Psalms 79
The Book of Psalms
܀ ܡܙܡܘܪܐ ܥܛ ܀
ܐܰܡܺܝܪ ܡܶܢ ܦܰܪܨܽܘܦ ܡܰܩܒܳܝ̈ܶܐ ܟܰܕ ܡܰܟܪܙܺܝܢ ܘܰܡܬܰܢܶܝܢ ܠܰܐܠܳܗܳܐ ܕܰܐܝܠܶܝܢ ܒܺܝ̈ܫܳܬܳܐ ܐܰܣܒܶܠܘ ܐܶܢܽܘܢ ܐܰܢܛܝܳܟܳܘܣ ܘܕܶܡܰܛܪܺܝܳܘܣ ܠܰܒܢܰܝ̈ ܥܰܡܗܽܘܢ܆ ܘܫܳܐܠܺܝܢ ܥܽܘܕܪܳܢܳܐ
1 ܐܰܠܳܗܳܐ ܥܰܠܘ̱ ܥܰܡ̈ܡܶܐ ܠܝܳܪܬܽܘܬܳܟ. ܘܛܰܡܐܽܘܗ̱ܝ ܠܗܰܝܟܠܳܟ ܩܰܕܺܝܫܳܐ. ܘܥܰܒܕܽܘܗ̇ ܠܽܐܘܪܺܫܠܶܡ ܚܰܪܒܬܳܐ.
2 ܝܰܗܒܘ ܫܠܰܕ̈ܶܐ ܕܥܰܒܕܰܝ̈ܟ ܡܶܐܟܽܘܠܬܳܐ ܠܦܳܪܰܚܬܳܐ ܕܰܫܡܰܝܳܐ. ܘܒܶܣܪܳܐ ܕܙܰܕܺܝܩܰܝ̈ܟ ܠܚܰܝܽܘܬܳܐ ܕܰܐܪܥܳܐ.
3 ܐܶܫܰܕܘ ܕܶܡܗܽܘܢ ܐܰܝܟ ܡܰܝ̈ܳܐ ܚܕܳܖ̈ܶܝܗ̇ ܕܽܐܘܪܺܫܠܶܡ ܘܠܰܝܬ ܕܩܳܒܰܪ.
4 ܗܘܰܝܢ ܚܶܣܕܳܐ ܠܰܫ̈ܒܳܒܰܝܢ. ܘܡܽܘܝܳܩܳܐ ܘܒܽܘܙܳܚܳܐ ܠܰܐܝܠܶܝܢ ܕܰܚܕܳܖ̈ܰܝܢ ܐܶܢܽܘܢ.
5 ܥܕܰܡܳܐ ܠܶܐܡܰܬܝ̱ ܪܳܓܶܙ ܐܰܢ̱ܬ ܡܳܪܝܳܐ. ܘܝܳܩܶܕ ܐܰܝܟ ܢܽܘܪܳܐ ܪܽܘܓܙܳܟ.
6 ܐܰܫܽܘܕ ܪܽܘܓܙܳܟ ܥܰܠ ܥܰܡ̈ܡܶܐ ܐܰܝܠܶܝܢ ܕܠܳܐ ܝܰܕܥܽܘܟ. ܘܥܰܠ ܡܰܠܟ̈ܘܳܬܳܐ ܐܰܝܠܶܝܢ ܕܒܰܫܡܳܟ ܠܳܐ ܩܖ̈ܰܝ.
7 ܡܶܛܽܠ ܕܰܐܟܠܽܘܗ̱ܝ ܠܝܰܥܩܽܘܒ ܘܰܠܕܰܝܪܶܗ ܚܪܰܒܘ̱.
8 ܠܳܐ ܬܶܬܕܟܰܪ ܠܰܢ ܚܛܳܗܰܝ̈ܢ ܩܰܕ̈ܡܳܝܶܐ. ܒܰܥܓܰܠ ܢܩܰܕܡܽܘܢܳܢ ܖ̈ܰܚܡܰܝܟ. ܡܶܛܽܠ ܕܶܐܬܡܰܟܰܟܢ ܛܳܒ.
9 ܥܰܕܰܪܰܝܢ ܐܰܠܳܗܳܐ ܦܳܪܽܘܩܰܢ. ܡܶܛܽܠ ܐܺܝܩܳܪܳܐ ܕܰܫܡܳܟ. ܚܰܣܳܢ ܘܦܰܨܳܢ ܡܶܢ ܚܛܳܗܰܝ̈ܢ ܡܶܛܽܠ ܫܡܳܟ.
10 ܕܠܳܐ ܢܺܐܡܪܽܘܢ ܥܰܡ̈ܡܶܐ ܐܰܝܟܰܘ ܐܰܠܳܗܗܽܘܢ. ܬܶܬܺܝܕܰܥ ܒܥܰܡ̈ܡܶܐ ܠܥܺܢܰܝ̈ܢ ܬܒܰܥܬܳܐ ܕܰܕܡܳܐ ܕܥܰܒܕܰܝ̈ܟ ܕܶܐܬܶܐܫܶܕ.
11 ܬܶܥܽܘܠ ܩܕܳܡܰܝܟ ܐܶܢܰܩܬܶܗ ܕܰܐܣܺܝܪܳܐ. ܒܪܰܒܽܘܬܳܐ ܕܰܕܪܳܥܳܟ ܫܪܺܝ ܒܢܰܝ̈ܳܐ ܡܶܢ ܡܰܘܬܳܐ.
12 ܘܰܦܪܽܘܥ ܠܰܫ̈ܒܳܒܰܝܢ ܚܰܕ ܒܫܰܒܥܳܐ ܒܥܽܘܒܗܽܘܢ ܚܶܣܕܳܐ ܕܚܰܣܕܽܘܟ ܡܳܪܝܳܐ.
13 ܘܰܚܢܰܢ ܥܰܡܳܟ ܘܥܳܢ̈ܳܐ ܕܡܰܪܥܺܝܬܳܟ ܢܰܘܕܶܐ ܠܳܟ ܠܥܳܠܰܡ. ܘܰܠܕܳܪܕܳܖ̈ܺܝܢ ܢܶܫܬܰܥܶܐ ܬܶܕܡܖ̈ܳܬܳܟ.