Psalms 94
The Book of Psalms
܀ ܡܙܡܘܪܐ ܨܕ ܀
ܡܶܬܢܰܒܶܐ ܥܰܠ ܥܰܡܳܐ ܕܰܦܢܰܘ ܡܶܢ ܒܳܒܶܠ. ܕܰܡܬܰܢܶܝܢ ܥܳܩ̈ܳܬܳܐ ܕܰܣܒܰܠܘ ܒܙܰܒܢܳܐ ܕܫܶܒܺܝܗܽܘܢ
1 ܐܰܠܳܗܳܐ ܬܳܒܽܘܥܳܐ ܡܳܪܝܳܐ. ܐܰܠܳܗܳܐ ܬܳܒܽܘܥܳܐ ܐܶܬܓܠܰܝ.
2 ܐܶܬܬܪܺܝܡ ܕܰܝܳܢܳܗ̇ ܕܰܐܪܥܳܐ ܘܰܐܗܦܶܟ ܦܽܘܪܥܳܢܳܐ ܥܰܠ ܐܰܝܠܶܝܢ ܕܡܶܬܓܰܐܶܝܢ.
3 ܥܕܰܡܳܐ ܠܶܐܡܰܬܝ̱ ܖ̈ܰܫܺܝܥܶܐ ܡܳܪܝܳܐ. ܥܕܰܡܳܐ ܠܶܐܡܰܬܝ̱ ܖ̈ܰܫܺܝܥܶܐ ܡܶܫܬܰܒܗܪܺܝܢ.
4 ܓܳܣܶܝܢ ܘܰܡܡܰܠܠܺܝܢ ܥܰܘܠܳܐ ܘܳܐܡܪܺܝܢ ܟܽܠ ܥܳܒ̈ܕܰܝ ܥܰܘܠܳܐ.
5 ܕܡܰܟܶܟܘ ܠܥܰܡܳܟ ܡܳܪܝܳܐ ܘܰܠܝܳܪܬܽܘܬܳܟ ܫܰܥܒܶܕܘ.
6 ܠܰܐܖ̈ܡܠܳܬܳܐ ܘܰܠܥܳܡܽܘܖ̈ܶܐ ܩܛܰܠܘ ܘܰܠܝܰܬܡ̈ܶܐ ܚܪܰܒܘ.
7 ܘܶܐܡܰܪܘ ܕܠܳܐ ܚܳܙܶܐ ܡܳܪܝܳܐ ܘܠܳܐ ܡܶܣܬܰܟܰܠ ܐܰܠܳܗܶܗ ܕܝܰܥܩܽܘܒ.
8 ܐܶܣܬܰܟܠܘ ܫܳܛܰܝ̈ܳܐ ܕܥܰܡܳܐ. ܣܰܟ̈ܠܶܐ ܥܕܰܡܳܐ ܠܶܐܡܰܬܝ̱ ܠܳܐ ܡܶܣܬܰܟܠܺܝܢ ܐܢ̱ܬܽܘܢ.
9 ܗܰܘ ܕܰܢܨܰܒ ܐܶܕܢ̈ܶܐ ܕܰܠܡܳܐ ܠܳܐ ܫܳܡܰܥ.
10 ܗܰܘ ܕܰܒܪܳܐ ܥܰܝ̈ܢܶܐ ܕܰܠܡܳܐ ܠܳܐ ܡܶܣܬܰܟܰܠ. ܗܰܘ ܕܪܳܕܶܐ ܥܰܡ̈ܡܶܐ ܕܰܠܡܳܐ ܠܳܐ ܡܰܟܶܣ. ܗܰܘ ܕܡܰܠܶܦ ܠܒܰܪܢܳܫܳܐ ܝܺܕܰܥܬܳܐ.
11 ܡܳܪܝܳܐ ܝܳܕܰܥ ܡܰܚܫ̈ܒܳܬܗܽܘܢ ܕܰܒܢܰܝ̈ܢܳܫܳܐ. ܡܶܛܽܠ ܕܠܰܗܓܳܐ ܐܶܢܽܘܢ.
12 ܛܽܘܒܰܘܗ̱ܝ ܠܒܰܪܢܳܫܳܐ ܕܬܶܪܕܶܝܘܗ̱ܝ ܐܰܢ̱ܬ ܡܳܪܝܳܐ ܘܡܶܢ ܢܳܡܽܘܣܳܟ ܬܰܠܦܺܝܘܗ̱ܝ.
13 ܘܰܬܢܺܝܚܺܝܘܗ̱ܝ ܡܶܢ ܝܰܘ̈ܡܳܬܳܐ ܒܺܝ̈ܫܶܐ. ܥܕܰܡܳܐ ܕܢܶܬܚܦܰܪ ܠܖ̈ܰܫܺܝܥܶܐ ܓܽܘܡܳܨܳܐ.
14 ܡܶܛܽܠ ܕܠܳܐ ܡܰܪܦܶܐ ܡܳܪܝܳܐ ܠܥܰܡܶܗ ܘܰܠܝܳܪܬܽܘܬܶܗ ܠܳܐ ܫܳܒܶܩ.
15 ܡܶܛܽܠ ܕܒܳܬܰܪ ܙܰܕܺܝܩܳܐ ܗܳܦܶܟ ܕܺܝܢܳܐ ܘܒܳܬܪܶܗ ܟܽܠܗܽܘܢ ܬܖ̈ܺܝܨܰܝ ܠܶܒܳܐ.
16 ܡܰܢܽܘ ܢܩܽܘܡ ܠܺܝ ܥܰܡ ܒܺܝ̈ܫܶܐ. ܘܡܰܢܽܘ ܢܶܬܛܰܝܰܒ ܠܺܝ ܥܰܡ ܥܳܒ̈ܕܰܝ ܥܰܘܠܳܐ.
17 ܐܶܠܽܘܠܳܐ ܡܳܪܝܳܐ ܕܰܗܘܳܐ ܠܺܝ ܥܳܕܽܘܪܳܐ. ܥܰܕ ܩܰܠܺܝܠ ܫܳܪܝܳܐ ܗܘܳܬ ܢܰܦܫܝ̱ ܒܕܽܘܘܳܢܳܐ.
18 ܐܶܢܳܐ ܐܶܡܪܶܬ ܕܡܳܛܝ̈ ܖ̈ܶܓܠܰܝ ܘܛܰܝܒܽܘܬܳܟ ܡܳܪܝܳܐ ܣܡܰܟܬܰܢܝ̱.
19 ܒܣܽܘܓܳܐܐ ܕܟܺܐܒܰܘ̈ܗܝ̱ ܕܠܶܒܝ̱ ܒܽܘ̈ܝܳܐܰܝܟ ܦܰܪܩܽܘܗ̇ ܠܢܰܦܫܝ̱.
20 ܠܳܐ ܢܚܰܒܰܪ ܥܰܡܳܟ ܟܽܘܪܣܝܳܐ ܕܥܰܘ̈ܳܠܶܐ. ܕܰܓܒܰܠܘ̱ ܥܰܘܠܳܐ ܥܰܠ ܢܳܡܽܘܣܳܟ.
21 ܘܨܳܠܶܝܢ ܠܰܡܨܳܕ ܢܰܦܫܶܗ ܕܙܰܕܺܝܩܳܐ ܘܰܕܡܶܗ ܕܙܰܟܳܝܳܐ ܡܚܰܝܒܺܝܢ.
22 ܘܰܗܘܳܐ ܠܺܝ ܡܳܪܝܳܐ ܡܥܰܫܢܳܢܳܐ. ܐܰܠܳܗܳܐ ܬܰܩܺܝܦܳܐ ܡܥܰܕܪܳܢܳܐ.
23 ܐܰܗܦܶܟ ܥܠܰܝܗܽܘܢ ܥܰܘܠܗܽܘܢ ܘܰܒܒܺܝܫܽܘܬܗܽܘܢ ܫܰܬܶܩ ܐܶܢܽܘܢ. ܫܰܬܶܩ ܐܶܢܽܘܢ ܡܳܪܝܳܐ ܐܰܠܳܗܰܢ.