠܺܝ ܡܳܪܝܳܐ ܦܳܪܽܘܩܳܐ.
19 ܘܰܐܦܩܰܢܝ̱ ܠܰܪܘܰܚܬܳܐ. ܘܦܰܨܝܰܢܝ̱ ܡܶܛܽܠ ܕܰܨܒܳܐ ܒܺܝ.
20 ܘܦܰܪܥܰܢܝ̱ ܡܳܪܝܳܐ ܐܰܝܟ ܙܰܕܺܝܩܽܘܬܝ̱. ܘܰܐܝܟ ܕܰܟܝܽܘܬܳܐ ܕܺܐܝ̈ܕܰܝ ܫܰܠܡܰܢܝ̱.
21 ܡܶܛܽܠ ܕܢܶܛܪܶܬ ܐܽܘܖ̈ܚܳܬܶܗ ܕܡܳܪܝܳܐ. ܘܠܳܐ ܐܶܬܡܰܪܕܶܬ ܡܶܢ ܐܰܠܳܗܝ.
22 ܡܶܛܽܠ ܕܟܽܠܗܽܘܢ ܕܺܝܢܰܘ̈ܗܝ ܠܽܘܩܒܰܠܝ̱. ܘܢܳܡܽܘ̈ܣܰܘܗ̱ܝ ܠܳܐ ܐܰܥܒܪܶܬ ܡܶܢܝ̱.
23 ܘܰܗܘܺܝܬ ܕܠܳܐ ܡܽܘܡ ܥܰܡܶܗ. ܘܶܐܙܕܰܗܪܶܬ ܡܶܢ ܚܛܳܗܰܝ̈.
24 ܘܦܰܪܥܰܢܝ̱ ܡܳܪܝܳܐ ܐܰܝܟ ܙܰܕܺܝܩܽܘܬܝ̱. ܘܰܐܝܟ ܕܰܟܝܽܘܬܳܐ ܕܺܐܝ̈ܕܰܝ ܩܕܳܡ ܥܰܝܢܰܘ̈ܗܝ.
25 ܥܰܡ ܚܰܣܝܳܐ ܚܰܣܝܳܐ ܬܶܗܘܶܐ. ܘܥܰܡ ܬܰܡܺܝܡܳܐ ܬܶܬܰܡܰܡ.
26 ܘܥܰܡ ܓܰܒܝܳܐ ܬܶܬܓܒܶܐ. ܘܥܰܡ ܥܩܺܝܡܳܐ ܬܶܬܦܰܬܰܠ.
27 ܡܶܛܽܠ ܕܰܐܢ̱ܬ ܥܰܡܳܐ ܡܶܣܟܺܢܳܐ ܬܶܦܪܽܘܩ. ܘܥܰܝ̈ܢܶܐ ܖ̈ܳܡܳܬܳܐ ܬܡܰܟܶܟ.
28 ܐܰܢ̱ܬ ܬܰܢܗܰܪ ܫܪܳܓܝ̱. ܡܳܪܝܳܐ ܐܰܠܳܗܝ ܢܰܢܗܰܪ ܚܶܫܽܘܟܝ̱.
29 ܡܶܛܽܠ ܕܒܳܟ ܐܶܪܗܰܛ ܥܰܠ ܓܰܝܣܳܐ. ܘܒܰܐܠܳܗܝ̱ ܐܶܫܘܰܪ ܫܽܘܪܳܐ.
30 ܐܰܠܳܗܳܐ ܕܰܕܠܳܐ ܡܽܘܡ ܐܽܘܪܚܶܗ. ܡܺܐܡܪܶܗ ܕܡܳܪܝܳܐ ܒܩܶܐ. ܘܰܡܥܰܕܰܪ ܠܟܽܠ ܕܰܬܟܺܝܠܺܝܢ ܥܠܰܘܗ̱ܝ.
31 ܡܶܛܽܠ ܕܠܰܝܬ ܐܰܠܳܗܳܐ ܠܒܰܪ ܡܶܢ ܡܳܪܝܳܐ. ܘܠܰܝܬ ܕܬܰܩܺܝܦ ܐܰܝܟ ܐܰܠܳܗܰܢ.
32 ܐܰܠܳܗܳܐ ܕܚܰܙܩܰܢܝ̱ ܚܰܝܠܳܐ. ܘܝܰܗܒ ܕܠܳܐ ܡܽܘܡ ܐܽܘܪܚܝ̱.
33 ܥܒܰܕ ܖ̈ܶܓܠܰܝ ܐܰܝܟ ܕܰܐܝܠܳܐ. ܘܥܰܠ ܪܰܘܡܝ̱ ܐܰܩܺܝܡܰܢܝ̱.
34 ܐܰܠܶܦ ܐܺܝ̈ܕܰܝ ܠܰܩܪܳܒܳܐ. ܘܫܰܪܰܪ ܐܰܝܟ ܩܶܫܬܳܐ ܕܰܢܚܳܫܳܐ ܕܖ̈ܳܥܰܝ.
35 ܝܰܗܒܬ ܠܺܝ ܣܰܟܪܳܐ ܕܦܽܘܪܩܳܢܳܐ. ܝܰܡܺܝܢܳܟ ܬܣܰܝܥܰܢܝ̱ ܘܡܰܪܕܽܘܬܳܟ ܬܪܰܒܶܝܢܝ̱.
36 ܐܰܪܘܰܚܬ ܦܣ̈ܳܥܳܬܝ̱ ܬܚܽܘܬܰܝ ܕܠܳܐ ܢܙܽܘܥܽܘܢ ܩܽܘܖ̈ܨܠܰܝ.
37 ܐܶܪܕܽܘܦ ܒܥܶܠܕ̈ܒܳܒܰܝ ܘܰܐܕܪܶܟ ܐܶܢܽܘܢ. ܘܠܳܐ ܐܶܗܦܽܘܟ ܥܕܰܡܳܐ ܕܶܐܓܰܡܰܪ ܐܶܢܽܘܢ.
38 ܐܶܡܚܶܐ ܐܶܢܽܘܢ ܘܠܳܐ ܢܶܫܟܚܽܘܢ ܠܰܡܩܳܡ. ܘܢܶܦܠܽܘܢ ܬܚܶܝܬ ܖ̈ܶܓܠܰܝ.
39 ܬܚܰܙܩܰܢܝ̱ ܚܰܝܠܳܐ ܒܰܩܪܳܒܳܐ. ܘܬܰܒܪܶܟ ܠܰܕܩܳܝܡܺܝܢ ܥܠܰܝ ܬܚܽܘܬܰܝ.
40 ܘܠܰܒܥܶܠܕ̈ܒܳܒܰܝ ܬܶܬܒܰܪ ܩܕܳܡܰܝ. ܘܰܠܣ̈ܳܢܰܐܝ ܐܶܫܰܬܶܩ ܐܶܢܽܘܢ. ܢܶܓܥܽܘܢ ܘܠܳܐ ܢܶܗܘܶܐ ܠܗܽܘܢ ܦܳܪܽܘܩܳܐ.
41 ܢܶܒܥܽܘܢ ܡܶܢ ܡܳܪܝܳܐ ܘܠܳܐ ܢܶܥܢܶܐ ܐܶܢܽܘܢ.
42 ܐܶܫܚܽܘܩ ܐܶܢܽܘܢ ܐܰܝܟ ܥܰܦܪܳܐ ܥܰܠ ܐܰܦܰܝ̈ ܪܽܘܚܳܐ. ܘܰܐܝܟ ܣܝܳܢܳܐ ܕܫܽܘ̈ܩܶܐ ܐܶܕܽܘܫ ܐܶܢܽܘܢ.
43 ܬܦܰܨܶܝܢܝ̱ ܡܶܢ ܕܺܝܢܰܘ̈ܗܝ ܕܥܰܡܳܐ. ܘܬܶܥܒܕܰܢܝ̱ ܪܺܝܫܳܐ ܠܥܰܡ̈ܡܶܐ. ܥܰܡܳܐ ܕܠܳܐ ܝܶܕܥܶܬ ܢܶܦܠܚܽܘܢܳܢܝ̱.
44 ܘܡܰܫܡܰܥ ܐܶܕܢܳܐ ܢܶܫܡܥܽܘܢܳܢܝ̱. ܒܢܰܝ̈ܳܐ ܢܽܘܟܖ̈ܳܝܶܐ ܢܶܫܬܰܥܒܕܽܘܢ ܠܺܝ.
45 ܒܢܰܝ̈ܳܐ ܢܽܘܟܖ̈ܳܝܶܐ ܢܶܬܟܠܽܘܢ ܘܢܶܬܚܰܓܪܽܘܢ ܡܶܢ ܫܒܺܝ̈ܠܰܝܗܽܘܢ.
46 ܚܰܝ ܗܽܘ ܡܳܪܝܳܐ ܘܰܒܪܺܝܟ ܗܽܘ ܡܚܰܝܠܳܢܝ̱. ܐܶܬܬܪܺܝܡ ܐܰܠܳܗܝ ܘܦܳܪܽܘܩܝ̱.
47 ܐܰܠܳܗܳܐ ܕܝܰܗܒ ܠܺܝ ܬܒܰܥܬܳܐ. ܘܫܰܥܒܶܕ ܠܥܰܡ̈ܡܶܐ ܬܚܽܘܬܰܝ.
48 ܘܦܰܨܝܰܢܝ̱ ܡܶܢ ܒܥܶܠܕ̈ܒܳܒܰܝ. ܘܡܶܢ ܐܰܝܠܶܝܢ ܕܩܳܝܡܺܝܢ ܥܠܰܝ ܐܰܪܺܝܡܰܝܢܝ̱. ܘܡܶܢ ܓܰܒܖ̈ܶܐ ܥܰܘ̈ܳܠܶܐ ܬܦܰܨܶܝܢܝ̱.
49 ܡܶܛܽܠ ܗܳܢܳܐ ܐܰܘܕܶܐ ܠܳܟ ܒܶܝܬ ܥܰܡ̈ܡܶܐ ܡܳܪܝ. ܘܠܰܫܡܳܟ ܐܶܙܡܰܪ.
50 ܡܰܘܪܶܒ ܦܽܘܪܩܳܢܳܐ ܕܡܰܠܟܶܗ. ܘܥܳܒܶܕ ܛܰܝܒܽܘܬܳܐ ܠܰܡܫܺܝܚܶܗ. ܠܕܰܘܺܝܕ ܘܰܠܙܰܪܥܶܗ ܥܕܰܡܳܐ ܠܥܳܠܰܡ.