Psalms 37
The Book of Psalms
܀ ܡܙܡܘܪܐ ܠܙ ܀
ܡܰܪܬܝܳܢܽܘܬܳܐ ܘܡܰܠܦܳܢܽܘܬܳܐ ܕܰܠܘܳܬ ܟܽܠܢܳܫ
1 ܠܳܐ ܬܶܚܣܰܡ ܒܖ̈ܰܫܺܝܥܶܐ. ܘܠܳܐ ܬܶܛܰܢ ܒܥܳܒܕܰ̈ܝ ܥܰܘܠܳܐ.
2 ܡܶܛܽܠ ܕܰܐܝܟ ܓ̈ܶܠܶܐ ܒܰܥܓܰܠ ܝܳܒܫܺܝܢ. ܘܰܐܝܟ ܝܽܘܪܳܩܳܐ ܕܥܶܣܒܳܐ ܚܳܡܶܝܢ.
3 ܣܰܒܰܪ ܒܰܐܠܳܗܳܐ ܘܰܥܒܶܕ ܛܳܒܬܳܐ. ܥܡܰܪ ܒܰܐܪܥܳܐ ܘܰܒܥܺܝ ܗܰܝܡܳܢܽܘܬܳܐ.
4 ܣܰܒܰܪ ܒܡܳܪܝܳܐ ܘܢܶܬܶܠ ܠܳܟ ܫܶܐܠ̈ܶܬܶܗ ܕܠܶܒܳܟ.
5 ܬܪܽܘܨ ܩܕܳܡ ܡܳܪܝܳܐ ܐܽܘܪܚܳܟ ܘܣܰܒܰܪ ܒܶܗ. ܘܗܽܘ ܥܳܒܶܕ.
6 ܘܡܰܦܶܩ ܐܰܝܟ ܢܽܘܗܪܳܐ ܙܰܕܺܝܩܽܘܬܳܟ. ܘܕܺܝܢܰܝ̈ܟ ܐܰܝܟ ܛܰܗܪܳܐ.
7 ܒܥܺܝ ܡܶܢ ܡܳܪܝܳܐ ܘܨܰܠܳܐ ܩܕܳܡܰܘܗ̱ܝ. ܘܠܳܐ ܬܶܚܣܰܡ ܒܓܰܒܪܳܐ ܕܥܳܒܶܕ ܥܰܘܠܳܐ ܘܡܰܨܠܚܳܐ ܐܽܘܪܚܶܗ.
8 ܐܶܬܬܢܺܝܚ ܡܶܢ ܚܶܡܬܳܐ ܘܶܐܬܬܢܺܝܚ ܡܶܢ ܪܽܘܓܙܳܐ. ܘܠܳܐ ܬܶܚܣܰܡ ܠܡܶܥܒܰܕ ܒܺܝܫܬܳܐ.
9 ܡܶܛܽܠ ܕܒܺܝ̈ܫܶܐ ܣܳܝܦܺܝܢ. ܘܰܐܝܠܶܝܢ ܕܰܡܣܰܒܪܺܝܢ ܒܡܳܪܝܳܐ ܝܳܪܬܺܝܢ ܐܰܪܥܳܐ.
10 ܒܙܰܒܢܳܐ ܙܥܽܘܪܳܐ ܒܳܥܶܐ ܐܰܢ̱ܬ ܠܶܗ ܠܪܰܫܺܝܥܳܐ ܘܠܰܝܬܰܘܗ̱ܝ. ܘܚܳܐܰܪ ܐܰܢ̱ܬ ܒܕܽܘܟܬܶܗ ܘܠܳܐ ܡܶܫܬܟܰܚ.
11 ܘܡܶܣ̈ܟܺܢܶܐ ܝܳܪܬܺܝܢ ܐܰܪܥܳܐ. ܘܡܶܬܒܰܣܡܺܝܢ ܒܰܫܠܳܡܳܐ ܣܰܓܺܝܐܳܐ.
12 ܡܶܬܚܰܡܰܬ ܪܰܫܺܝܥܳܐ ܥܰܠ ܙܰܕܺܝܩܳܐ. ܘܰܡܚܰܪܶܩ ܫܶܢܰܘ̈ܗܝ̱ ܥܠܰܘܗ̱ܝ.
13 ܘܡܳܪܝܳܐ ܢܶܓܚܰܟ ܥܠܰܘܗ̱ܝ. ܡܶܛܽܠ ܕܝܳܕܰܥ ܕܰܡܛܳܐ ܝܰܘܡܶܗ.
14 ܣܰܝܦܳܐ ܫܡܰܛܘ ܖ̈ܰܫܺܝܥܶܐ ܘܰܡܬܰܚܘ ܩܶܫܬܳܐ. ܕܢܶܩܛܠܽܘܢ ܠܡܶܣ̈ܟܺܢܶܐ ܘܰܠܒܳܝ̈ܫܶܐ ܘܠܰܐܝܠܶܝܢ ܕܰܬܖ̈ܺܝܨܳܢ ܐܽܘܖ̈ܚܳܬܗܽܘܢ.
15 ܣܰܝܦܗܽܘܢ ܢܶܥܽܘܠ ܒܠܶܒܗܽܘܢ. ܘܩܶܫ̈ܬܳܬܗܽܘܢ ܢܶܬܬܰܒܖ̈ܳܢ.
16 ܦܰܩܳܚ ܩܰܠܺܝܠ ܠܙܰܕܺܝܩܳܐ ܡܶܢ ܩܶܢܝܳܢܳܐ ܣܰܓܺܝܐܳܐ ܕܖ̈ܰܫܺܝܥܶܐ.
17 ܡܶܛܽܠ ܕܰܕܖ̈ܳܥܰܝܗܽܘܢ ܕܖ̈ܰܫܺܝܥܶܐ ܢܶܬܬܰܒܪܽܘܢ. ܡܣܰܡܶܟ ܠܙܰܕܺܝ̈ܩܶܐ ܡܳܪܝܳܐ.
18 ܘܝܳܕܰܥ ܡܳܪܝܳܐ ܝܰܘ̈ܡܳܬܗܽܘܢ ܕܬܰܡܺܝ̈ܡܶܐ. ܘܝܳܪܬܽܘܬܗܽܘܢ ܠܥܳܠܰܡ ܬܶܗܘܶܐ.
19 ܘܠܳܐ ܢܶܒܗܬܽܘܢ ܒܫܳܥܬܳܐ ܒܺܝܫܬܳܐ. ܘܰܒܝܰܘ̈ܡܳܬܳܐ ܕܟܰܦܢܳܐ ܢܶܣܒܥܽܘܢ.
20 ܡܶܛܽܠ ܕܖ̈ܰܫܺܝܥܶܐ ܐܳܒܕܺܝܢ. ܘܰܒܥܶܠܕ̈ܒܳܒܰܘܗ̱ܝ ܕܡܳܪܝܳܐ ܡܦܰܛܡ̈ܶܐ ܓܳܡܪܺܝܢ. ܘܰܐܝܟ ܬܶܢܳܢܳܐ ܣܳܝܦܺܝܢ.
21 ܝܳܙܶܦ ܪܰܫܺܝܥܳܐ ܘܠܳܐ ܦܳܪܰܥ. ܘܙܰܕܺܝܩܳܐ ܡܪܰܚܶܡ ܘܝܳܗܶܒ.
22 ܡܶܛܽܠ ܕܰܒܖ̈ܺܝܟܰܘܗ̱ܝ ܕܡܳܪܝܳܐ ܝܳܪܬܺܝܢ ܐܰܪܥܳܐ. ܘܠܺܝ̈ܛܰܘܗ̱ܝ ܢܣܽܘܦܽܘܢ.
23 ܡܶܢ ܩܕܳܡ ܡܳܪܝܳܐ ܡܰܬܩ̈ܢܳܢ ܗܶܠܟ̈ܳܬܶܗ ܕܓܰܒܪܳܐ. ܐܘܪܚܶܗ ܗܽܘ ܡܰܬܩܶܢ.
24 ܡܶܛܽܠ ܕܶܐܢ ܢܳܦܶܠ ܠܳܐ ܡܰܗܰܪ. ܕܡܳܪܝܳܐ ܐܰܚܺܝܕ ܒܺܐܝܕܶܗ.
25 ܛܠܶܐ ܗ̱ܘܺܝܬ ܘܣܶܐܒܶܬ. ܘܠܳܐ ܚܙܺܝܬ ܙܰܕܺܝܩܳܐ ܕܶܐܫܬܒܶܩ. ܐܳܦܠܳܐ ܙܰܪܥܶܗ ܕܰܒܥܳܐ ܠܰܚܡܳܐ.
26 ܐܶܠܳܐ ܟܽܠܶܗ ܝܰܘܡܳܐ ܡܪܰܚܶܡ ܘܡܰܘܙܶܦ. ܘܙܰܪܥܶܗ ܡܶܬܒܰܪܰܟ.
27 ܥܒܰܪ ܡܶܢ ܒܺܝܫܬܳܐ ܘܰܥܒܶܕ ܛܳܒܬܳܐ. ܐܶܬܬܢܺܝܚ ܠܥܳܠܰܡ.
28 ܡܶܛܽܠ ܕܡܳܪܝܳܐ ܕܺܝܢܳܐ ܪܳܚܶܡ. ܘܠܳܐ ܫܳܒܶܩ ܠܙܰܕܺܝ̈ܩܰܘܗ̱ܝ. ܐܶܠܳܐ ܠܥܳܠܰܡ ܡܢܰܛܰܪ ܠܗܽܘܢ. ܘܙܰܪܥܗܽܘܢ ܕܖ̈ܰܫܺܝܥܶܐ ܡܰܘܒܶܕ.
29 ܘܙܰܕܺܝ̈ܩܶܐ ܝܳܪܬܺܝܢ ܐܰܪܥܳܐ. ܘܫܳܪܶܝܢ ܥܠܶܝܗ̇ ܠܥܳܠܰܡ.
30 ܚܶܟܡܬܳܐ ܪܳܢܶܐ ܦܽܘܡܶܗ ܕܙܰܕܺܝܩܳܐ. ܘܠܶܫܳܢܶܗ ܡܡܰܠܶܠ ܕܺܝܢܳܐ.
31 ܢܳܡܽܘܣܶܗ ܕܰܐܠܳܗܳܐ ܒܠܶܒܶܗ ܘܠܳܐ ܙܳܝ̈ܥܳܢ ܕܽܘܖ̈ܟܳܬܶܗ.
32 ܡܣܰܟܶܐ ܪܰܫܺܝܥܳܐ ܠܙܰܕܺܝܩܳܐ ܘܒܳܥܶܐ ܠܡܶܩܛܠܶܗ.
33 ܘܡܳܪܝܳܐ ܠܳܐ ܢܶܫܒܩܺܝܘܗ̱ܝ ܒܺܐܝ̈ܕܰܘܗ̱ܝ. ܐܶܠܳܐ ܢܚܰܝܒܺܝܘܗ̱ܝ ܒܕܺܝܢܳܐ.
34 ܣܰܒܰܪ ܒܡܳܪܝܳܐ ܘܛܰܪ ܐܽܘܪܚܶܗ. ܘܰܢܪܺܝܡܳܟ ܠܡܺܐܪܰܬ ܐܰܪܥܳܐ. ܘܡܳܐ ܕܣܳܝܦܺܝܢ ܖ̈ܰܫܺܝܥܶܐ ܬܶܚܙܶܐ.
35 ܡܶܛܽܠ ܕܰܚܙܺܝܬ ܖ̈ܰܫܺܝܥܶܐ ܕܡܶܫܬܰܒܗܪܺܝܢ. ܘܡܶܬܬܪܺܝܡܺܝܢ ܐܰܝܟ ܐܺܝ̈ܠܳܢܶܐ ܕܥܳܒܳܐ.
36 ܟܰܕ ܥܶܒܪܶܬ ܠܰܝܬܰܘܗ̱ܝ. ܘܰܒܥܺܝܬܶܗ ܘܠܳܐ ܐܶܫܟܰܚܬܶܗ.
37 ܛܰܪ ܬܰܡܺܝܡܽܘܬܳܐ ܘܰܓܒܺܝ ܬܪܺܝܨܽܘܬܳܐ. ܡܶܛܽܠ ܕܺܐܝܬ ܚܰܪܬܳܐ ܛܳܒܬܳܐ ܠܓܰܒܖ̈ܶܐ ܕܰܫܠܳܡܳܐ.
38 ܘܚܰܛܳܝ̈ܶܐ ܢܣܽܘܦܽܘܢ ܐܰܟܚܕܳܐ. ܘܚܰܪܬܳܐ ܕܖ̈ܰܫܺܝܥܶܐ ܠܰܐܒܕܳܢܳܐ.
39 ܦܳܪܽܘܩܳܐ ܕܙܰܕܺܝ̈ܩܶܐ ܡܳܪܝܳܐ. ܡܥܰܕܰܪ ܠܗܽܘܢ ܒܙܰܒܢܳܐ ܕܥܳܩܬܳܐ.
40 ܡܥܰܕܰܪ ܠܗܽܘܢ ܡܳܪܝܳܐ ܘܰܡܦܰܨܶܐ ܠܗܽܘܢ. ܘܰܡܦܰܨܶܐ ܠܗܽܘܢ ܡܶܢ ܖ̈ܰܫܺܝܥܶܐ. ܘܦܳܪܶܩ ܠܗܽܘܢ ܡܶܛܽܠ ܕܣܰܒܰܪܘ ܒܶܗ.