Psalms 80
The Book of Psalms
܀ ܡܙܡܘܪܐ ܦ ܀
ܡܶܬܢܰܒܶܐ ܥܰܠ ܡܰܩܒܳܝ̈ܶܐ. ܐܰܝܟ ܡܰܢ ܕܡܶܬܟܰܫܦܺܝܢ ܠܰܐܠܳܗܳܐ ܘܫܳܐܠܺܝܢ ܖ̈ܰܚܡܶܐ
1 ܪܳܥܝܶܗ ܕܺܝܣܪܳܐܶܝܠ ܨܽܘܬ. ܘܕܰܒܰܪ ܐܰܝܟ ܥܳܢ̈ܳܐ ܠܝܰܘܣܶܦ. ܝܳܬܶܒ ܥܰܠ ܟܖ̈ܽܘܒܶܐ ܐܶܬܓܠܰܝ.
2 ܩܕܳܡ ܐܰܦܪܶܝܡ ܘܒܶܢܝܳܡܶܝܢ ܘܰܡܢܰܫܶܐ ܚܰܘܳܐ ܓܰܢ̱ܒܳܪܽܘܬܳܟ ܘܬܳܐ ܠܦܽܘܪܩܳܢܰܢ.
3 ܐܰܠܳܗܳܐ ܚܰܝܠܬܳܢܳܐ ܐܰܦܢܳܢ. ܘܰܐܢܗܰܪ ܐܰܦܰܝ̈ܟ ܘܢܶܬܦܪܶܩ.
4 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ. ܥܕܰܡܳܐ ܠܶܐܡܰܬܝ ܪܳܓܶܙ ܐܰܢ̱ܬ ܥܰܠ ܨܠܽܘܬܶܗ ܕܥܰܒܕܳܟ.
5 ܐܰܘܟܶܠܬ ܐܶܢܽܘܢ ܠܰܚܡܳܐ ܒܕܶܡܰܥܬܳܐ.
6 ܘܰܐܫܩܺܝܬ ܐܶܢܽܘܢ ܒܕܶܡܥܬܳܐ. ܥܒܰܕܬܳܢ ܪܶܢܝܳܐ ܠܰܫ̈ܒܳܒܰܝܢ. ܘܰܒܥܶܠܕ̈ܒܳܒܰܝܢ ܡܰܝܶܩܘ ܒܰܢ.
7 ܐܰܠܳܗܳܐ ܚܰܝܠܬܳܢܳܐ ܐܰܦܢܳܢ. ܘܰܐܢܗܰܪ ܐܰܦܰܝ̈ܟ ܘܢܶܬܦܪܶܩ.
8 ܓܦܶܬܳܐ ܐܰܦܶܩܬ ܡܶܢ ܡܶܨܪܶܝܢ. ܘܰܐܘܒܶܕܬ ܥܰܡ̈ܡܶܐ ܘܰܢܨܰܒܬܳܗ̇.
9 ܘܚܳܪܬ ܒܳܗ̇ ܘܰܢܨܰܒܬ ܥܶܩܳܪܳܗ̇. ܘܰܡܠܳܬ ܐܰܪܥܳܐ ܡܶܢܳܗ̇.
10 ܘܶܐܬܟܰܣܺܝܘ̱ ܛܽܘܖ̈ܶܐ ܡܶܢ ܛܶܠܳܠܳܗ̇. ܘܥܰܘ̈ܦܶܝܗ̇ ܥܰܠ ܐܰܖ̈ܙܰܘܗ̱ܝ ܕܰܐܠܳܗܳܐ.
11 ܫܕܳܬ ܓܝܳܕܶܝ̈ܗ̇ ܥܕܰܡܳܐ ܠܝܰܡܳܐ. ܘܥܰܠ ܢܰܗܖ̈ܰܘܳܬܳܐ ܥܢܳܩܶܝ̈ܗ̇.
12 ܠܡܳܢܳܐ ܬܪܰܥܬ ܣܝܳܓܳܗ̇. ܘܕܳܫܽܘܗ̇ ܟܽܠ ܥܳܒܖ̈ܰܝ ܐܽܘܪܚܳܐ.
13 ܘܰܐܟܠܳܗ̇ ܚܙܺܝܪܳܐ ܕܥܳܒܳܐ. ܘܚܰܝ̈ܘܳܬܳܐ ܕܒܰܪܳܐ ܖ̈ܥܰܝܳܗ̇.
14 ܐܰܠܳܗܳܐ ܚܰܝܠܬܳܢܳܐ ܐܶܬܦܰܢ. ܘܚܽܘܪ ܡܶܢ ܫܡܰܝܳܐ ܘܰܚܙܺܝ. ܘܰܦܩܽܘܕܶܝܗ̇ ܠܰܓܦܶܬܳܐ ܗܳܕܶܐ.
15 ܘܰܠܣܰܬܳܐ ܕܢܶܨܒܰܬ ܝܰܡܺܝܢܳܟ. ܘܰܠܒܰܪܢܳܫܳܐ ܕܚܰܝܶܠܬ ܠܳܟ.
16 ܐܰܘܩܶܕ ܒܢܽܘܪܳܐ ܫܰܒܽܘ̈ܩܶܝܗ̇. ܡܶܢ ܟܳܐܬܳܐ ܕܰܐܦܰܝ̈ܟ ܢܺܐܒܕܽܘܢ.
17 ܬܶܗܘܶܐ ܐܺܝܕܳܟ ܕܝܰܡܺܝܢܳܐ ܥܰܠ ܓܰܒܪܳܐ ܘܥܰܠ ܒܰܪܢܳܫܳܐ ܕܚܰܝܶܠܬ ܠܳܟ.
18 ܘܠܳܐ ܢܶܗܦܽܘܟ ܡܶܢܳܟ. ܐܶܠܳܐ ܐܰܚܳܢ ܘܒܰܫܡܳܟ ܢܶܩܪܶܐ.
19 ܡܳܪܝܳܐ ܐܰܠܳܗܳܐ ܚܰܝܠܬܳܢܳܐ ܐܰܦܢܳܢ. ܘܰܐܢܗܰܪ ܐܰܦܰܝ̈ܟ ܘܢܶܬܦܪܶܩ.