Psalms 71
The Book of Psalms
܀ ܡܙܡܘܪܐ ܥܐ ܀
ܡܒܰܕܶܩ ܥܰܠ ܪܰܒܽܘܬ ܐܽܘܠ̈ܨܳܢܶܐ ܕܰܥܬܺܝܕܺܝܢ ܠܡܶܣܒܰܠ ܥܰܡܳܐ ܕܰܒܒܳܒܶܠ ܘܕܰܠܬܽܘܪܳܨܗܽܘܢ ܗܘܳܝ̈ܳܢ ܠܗܽܘܢ ܗܶܢܶܝܢ ܡܥܺܝ̈ܩܳܢܝܳܬܳܐ ܪܳܡܶܙ ܕܶܝܢ ܐܳܦ ܥܰܠ ܦܽܘܢܳܝܗܽܘܢ
1 ܒܳܟ ܡܳܪܝܳܐ ܣܰܒܪܶܬ ܠܳܐ ܐܶܒܗܰܬ ܠܥܳܠܰܡ.
2 ܘܰܒܙܰܕܺܝܩܽܘܬܳܟ ܦܰܨܳܢܝ̱. ܨܠܺܝ ܠܺܝ ܐܶܕܢܳܟ ܘܰܦܪܽܘܩܰܝܢܝ̱.
3 ܗܘܺܝ ܠܺܝ ܒܶܝܬ ܡܰܥܡܪܳܐ ܕܶܐܥܽܘܠ ܠܶܗ ܒܟܽܠܙܒܰܢ. ܘܰܦܩܽܘܕ ܠܡܶܦܪܩܰܢܝ̱. ܡܶܛܽܠ ܕܰܐܢ̱ܬ ܗܽܘ ܒܶܝܬ ܓܰܘܣܝ̱ ܘܒܶܝܬ ܡܶܪܕܝ̱.
4 ܐܰܠܳܗܳܐ ܦܰܨܳܢܝ̱ ܡܶܢ ܐܺܝܕܶܗ ܕܪܰܫܺܝܥܳܐ ܘܡܶܢ ܐܺܝܕܶܗ ܕܥܰܘܳܠܳܐ ܒܺܝܫܳܐ.
5 ܡܶܛܽܠ ܕܰܐܢ̱ܬ ܗܽܘ ܣܰܒܪܝ̱ ܡܳܪܝܳܐ. ܐܰܠܳܗܳܐ ܬܽܘܟܠܳܢܝ̱ ܕܡܶܢ ܛܰܠܝܽܘܬܝ̱.
6 ܥܠܰܝܟ ܐܶܣܬܰܡܟܶܬ ܡܶܢ ܡܰܪܒܥܳܐ. ܘܡܶܢ ܡܥܶܝ̈ܗ̇ ܕܶܐܡܝ̱ ܐܰܢ̱ܬ ܗܽܘ ܬܽܘܟܠܳܢܝ̱. ܘܠܳܟ ܫܰܒܚܶܬ ܒܟܽܠܙܒܰܢ.
7 ܕܽܘܡܳܪܳܐ ܗܘܺܝܬ ܠܣܰܓܺܝ̈ܐܶܐ. ܕܰܐܢ̱ܬ ܗܽܘ ܬܽܘܟܠܳܢܝ̱ ܥܰܫܺܝܢܳܐ.
8 ܢܶܬܡܠܶܐ ܦܽܘܡܝ̱ ܬܶܫܒܽܘܚܬܳܟ. ܘܟܽܠܶܗ ܝܰܘܡܳܐ ܪܰܒܽܘܬܳܟ.
9 ܠܳܐ ܬܶܫܕܶܝܢܝ̱ ܒܙܰܒܢܳܐ ܕܣܰܝܒܽܘܬܳܐ. ܘܡܳܐ ܕܰܓܡܰܪ ܚܰܝܠܝ̱ ܠܳܐ ܬܶܫܒܩܰܢܝ̱.
10 ܡܶܛܽܠ ܕܶܐܡܰܪܘ ܥܠܰܝ ܒܥܶܠܕ̈ܒܳܒܰܝ. ܘܰܐܝܠܶܝܢ ܕܢܳܛܪܺܝܢ ܠܢܰܦܫܝ̱. ܐܶܬܡܰܠܰܟܘ̱ ܐܰܟܚܕܳܐ ܘܶܐܡܰܪܘ.
11 ܐܰܠܳܗܳܐ ܫܰܒܩܶܗ. ܪܽܘܕܦܽܘܗ̱ܝ ܐܘܚܕܽܘܗ̱ܝ. ܡܶܛܽܠ ܕܠܰܝܬ ܠܶܗ ܡܦܰܨܝܳܢܳܐ.
12 ܐܰܠܳܗܳܐ ܠܳܐ ܬܰܪܚܶܩ ܡܶܢܝ̱. ܐܰܠܳܗܳܐ ܠܥܽܘܕܪܳܢܝ̱ ܟܰܬܰܪ.
13 ܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܣܳܩܪܺܝܢ ܠܢܰܦܫܝ̱. ܢܶܬܥܰܛܦܽܘܢ ܒܶܗܬܬܳܐ ܐܰܝܠܶܝܢ ܕܨܳܒܶܝܢ ܠܒܺܝܫܬܝ̱.
14 ܐܶܢܳܐ ܕܶܝܢ ܒܟܽܠܙܒܰܢ ܐܶܨܰܠܶܐ ܘܰܐܘܣܶܦ ܥܰܠ ܬܶܫܒ̈ܚܳܬܳܟ.
15 ܘܦܽܘܡܝ̱ ܢܣܰܒܰܪ ܙܰܕܺܝܩܽܘܬܳܟ. ܘܟܽܠܶܗ ܝܰܘܡܳܐ ܬܶܫܒ̈ܚܳܬܳܟ. ܡܶܛܽܠ ܕܠܳܐ ܝܶܕܥܶܬ ܣܳܦܪܽܘܬܳܐ.
16 ܕܐܶܥܽܘܠ ܒܓܰܢ̱ܒܳܪܽܘܬܶܗ ܕܡܳܪܝܳܐ ܘܶܐܥܗܰܕ ܙܰܕܺܝܩܽܘܬܳܟ ܒܰܠܚܽܘܕܰܝ.
17 ܐܰܠܳܗܳܐ ܝܽܘܠܦܳܢܝ̱ ܕܡܶܢ ܛܰܠܝܽܘܬܝ̱ ܘܰܥܕܰܡܳܐ ܠܗܳܫܳܐ. ܕܶܐܚܰܘܶܐ ܬܶܕܡܖ̈ܳܬܳܟ.
18 ܥܕܰܡܳܐ ܠܣܰܝܒܽܘܬܳܐ ܘܰܠܩܰܫܺܝܫܽܘܬܳܐ ܠܳܐ ܬܶܫܒܩܰܢܝ̱. ܥܕܰܡܳܐ ܕܶܐܚܰܘܶܐ ܕܪܳܥܳܟ ܘܓܰܢ̱ܒܳܪܽܘܬܳܟ ܠܕܳܪܳܐ ܕܳܐܬܶܐ.
19 ܙܰܕܺܝܩܽܘܬܳܟ ܐܰܠܳܗܳܐ ܥܕܰܡܳܐ ܠܰܡܪܰܘܡܳܐ. ܘܖ̈ܰܘܪܒܳܬܳܐ ܕܰܥܒܰܕܬ ܐܰܠܳܗܳܐ ܡܰܢܽܘ ܐܰܟܘܳܬܳܟ.
20 ܕܚܰܘܺܝܬܳܢܝ̱ ܐܽܘܠܨܳܢܳܐ ܣܰܓܺܝܐܳܐ ܘܒܺܝܫܬܳܐ. ܘܰܗܦܰܟܬ ܘܰܐܚܺܝܬܳܢܝ̱. ܐܳܦ ܡ̣ܶܢ ܬܗܽܘ̈ܡܶܐ ܕܰܐܪܥܳܐ ܬܰܗܦܶܟ ܬܰܣܩܰܢܝ̱.
21 ܐܰܣܓܺܝܬ ܪܰܒܽܘܬܝ̱ ܘܰܗܦܰܟܬ ܘܒܰܝܰܐܬܳܢܝ̱.
22 ܘܳܐܦ ܐܶܢܳܐ ܐܰܘܕܶܐ ܠܳܟ ܒܟܶܢܳܪܳܐ ܘܰܠܩܽܘܫܬܳܟ ܐܶܙܡܰܪ. ܐܰܠܳܗܳܐ ܐܶܙܡܰܪ ܠܳܟ ܒܟܶܢܳܪܳܐ ܩܰܕܺܝܫܳܐ ܕܺܝܣܪܳܐܶܝܠ.
32 ܘܰܢܫܰܒ̈ܚܳܢ ܣܶܦ̈ܘܳܬܝ̱ ܟܰܕ ܐܶܙܡܰܪ ܠܳܟ ܘܢܰܦܫܝ̱ ܕܰܦܪܰܩܬ.
33 ܠܶܫܳܢܝ̱ ܟܽܠܶܗ ܝܰܘܡܳܐ ܢܰܘܕܶܐ ܒܙܰܕܺܝܩܽܘܬܳܟ. ܡܶܛܽܠ ܕܢܶܒܗܬܽܘܢ ܘܢܰܚܦܪܽܘܢ ܐܰܝܠܶܝܢ ܕܨܳܒܶܝܢ ܠܒܺܝܫܬܝ̱.