Psalms 85
The Book of Psalms
܀ ܡܙܡܘܪܐ ܦܗ ܀
ܐܰܝܟ ܡܰܢ ܕܰܢܣܰܒܘ ܥܰܡܳܐ ܡܰܦܣܳܢܽܘܬܳܐ ܡܶܢ ܟܽܘܪܶܫ ܕܢܶܦܢܽܘܢ ܠܰܐܬܪܗܽܘܢ ܘܫܳܐܠܺܝܢ ܡܶܢ ܐܰܠܳܗܳܐ ܕܰܢܫܰܡܠܶܐ ܣܽܘܟܳܝܗܽܘܢ
1 ܨܒܰܝܬ ܡܳܪܝܳܐ ܒܰܐܪܥܳܟ. ܘܰܐܦܢܺܝܬ ܫܒܺܝܬܶܗ ܕܝܰܥܩܽܘܒ.
2 ܫܒܰܩܬ ܥܰܘܠܶܗ ܠܥܰܡܳܟ. ܘܟܰܣܺܝܬ ܟܽܠܗܽܘܢ ܚܛܳܗܰܝ̈ܗܽܘܢ.
3 ܘܰܐܥܒܰܪܬ ܟܽܠܳܗ̇ ܚܶܡܬܳܟ ܘܰܐܗܦܶܟܬ ܚܶܡܬܳܐ ܕܪܽܘܓܙܳܟ.
4 ܐܰܦܢܳܢ ܐܰܠܳܗܳܐ ܦܳܪܽܘܩܰܢ. ܘܒܰܛܶܠ ܪܽܘܓܙܳܟ ܡܶܢܰܢ. ܘܠܳܐ ܠܥܳܠܰܡ ܬܶܪܓܰܙ ܥܠܰܝܢ.
5 ܘܠܳܐ ܬܶܛܰܪ ܪܽܘܓܙܳܟ ܠܕܳܪܕܳܖ̈ܺܝܢ.
6 ܐܶܠܳܐ ܐܰܢ̱ܬ ܐܰܦܢܳܢ ܘܰܐܚܳܢ ܘܥܰܡܳܟ ܢܶܚܕܽܘܢ ܒܳܟ.
7 ܚܰܘܳܢ ܡܳܪܝܳܐ ܛܰܝܒܽܘܬܳܟ ܘܦܽܘܪܩܳܢܳܟ ܗܰܒ ܠܰܢ.
8 ܕܢܶܫܡܰܥ ܡܳܢܳܐ ܡܡܰܠܶܠ ܡܳܪܝܳܐ ܐܰܠܳܗܰܢ. ܕܰܡܡܰܠܶܠ ܫܠܳܡܳܐ ܥܰܠ ܥܰܡܶܗ ܘܥܰܡ ܙܰܕܺܝ̈ܩܰܘܗ̱ܝ. ܕܠܳܐ ܢܶܗܦܟܽܘܢ ܠܒܶܣܬܰܪܗܽܘܢ.
9 ܩܰܪܺܝܒ ܗܽܘ ܦܽܘܪܩܳܢܶܗ ܠܕܳܚ̈ܠܰܘܗ̱ܝ. ܢܶܫܪܶܐ ܐܺܝܩܳܪܶܗ ܒܰܐܪܥܰܢ.
10 ܛܰܝܒܽܘܬܳܐ ܘܩܽܘܫܬܳܐ ܐܰܪܥܽܘܢ. ܙܰܕܺܝܩܽܘܬܳܐ ܘܰܫܠܳܡܳܐ ܢܢܰܫܩܽܘܢ.
11 ܗܰܝܡܳܢܽܘܬܳܐ ܬܺܐܥܶܐ ܡܶܢ ܐܰܪܥܳܐ. ܘܙܰܕܺܝܩܽܘܬܳܐ ܐܰܕܺܝܩܰܬ ܡܶܢ ܫܡܰܝܳܐ.
12 ܘܳܐܦ ܡܳܪܝܳܐ ܢܶܬܶܠ ܛܳܒ̈ܳܬܶܗ. ܘܰܐܪܥܳܐ ܬܶܬܶܠ ܥܰܠ̈ܠܳܬܳܗ̇.
13 ܙܰܕܺܝܩܳܐ ܩܕܳܡܰܘܗ̱ܝ ܢܗܰܠܶܟ. ܘܰܢܣܺܝܡ ܒܰܐܪܥܳܐ ܗܶܠܟ̈ܳܬܶܗ.