Psalms 46
The Book of Psalms
܀ ܡܙܡܘܪܐ ܡܘ ܀
ܥܰܠ ܐܳܚܳܙ ܘܰܕܒܶܝܬ ܚܶܙܰܩܝܳܐ ܕܶܐܫܬܰܘܙܰܒܘ ܡܶܢ ܕܰܖ̈ܡܽܘܣܩܳܝܶܐ
1 ܐܰܠܳܗܰܢ ܒܶܝܬ ܓܰܘܣܰܢ ܥܰܫܺܝܢܳܐ. ܘܰܡܥܰܕܪܳܢܰܢ ܒܙܰܒ̈ܢܶܐ ܕܽܐܘܠܨܳܢܳܐ.
2 ܐܶܫܬܟܰܚܬ ܠܰܢ ܒܟܽܠܙܒܰܢ. ܡܶܛܽܠ ܗܳܢܳܐ ܠܳܐ ܕܳܚܠܺܝܢܰܢ. ܡܳܐ ܕܙܳܝܥܳܐ ܐܰܪܥܳܐ ܘܙܳܝܥܺܝܢ ܛܽܘܖ̈ܶܐ ܒܠܶܒܳܐ ܕܝܰܡ̈ܡܶܐ.
3 ܢܶܬܕܰܠܚܽܘܢ ܡܰܝ̈ܗܽܘܢ ܘܢܶܬܗܰܦܟܽܘܢ. ܘܰܢܙܽܘܥܽܘܢ ܛܽܘܖ̈ܶܐ ܒܥܽܘܫܢܶܗ.
4 ܬܰܦ̈ܶܐ ܕܢܰܗܖ̈ܰܘܳܬܳܐ ܢܚܰܕܽܘܢ ܒܰܡܕܺܝܢ̱ܬܶܗ ܕܰܐܠܳܗܰܢ. ܩܰܕܺܝܫ ܗܽܘ ܒܶܝܬ ܡܰܫܪܝܶܗ ܕܰܡܪܰܝܡܳܐ.
5 ܐܰܠܳܗܳܐ ܒܓܰܘܳܗ̇ ܠܳܐ ܬܙܽܘܥ. ܢܥܰܕܪܺܝܗ̇ ܐܰܠܳܗܳܐ ܒܥܶܕܳܢ ܨܰܦܪܳܐ.
6 ܐܶܫܬܓܶܫܘ ܥܰܡ̈ܡܶܐ ܘܙܳܥ̈ܝ ܡܰܠܟ̈ܘܳܬܳܐ. ܐܰܪܺܝܡ ܩܳܠܶܗ ܘܙܳܥܰܬ ܐܰܪܥܳܐ.
7 ܡܳܪܝܳܐ ܚܰܝܠܬܳܢܳܐ ܥܰܡܰܢ. ܘܰܡܥܰܕܪܳܢܰܢ ܐܰܠܳܗܶܗ ܕܝܰܥܩܽܘܒ.
8 ܬܰܘ ܚܙܰܘ ܥܒܳܕܰܘ̈ܗܝ ܕܰܐܠܳܗܳܐ. ܕܥܳܒܶܕ ܬܶܕܡܖ̈ܳܬܳܐ ܒܰܐܪܥܳܐ.
9 ܘܡܒܰܛܶܠ ܩܖ̈ܳܒܶܐ ܡܶܢ ܣܰܘ̈ܦܶܝܗ̇ ܕܰܐܪܥܳܐ. ܩܶܫ̈ܬܳܬܳܐ ܡܬܰܒܰܪ ܘܰܡܬܰܒܰܪ ܢܰܝܙ̈ܟܶܐ. ܘܡܰܖ̈ܟܒܳܬܳܐ ܡܰܘܩܶܕ ܒܢܽܘܪܳܐ.
10 ܐܶܬܦܢܰܘ ܘܕܰܥܘ ܕܶܐܢܳܐ ܐ̱ܢܳܐ ܐܰܠܳܗܳܐ. ܐܶܬܬܪܺܝܡܶܬ ܒܥܰܡ̈ܡܶܐ ܘܶܐܬܬܪܺܝܡܶܬ ܒܰܐܪܥܳܐ. ܡܳܪܝܳܐ ܚܰܝܠܬܳܢܳܐ ܥܰܡܰܢ. ܘܰܡܥܰܕܪܳܢܰܢ ܐܰܠܳܗܶܗ ܕܝܰܥܩܽܘܒ.