Psalms 39
The Book of Psalms
܀ ܡܙܡܘܪܐ ܠܛ ܀
ܐܰܡܺܝܪ ܠܕܰܘܺܝܕ ܟܰܕ ܐܺܝܬܰܘܗ̱ܝ ܗܘܳܐ ܒܽܐܘܠܨܳܢܳܐ ܕܡܰܣܒܶܠ ܗܘܳܐ ܠܶܗ ܫܳܐܳܘܠ
1 ܐܶܡܪܶܬ ܕܶܐܛܰܪ ܐܽܘܪܚܝ̱ ܘܠܳܐ ܐܶܚܛܶܐ ܒܠܶܫܳܢܝ̱. ܐܶܛܰܪ ܦܽܘܡܝ̱ ܡܶܢ ܥܰܘܠܳܐ ܡܶܛܽܠ ܖ̈ܰܫܺܝܥܶܐ ܕܠܽܘܩܒܰܠܝ̱.
2 ܚܶܪܫܶܬ ܘܶܐܬܟܰܡܪܶܬ ܘܰܕܘܺܝܬ ܡܶܢ ܛܳܒܬܳܐ. ܘܟܺܐܒܝ̱ ܐܶܬܕܰܠܰܚ.
3 ܚܰܡ ܠܶܒܝ̱ ܒܓܰܘܝ̱ ܘܰܒܓܽܘܫܡܝ̱ ܐܶܚܕܰܬ ܢܽܘܪܳܐ. ܪܢܺܝܬ ܒܠܶܫܳܢܝ̱.
4 ܘܚܰܘܝܰܢܝ̱ ܡܳܪܝܳܐ ܚܰܪܬܝ̱. ܘܰܡܫܽܘܚܬܳܐ ܕܝܰܘ̈ܡܰܝ ܡܳܢܳܐ ܗ̱ܝ. ܕܶܐܕܰܥ ܠܡܳܢܳܐ ܦܳܐܶܫ ܐ̱ܢܳܐ.
5 ܕܗܳܐ ܒܰܡܫܽܘܚܬܳܐ ܝܰܗܒܬ ܝܰܘ̈ܡܰܝ. ܘܦܰܘܫܝ̱ ܐܰܝܟ ܠܳܐ ܡܶܕܶܡ ܗܽܘ ܩܕܳܡܰܝܟ. ܡܶܛܽܠ ܕܟܽܠܗܽܘܢ ܒܢܰܝ̈ܢܳܫܳܐ ܐܰܝܟ ܠܰܗܓܳܐ ܐܶܢܽܘܢ ܩܳܝܡܺܝܢ.
6 ܡܶܛܽܠ ܕܰܒܨܰܠܡܳܐ ܡܗܰܠܶܟ ܓܰܒܪܳܐ ܘܰܐܝܟ ܠܰܗܓܳܐ ܚܳܡܶܐ. ܣܳܐܶܡ ܣܺܝ̈ܡܳܬܳܐ ܘܠܳܐ ܝܳܕܰܥ ܠܡܰܢܽܘ ܚܳܡܶܠ ܠܗܶܝܢ.
7 ܡܶܟܺܝܠ ܡܰܢܽܘ ܣܰܒܪܝ̱ ܐܶܠܳܐ ܐܶܢ ܐܰܢ̱ܬ ܡܳܪܝܳܐ.
8 ܡܶܢ ܟܽܠܗܶܝܢ ܣܰܟ̈ܠܘܳܬܝ̱ ܦܰܨܳܢܝ̱. ܘܚܶܣܕܳܐ ܠܥܰܘ̈ܳܠܶܐ ܠܳܐ ܬܶܥܒܕܰܢܝ̱.
9 ܚܶܪܫܶܬ ܘܠܳܐ ܦܶܬܚܶܬ ܦܽܘܡܝ ܡܶܛܽܠ ܕܰܐܢ̱ܬ ܥܒܰܕܬ.
10 ܐܰܥܒܰܪ ܡܶܢܝ̱ ܢܶܓܕܳܟ ܘܡܶܢ ܡܚܽܘܬܳܐ ܕܺܐܝܕܰܝ̈ܟ.
11 ܓܶܡܪܶܬ ܒܡܰܟܣܳܢܽܘܬܳܐ ܕܥܰܠ ܐܰܦܰܝ̈ ܚܛܳܗܰܝ̈. ܪܕܰܝܬ ܓܰܒܪܳܐ ܘܰܐܥܒܰܪܬ ܐܰܝܟ ܚܰܒܬܳܐ ܖ̈ܓܺܝܓܳܬܶܗ. ܘܰܐܝܟ ܠܰܗܓܳܐ ܐܶܢܽܘܢ ܟܽܠܗܽܘܢ ܒܢܰܝ̈ܢܳܫܳܐ.
12 ܫܡܰܥ ܡܳܪܝܳܐ ܨܠܽܘܬܝ̱ ܘܒܳܥܽܘܬܝ̱ ܘܨܽܘܬ ܠܕܶܡܥܰܬܝ̱. ܘܠܳܐ ܬܶܫܬܽܘܩ ܡܶܛܽܠ ܕܥܳܡܽܘܪܳܐ ܐ̱ܢܳܐ ܥܰܡܳܟ. ܘܬܰܘܬܳܒܳܐ ܐܰܝܟ ܟܽܠܗܽܘܢ ܐܰܒܳܗܰܝ̈.
13 ܦܪܽܘܩܰܝܢܝ̱ ܘܶܐܬܬܢܺܝܚ. ܥܰܕܠܳܐ ܐܺܙܰܠ ܘܬܽܘܒ ܠܳܐ ܐܺܝܬܰܝ.