Psalms 102
The Book of Psalms
܀ ܡܙܡܘܪܐ ܩܒ ܀
ܡܶܫܬܰܥܶܐ ܡܶܢ ܦܰܪܨܽܘܡܶܗ ܕܥܰܡܳܐ ܐܽܘܠܨܳܢܰܝ̈ܗܽܘܢ ܕܰܣܒܰܠܘ ܒܫܶܒܝܳܐ ܘܰܡܒܰܕܶܩ ܠܗܽܘܢ ܬܽܘܒ ܐܳܦ ܥܰܠ ܦܽܘܢܳܝܗܽܘܢ
1 ܡܳܪܝܳܐ ܫܡܰܥ ܨܠܽܘܬܝ̱. ܘܰܓܥܳܬܝ̱ ܠܘܳܬܳܟ ܬܶܥܽܘܠ.
2 ܠܳܐ ܬܰܗܦܶܟ ܐܰܦܰܝ̈ܟ ܡܶܢܝ̱ ܒܝܰܘܡܐ ܕܽܐܘܠܨܳܢܝ̱. ܐܶܠܳܐ ܐܰܪܟܶܢ ܠܺܝ ܐܶܕܢܳܟ ܒܝܰܘܡܳܐ ܕܶܐܩܪܶܝܟ ܘܒܰܥܓܰܠ ܥܢܺܝܢܝ̱.
3 ܡܶܛܽܠ ܕܰܓܡܰܪܘ ܒܬܶܢܳܢܳܐ ܝܰܘ̈ܡܰܝ. ܘܓܰܖ̈ܡܰܝ ܚܘܰܪܘ ܐܰܝܟ ܡܰܘ̈ܩܕܶܐ.
4 ܚܡܳܐ ܠܶܒܝ̱ ܐܰܝܟ ܥܶܣܒܳܐ ܘܺܝܒܶܫ. ܡܶܛܽܠ ܕܰܛܥܺܝܬ ܡܶܐܟܽܘܠܬܶܗ ܕܠܰܚܡܝ̱.
5 ܘܡܶܢ ܩܳܠܳܐ ܕܬܶܢ̈ܚܳܬܝ̱ ܕܒܶܩ ܒܶܣܪܝ̱ ܠܓܰܖ̈ܡܰܝ.
6 ܘܶܐܬܕܰܡܺܝܬ ܠܩܳܩܳܐ ܕܰܒܡܰܕܒܪܳܐ ܘܰܗܘܺܝܬ ܐܰܝܟ ܥܽܘܕܳܐ ܒܚܰܪܒܬܳܐ.
7 ܣܶܪܕܶܬ ܘܰܗܘܺܝܬ ܒܰܠܚܽܘܕܰܝ ܐܰܝܟ ܨܶܦܪܳܐ ܕܡܰܦܪܚܳܐ ܥܰܠ ܐܶܓܳܖ̈ܶܐ.
8 ܟܽܠܶܗ ܝܰܘܡܳܐ ܚܰܣܕܽܘܢܝ̱ ܒܥܶܠܕ̈ܒܳܒܰܝ ܘܰܡܫܰܒ̈ܚܳܢܰܝ ܒܺܝ ܝܺܡܰܘ.
9 ܡܶܛܽܠ ܕܩܶܛܡܳܐ ܐܰܝܟ ܠܰܚܡܳܐ ܠܶܥܣܶܬ ܘܡܰܫܬܰܝ ܒܰܒܟܳܬܳܐ ܡܶܙܓܶܬ.
10 ܡܶܢ ܩܕܳܡ ܚܶܡܬܳܟ ܘܪܽܘܓܙܳܟ. ܕܰܐܪܺܝܡܬܳܢܝ̱ ܘܰܫܕܰܝܬܳܢܝ̱.
11 ܝܰܘ̈ܡܰܝ ܐܰܝܟ ܛܶܠܳܠܳܐ ܐܶܬܪܟܶܢܘ ܘܶܐܢܳܐ ܝܶܒܫܶܬ ܐܰܝܟ ܥܶܣܒܳܐ.
12 ܘܰܐܢ̱ܬ ܡܳܪܝܳܐ ܠܥܳܠܰܡ ܩܰܝܳܡ ܐܰܢ̱ܬ ܘܕܽܘܟܪܳܢܳܟ ܠܕܳܪܕܳܖ̈ܺܝܢ.
13 ܐܰܢ̱ܬ ܩܽܘܡ ܘܪܰܚܶܡ ܥܰܠ ܨܶܗܝܽܘܢ. ܡܶܛܽܠ ܕܰܡܛܳܐ ܙܰܒܢܳܐ ܠܰܡܪܰܚܳܡܽܘ ܥܠܶܝܗ̇.
14 ܡܶܛܽܠ ܕܰܨܒܰܘ ܥܰܒܕܰܝ̈ܟ ܒܟܺܐܦܶܝ̈ܗ̇ ܘܰܠܥܰܦܪܳܗ̇ ܪܚܶܡܘ.
15 ܢܶܕܚܠܽܘܢ ܥܰܡ̈ܡܶܐ ܠܰܫܡܳܟ ܡܳܪܝܳܐ. ܘܟܽܠܗܽܘܢ ܡܰܠܟ̈ܶܐ ܕܰܐܪܥܳܐ ܠܺܐܝܩܳܪܳܟ.
16 ܡܶܛܽܠ ܕܒܳܢܶܐ ܡܳܪܝܳܐ ܠܨܶܗܝܽܘܢ ܘܡܶܬܚܙܶܐ ܒܫܽܘܒܚܶܗ.
17 ܘܡܶܬܦܢܶܐ ܥܰܠ ܨܠܽܘܬܳܐ ܕܡܶܣ̈ܟܺܢܶܐ. ܘܠܳܐ ܫܳܐܶܛ ܨܠܽܘܬܗܽܘܢ.
18 ܬܶܬܟܬܶܒ ܗܳܕܶܐ ܠܕܳܪܳܐ ܐ̱ܚܪܳܝܳܐ. ܘܥܰܡܳܐ ܕܡܶܬܒܪܶܐ ܢܫܰܒܰܚ ܠܡܳܪܝܳܐ.
19 ܡܶܛܽܠ ܕܰܐܕܺܝܩ ܡܶܢ ܡܪܰܘܡܳܐ ܕܩܽܘܕܫܶܗ. ܡܳܪܝܳܐ ܡܶܢ ܫܡܰܝܳܐ ܠܰܐܪܥܳܐ ܐܰܕܺܝܩ.
20 ܠܡܶܫܡܰܥ ܐܶܢܰܩܬܶܗ ܕܰܐܣܺܝܪܳܐ. ܘܰܠܡܶܫܪܳܐ ܒܢܰܝ̈ܳܐ ܡܶܢ ܡܰܘܬܳܐ.
21 ܕܢܶܫܬܰܥܽܘܢ ܒܨܶܗܝܽܘܢ ܫܡܶܗ ܕܡܳܪܝܳܐ. ܘܬܶܫܒ̈ܚܳܬܶܗ ܒܽܐܘܪܺܫܠܶܡ.
22 ܡܳܐ ܕܶܐܬܟܰܢܰܫܘ̱ ܥܰܡ̈ܡܶܐ ܐܰܟܚܕܳܐ. ܘܡܰܠܟ̈ܘܳܬܳܐ ܠܡܶܦܠܰܚ ܠܡܳܪܝܳܐ.
23 ܡܰܟܶܟܘ̱ ܚܰܝܠܝ̱ ܒܰܐܪܥܳܐ. ܘܰܒܨܺܝܪܽܘܬܳܐ ܕܝܰܘ̈ܡܰܝ ܐܶܡܰܪ ܠܺܝ.
24 ܠܳܐ ܬܰܣܩܰܢܝ̱ ܒܦܶܠܓܽܘܬ ܝܰܘ̈ܡܰܝ. ܘܰܠܕܳܪܕܳܖ̈ܺܝܢ ܫܢܰܝ̈ܟ.
25 ܡܶܢ ܠܩܽܘܕܡܺܝܢ ܐܰܪܥܳܐ ܬܰܩܶܢܬ. ܘܰܥܒܳܕ ܐܺܝ̈ܕܰܝܟ ܫܡܰܝ̈ܳܐ.
26 ܗܶܢܽܘܢ ܥܳܒܪܺܝܢ ܘܰܐܢ̱ܬ ܩܰܝܳܡ ܐܰܢ̱ܬ. ܘܟܽܠܗܽܘܢ ܐܰܝܟ ܠܒܽܘܫܳܐ ܒܳܠܶܝܢ ܘܰܐܝܟ ܡܰܪܛܽܘܛܳܐ ܡܶܬܚܰܠܦܺܝܢ.
27 ܘܰܐܢ̱ܬ ܐܰܝܟ ܕܺܐܝܬܰܝܟ ܐܰܢ̱ܬ ܘܰܫܢܰܝ̈ܟ ܠܳܐ ܓܳܡܖ̈ܳܢ.
28 ܘܰܒܢܰܝ̈ ܥܰܒܕܰܝ̈ܟ ܢܶܫܪܽܘܢ ܒܰܐܪܥܳܐ. ܘܙܰܪܥܗܽܘܢ ܩܕܳܡܰܝܟ ܢܶܬܩܰܢ.