Psalms 49
The Book of Psalms
܀ ܡܙܡܘܪܐ ܡܛ ܀
ܡܰܪܬܝܳܢܽܘܬܳܐ ܕܰܠܘܳܬ ܟܽܠܗܽܘܢ ܒܢܰܝ̈ܢܳܫܳܐ. ܕܠܳܐ ܢܶܬܬܰܟܠܽܘܢ ܥܰܠ ܥܽܘܬܪܗܽܘܢ
1 ܫܡܰܥܘ ܗܳܕܶܐ ܟܽܠܟܽܘܢ ܥܰܡ̈ܡܶܐ. ܘܨܽܘܬ ܟܽܠ ܝܳܬܒܰܝ̈ ܐܰܪܥܳܐ.
2 ܒܢܰܝ̈ ܐܰܪܥܳܐ ܘܰܒܢܰܝ̈ܢܳܫܳܐ. ܐܰܟܚܕܳܐ ܥܰܬܺܝܖ̈ܶܐ ܘܡܶܣ̈ܟܺܢܶܐ.
3 ܦܽܘܡܝ̱ ܢܡܰܠܶܠ ܚܶܟܡܬܳܐ. ܘܪܶܢܝܶܗ ܕܠܶܒܝ̱ ܣܽܘܟܳܠܐ.
4 ܐܶܨܠܶܐ ܐܶܕܢܰܝ̈ ܠܡ̈ܰܬܠܶܐ. ܘܶܐܡܰܠܶܠ ܒܟܶܢܳܪܳܐ ܐܽܘܚ̈ܕܳܬܝ̱.
5 ܠܳܐ ܕܳܚܶܠ ܐ̱ܢܳܐ ܒܝܰܘ̈ܡܳܬܳܐ ܒܺܝ̈ܫܶܐ. ܥܰܘܠܳܐ ܕܰܒܥܶܠܕ̈ܒܳܒܰܝ ܟܰܪܟܰܢܝ̱.
6 ܟܽܠ ܕܰܬܟܺܝܠܺܝܢ ܥܰܠ ܚܰܝܠܗܽܘܢ ܘܡܶܫܬܰܒܗܪܺܝܢ ܒܣܽܘܓܳܐܐ ܕܥܽܘܬܪܗܽܘܢ.
7 ܐܰܚܳܐ ܠܳܐ ܦܳܪܶܩ ܘܓܰܒܪܳܐ ܠܳܐ ܝܳܗܶܒ ܠܰܐܠܳܗܳܐ ܦܽܘܪܩܳܢܶܗ.
8 ܝܰܩܺܝܪ ܗܽܘ ܦܽܘܪܩܳܢܳܐ ܕܢܰܦܫܗܽܘܢ.
9 ܠܺܐܝ ܠܥܳܠܰܡ ܕܬܺܚܶܐ ܠܥܳܠܰܡ ܥܳܠܡܺܝܢ. ܘܠܳܐ ܬܶܚܙܶܐ ܚܒܳܠܳܐ.
10 ܟܰܕ ܬܶܚܙܶܐ ܚܰܟܺܝ̈ܡܶܐ ܕܡܳܝܬܺܝܢ. ܐܰܟܚܕܳܐ ܣܰܟ̈ܠܶܐ ܘܚܰܣܺܝܖ̈ܰܝ ܪܶܥܝܳܢܳܐ ܕܳܐܒܕܺܝܢ. ܘܫܳܒܩܺܝܢ ܩܶܢܝܳܢܗܽܘܢ ܠܰܐ̱ܚܖ̈ܳܢܶܐ.
11 ܩܰܒܖ̈ܰܝܗܽܘܢ ܒܳܬܰܝ̈ܗܽܘܢ ܠܥܳܠܰܡ. ܘܡܰܥܡܰܪܗܽܘܢ ܠܕܳܪܕܳܖ̈ܺܝܢ. ܘܩܳܪܶܝܢ ܫܡܳܗ̈ܶܐ ܒܰܐܪܥܳܐ.
12 ܒܰܪܢܳܫܳܐ ܒܺܐܝܩܳܪܶܗ ܠܳܐ ܐܶܬܒܰܝܰܢ. ܐܶܠܳܐ ܐܶܫܬܠܶܡ ܠܰܒܥܺܝܪܳܐ ܘܶܐܬܕܰܡܺܝ ܠܳܗ̇.
13 ܗܳܢܰܘ ܫܒܺܝܠܗܽܘܢ ܬܽܘܩܰܠܬܳܐ ܠܢܰܦܫܗܽܘܢ. ܘܰܐ̱ܚܪܳܝܰܬ ܒܦܽܘܡܗܽܘܢ ܢܶܪܥܽܘܢ.
14 ܐܰܝܟ ܥܳܢ̈ܳܐ ܠܰܫܝܽܘܠ ܢܶܫܬܰܠܡܽܘܢ ܘܡܰܘܬܳܐ ܢܶܪܥܶܐ ܐܶܢܽܘܢ. ܘܢܶܫܬܰܠܛܽܘܢ ܒܗܽܘܢ ܬܖ̈ܺܝܨܶܐ ܒܨܰܦܪܳܐ. ܘܨܽܘܪܰܬܗܽܘܢ ܬܒܰܠܶܐ ܫܝܽܘܠ. ܘܡܶܢ ܬܶܫܒ̈ܚܳܬܗܽܘܢ ܢܶܬܕܰܚܩܽܘܢ.
15 ܐܰܠܳܗܳܐ ܢܶܦܪܩܺܝܗ̇ ܠܢܰܦܫܝ̱. ܘܡܶܢ ܐܺܝܕܳܐ ܕܰܫܝܽܘܠ ܢܰܣܩܰܢܝ̱.
16 ܠܳܐ ܬܶܕܚܰܠ ܡܳܐ ܕܥܳܬܰܪ ܓܰܒܪܳܐ ܘܣܳܓܶܐ ܐܺܝܩܳܪܳܐ ܕܒܰܝܬܶܗ.
17 ܡܶܛܽܠ ܕܠܳܐ ܢܳܣܶܒ ܡܶܕܶܡ ܒܡܰܘܬܶܗ. ܐܳܦܠܳܐ ܢܳܚܶܬ ܒܳܬܪܶܗ ܫܽܘܒܚܶܗ.
18 ܡܶܛܽܠ ܕܢܰܦܫܶܗ ܗܽܘ ܡܒܰܪܶܟ ܒܚܰܝܰܘ̈ܗܝ. ܘܢܰܘܕܶܐ ܠܳܟ ܟܰܕ ܬܰܛܐܶܒ ܠܶܗ.
19 ܘܰܬܡܰܛܶܝܘܗ̱ܝ ܥܕܰܡܳܐ ܠܕܳܪܳܐ ܕܰܐܒܳܗܰܘ̈ܗܝ. ܥܕܰܡܳܐ ܠܥܳܠܰܡ ܠܳܐ ܢܶܚܙܶܐ ܢܽܘܗܪܳܐ.
20 ܒܰܪܢܳܫܳܐ ܕܒܺܐܝܩܳܪܶܗ ܠܳܐ ܐܶܬܒܰܝܰܢ. ܐܶܠܳܐ ܐܶܫܬܠܶܡ ܠܚܰܝܽܘܬܳܐ ܘܶܐܬܕܰܡܺܝ ܠܳܗ̇.